Ko e Meʻa ʻOku Tau Tui Ki Aí

ʻOku Mahuʻinga ʻa e Tauʻatāina ke Filí Ki Heʻetau Fakalakalaka Taʻengatá

Kuo ʻosi foaki mai heʻetau Tamai Hēvaní ʻa e tauʻatāina ke filí. ʻOku hoko ʻa e malava ko ʻeni ke tau fili pē maʻatautolú ko ha konga mahuʻinga ʻo e palani ʻo e fakamoʻuí.

ʻI he Fakataha Lahi ko ia ʻi he Langí ʻi he maama fakalaumālié, naʻe fakamatalaʻi ai heʻetau Tamai Hēvaní ʻEne palaní, ʻa ia naʻe kau ai ʻa e tefitoʻi moʻoni ʻo e tauʻatāina ke filí. Naʻe angatuʻu ʻa Lusefā mo “feinga ke fakaʻauha ʻa e tauʻatāina ke fili ʻa e tangatá” (Mōsese 4:3). Ko hono olá, naʻe kapusi ai ia ki tuʻa mo kinautolu naʻe muimui kiate iá. Ko kitautolu hono toengá, naʻa tau fili ke muimui ʻi he palani ʻa e Tamai Hēvaní, ʻa ia naʻá ne fakaʻatā ai kitautolu ke tau omi ki māmani ʻo maʻu ha sino fakamatelie. ʻOkú ne toe ʻomi foki ai ha Fakamoʻui, ʻa Sīsū Kalaisi, ʻa ia te Ne fai ha fakalelei maʻa ʻetau ngaahi angahalá. Makatuʻunga ʻi he fakatomalá ʻe lava ke fakamolemoleʻi ai kitautolu. Naʻa tau kalanga fakafiefia (vakai, Siope 38:7)!

Ko e founga ʻo ʻetau fakaʻaongaʻi ʻa e meʻafoaki ko iá ʻi he moʻui fakamatelié ʻe makatuʻunga ai ʻa ʻetau fiefia pe mamahi taʻengatá. ʻOku akoʻi kitautolu ʻe he folofolá “ʻoku ʻi ai ha fono, naʻe tuʻutuʻuni ʻi he langí… , ʻa ia ʻoku makatuʻunga ki ai ʻa e ngaahi tāpuaki kotoa pē” (T&F 130:20)—pea ki he fonó ni kuo toe “fokotuʻu ki ai mo ha tautea” (ʻAlamā 42:22). Ko ia, ʻi he taimi ʻoku tau fili ai ʻa e meʻa ke tau fakahokó, ʻoku tau toe fili ai pē foki mo e ngaahi nunuʻa ʻo ʻetau ngaahi angafaí (vakai, Kalētia 6:7). Neongo he ʻikai hoko he taimi pē ko iá ʻa e ngaahi nunuʻá, ka kuo pau maʻu pē ke nau muiaki mai. ʻOku taki kitautolu ʻe he fili ke tauhi ʻe ngaahi fekau ʻa e ʻOtuá ki he nongá mo e moʻui taʻengatá. ʻOku taki kitautolu ʻe he fili ke tali e ngaahi fakatauele ʻa Sētané ki he angahalá pea mo e loto mamahí.¹

Naʻe tā ʻe he palōfita ʻo e Fuakava Motuʻá ko Siosiuá ha sīpinga maʻatautolu ʻi heʻene pehē, “Mou fili he ʻahó ni ʻa ia te mou tauhí; … ka ko au mo hoku falé te mau tauhi ʻa [e ʻEikí]” (Siosiua 24:15).

1. Ko ʻetau moʻui fakamatelié ko ha vahaʻa taimi ia ʻo e sivi ke ʻiloʻi pe ʻe fēfē haʻatau fakaʻaongaʻi ʻetau tauʻatāina ke filí (vakai, ʻĒpalahame 3:25).

