ʻOku Fēfē Ho Ngaahi ʻUlungāanga Fetuʻutaki Fakaʻilekitulōniká?
Ko e ngaahi telefoni toʻotoʻó, ʻī-meilí, fetohiʻaki telefoní—ʻoku lahi fau ha ngaahi founga lelei ke talanoa ai mo ho ngaahi kaungāmeʻá mo ho fāmilí. ʻOkú ke ʻilo ʻa e taimi ʻoku taau ai ke fakaʻaongaʻi kinautolú?
1 Ne ke toki maʻu ha meʻaʻofa ʻaho fāʻeleʻi mei hoʻo kui fefiné. Ne fakamanatu atu ʻe hoʻo fineʻeikí ke ʻave haʻo kiʻi tohi fakamālō ki ai, ka ʻokú ke fie fai haʻo ʻī-meili ki ai. Ko e hā te ke faí?
-
Fai ha ʻī-meili ki ho Kui-fefiné.
-
ʻAve ki ai ha kiʻi tohi ne tohi-nima.
2 Ne ʻī-meili atu ʻa Mele kiate koe ʻo fakaafeʻi koe ki he fakafiefiaʻi hono ʻaho fāʻeleʻí. ʻOkú ke fie ʻave ha ngaahi pōpoaki ʻī-meili ki ho kaungāmeʻa mamae ko Selá. Ko e hā ʻoku totonu ke ke faí?
-
Fai ha ʻī-meili kia Sela koeʻuhí ke ʻilo mo ia foki ki he pātí.
-
Ngata pē ʻiate koe ʻa e ʻī-meilí.
3 Kuo taimi ki he efiafi fakafāmili ʻi ʻapí. ʻOkú ke kei fie vaʻinga komipiuta pē koe kae ʻoua kuo kamata ʻa e lēsoní. Ko e hā te ke faí?
-
Fakaʻosi hoʻo vaʻingá he lolotonga hono hivaʻi ʻe homou fāmilí ʻa e ʻuluaki hivá.
-
Tāmateʻi ʻa e komipiutá, ka ke hiva mo ho fāmilí.
4 Naʻe ʻoatu ʻe hoʻo ongomātuʻá ha telefoni toʻotoʻo foʻou ki he ngaahi meʻa fakatuʻupakeé. ʻOkú ke fie telefoni ki ho kaungāmeʻá koeʻuhí ke lava ʻa e toenga ʻo e fānau ʻi he akó ʻo sio ʻi hoʻo telefoní. Ko e hā te ke faí?
-
Fai ha ngaahi telefoni fakavavevave, ke fakaʻaliʻali pē hoʻo telefoni foʻoú.
-
Faʻo hoʻo telefoní ʻi hoʻo kato āfeí.
5 ʻOku fie vaʻinga ʻakapulu ho kaungāmeʻa ko Kilisitiná mo koe, ka ʻokú ke lolotonga faitohi fakavavevave he taimi ko iá ki ho kaungāmeʻa ko Sēkopé. Ko e hā te ke faí?
-
Talaange kia Kilisitina te ke vaʻinga mo ia ʻapongipongi ka ke lava ʻo hoko atu hoʻo tohi kia Sēkopé.
-
Talaange kia Sēkope te ke tohi atu ki ai ʻamuiange ka ke lava ʻo vaʻinga ʻakapulu mo Kilisitina.
Naʻá ke tali ha niʻihi ʻo e ngaahi fehuʻí? Kapau ʻoku ʻio, vakaiʻi ʻa e ngaahi fakakaukau ko ʻení ke fakaleleiʻi ai ho ʻulungāanga fetuʻutaki fakaʻilekitulōniká.
-
Ko e ʻī-meilí ko ha founga vave ia ke fetuʻutaki ai, ka ko hono tuku ha taimi ke ʻave ai ha kiʻi tohi fakamāloó ʻe fakamahino ai ki hoʻo kui-fefiné ʻa e lahi hoʻo ʻofa aí mo fakahoungaʻi ʻene meʻaʻofá. ʻOku totonu foki ke ke telefoni ki ai ʻo fakamālō ange.
-
Ko hono ʻave ha ʻī-meili hao kaungāmeʻa ki hao kaungāmeʻa kehe ʻoku hangē ia ko hano tala ha meʻa fakapulipulí. Kapau ʻoku fai atu ʻe hao kaungāmeʻa ha ʻī-meili ʻo fakataumuʻa pē kiate koe, ngata pē ʻa e ʻī-meili ko iá ʻiate koe. He ʻikai lavea ai e loto ʻo Selá kapau naʻe ʻikai fakaafeʻi ki he pātí.
-
ʻOku ifo ʻa e vaʻinga komipiutá, ka ʻoku mahuʻinga ʻa e efiafi fakafāmili ʻi ʻapí. Kau ʻi he hiva ʻuluakí, ka ke toki vaʻinga komipiuta ʻamuiange.
-
Kapau ne fakatau atu ʻe hoʻo ongomātuʻá ha telefoni toʻotoʻo ki he ngaahi meʻa fakatuʻupakeé, ʻoku ʻikai totonu ke ke ngāue ʻaki ia ke telefoni ki ho ngaahi kaungāmeʻá. ʻIkai ngata ai, mahalo ʻe kovi e loto ʻo e tamaiki kehé kapau te ke fakaʻaliʻali takai ia.
-
ʻOku sai ke talanoa mo e ngaahi kaungāmeʻa ʻoku ʻikai ke mou fakatahá, ka ʻoku lelei ange ke fakamoleki e taimí mo e ngaahi kaungāmeʻa ʻoku ʻi ai tonú. Feinga ke fakangatangata ho taimi he komipiutá ka ke lava ʻo fakamoleki ha taimi mo e ngaahi kaungāmeʻa ʻoku mou femātaakí.
Faitaaʻi ʻe John Luke