2. Kuo pau ke ʻi ai “ha fehangahangai ʻi he meʻa kotoa pē” ka tau lava ʻo ʻilo ʻa e faikehekehe ʻi he leleí mo e koví. ʻOku ʻomi ʻe he meʻá ni kiate kitautolu ha faingamālie ke tau fili. (Vakai, 2 Nīfai 2:11–16; T&F 29:39.)

3. Naʻe foaki mai heʻetau Tamai Hēvaní kiate kitautolu fakatāutaha ʻa e Maama ʻa Kalaisí ke tau lava ai ʻo ʻilo ʻa e leleí mei he koví (vakai, Molonai 7:12–17).

4. Ko e taimi ʻoku tau fili ai e meʻa ke tau fakahokó, tatau ai pē pe ko e lelei pe kovi, ʻoku tau toe fili ai pē foki mo e ngaahi nunuʻa ʻoku muiaki mai ki heʻetau ngaahi angafaí (vakai, Teutalōnome 11:26–28; 30:15–20; Kalētia 6:7; Fakahā 22:12).

5. Koeʻuhí kuo “fakangofua [kitautolu] ke ngāue [maʻatautolu] pē,” ʻoku tau haʻisia leva ki heʻetau ngaahi angafaí (vakai, Hilamani 14:30–31).

6. Ko e taimi ʻoku tau fili ai ke talangofua ki he ngaahi fekau ʻa e ʻOtuá, ʻoku lahi ange leva ʻa e ngaahi meʻa ke tau fili mei aí, pea ʻoku tau maʻu ai ha tauʻatāina lahi ange (vakai, 2 Nīfai 2:27; T&F 58:26–28; 93:20).

7. Ko e taimi ʻoku tau fili ai ke talangataʻa ki he ngaahi fekau ʻa e ʻOtuá, ʻoku siʻisiʻi ange ʻa e ngaahi meʻa ke tau fili mei aí, pea te tau lava leva ʻo pōpula ki he angahalá (vakai, 2 Nīfai 2:29; Sione 8:34).

8. He ʻikai tuku heʻetau Tamai Hēvaní “[kitautolu] ke lahi hono ʻahiʻahiʻi [kitautolu]ʻi he meʻa te [tau] faʻa faí; ka … ʻe tofa ʻe ia ʻa e hala ke hao ai,” ʻo kapau te tau fili ke tekeʻi ʻa e fakatauele ʻa e filí (1 Kolinitō 10:13).

9. Kuo pau ke tau loto fakatōkilalo mo “lotu maʻu ai pē” ka tau lava ʻo tekeʻi ʻa e fakatauele ʻa e filí (vakai, ʻAlamā 13:28).

Maʻuʻanga Fakamatalá

1. Vakai, Tuʻu Maʻu ʻi he Tuí (2004), 188.

Hili ʻa e Hingá naʻe maʻu ʻe ʻĀtama mo ʻIvi “ ʻa e tauʻatāina ke filí pe maʻanauá, pe ko ʻena fili ki he leleí pe ko e koví. ʻOku hanga ʻe he meʻá ni ʻo fakafaingofuaʻi ʻena akó mo fakalakalaká. Naʻe toe lava foki ai ke na fai ha ngaahi fili naʻe hala, ʻo na faiangahala ai.” (Malangaʻaki ʻEku Ongoongoleleí [2004], 56).

“Ko ia, ʻoku tauʻatāina ʻa e tangatá … ke fili ʻa e tauʻatāina mo e moʻui taʻengatá, tuʻunga ʻi he [Fakalaloa] lahi ʻo e faʻahinga kotoa ʻo e tangatá, pe fili ʻa e pōpulá mo e maté, ʻi heʻenau pōpula mo moʻulaloa ki he mālohi ʻo e tēvoló” (2 Nīfai 2:27).

Tā fakatātaaʻi ʻe Matthew Reier, tuku kehe ʻa ia ʻoku fakaʻilongaʻí; tā ʻo e māmaní © Corbis; Ko Hono Kapusi ʻo ʻĀtama mo ʻIvi mei he Ngoue ko ʻĪtení, tā ʻe Gary Kapp; tā faitaaʻi ʻo e tangata mo e ʻōfisa polisí naʻe fai ʻe Robert Casey