Taimi Feʻinasiʻakí
ʻOku Fakamoʻoniʻi ʻe he Laumālie Māʻoniʻoní ʻa e Moʻoni ʻo e Ngaahi Meʻa Kotoa Pē
ʻOku tau lau ʻi he Tohi ʻa Molomoná fekauʻaki mo Līhai mo hono fāmilí. Naʻe taki kinautolu ʻe he Tamai Hēvaní ki ha ʻapi foʻou ʻi ha fonua lelei. Ne maʻu ʻe Līhai ha meʻaʻofa fakaofo mei he ʻOtuá: ko ha meʻa fuopotopoto ʻoku ʻi ai ha hui ʻe ua ʻokú na “tuhuʻi … ʻa e hala ke [nau] fou aí” (1 Nīfai 16:10). Naʻe ui ʻa e meʻaʻofa ko ʻení ko e Liahona. Naʻe pehe ʻe Nīfai ko e Liahoná naʻe “ngāue ʻo fakatatau mo [ʻemau] tuí mo e faivelengá mo [ʻemau] talangofuá” (1 Nīfai 16:28). Naʻe feinga ʻa e fāmili ʻo Līhaí ke muimui ki he ngaahi fakahinohino ʻi he Liahoná.
ʻOku tau maʻu ha meʻaʻofa fakaofo ʻi he taimi ʻoku papitaiso mo hilifakinima kitautolú. Ko e meʻaʻofa ʻeni ʻo e Laumālie Māʻoniʻoní. Ko e meʻaʻofa ʻo e Laumālie Māʻoniʻoní ʻoku tatau mo e Liahoná. Te tau lava ʻo ako ke muimui ʻi he Laumālie Māʻoniʻoní. Kapau te tau muimui ki heʻene ngaahi ueʻí, te tau lava ʻo foki ʻo toe nofo mo e Tamai Hēvaní mo Sīsū Kalaisi.
Tohinoa Folofola ʻo Sune 2010
Lau ʻa e Molonai 10:5.
Lotu ki he Tamai Hēvaní ke ke ʻilo ʻe tokoniʻi koe ʻe he Laumālie Māʻoniʻoní.
Ako maʻuloto ʻa e Molonai 10:5.
Fili ha taha ʻo e ngaahi ʻekitivitī ko ʻení, pe faʻu pē haʻo ʻekitivitī ʻaʻau:
-
Tokoniʻi ha taha ke ne maʻuloto ʻa e Molonai 10:5.
-
Toʻo ʻa e ʻekitivitī he peesi 65, ʻo e Liahoná ʻo fakapipiki ia ki ha pepa matolu. Kosi ʻo toʻo ʻa e ngaahi foʻi fuopotopotó pea mo e ongo konga ʻi loto he ngaahi laine motumotú. Fakatahaʻi ʻa e ngaahi fuopotopotó ʻaki ha meʻa fakamaʻu ukamea. Lau ʻa e fehuʻi ʻi he konga ʻi he feituʻu ne kosí, pea kumi ʻa e talí ʻi he fakamoʻoni folofola ʻi he matapā sioʻata he tafaʻaki hanga maí. Te ke lava ke hiki hoʻo talí ʻi hoʻo tohinoa folofolá.
-
Tohi ʻi hoʻo tohinoá fekauʻaki mo ha ngaahi taimi ne ke ongoʻi ai ʻa e Laumālie Māʻoniʻoní. Ko hoʻo fakatokangaʻi ʻene tokoni ʻi he kuo hilí ʻe tokoni ia ke ke fakafanongo ai mo muimui ke Heʻene ngaahi ueʻí ʻi he kahaʻú.
-
Talanoa mo hoʻo mātuʻá, kau faiakó, pe ngaahi kaungāmeʻá fekauʻaki mo e ngaahi taimi ne ke ongoʻi ai ʻa e Laumālie Māʻoniʻoní.
Hiki ʻi hoʻo tohinoá pe tā ha fakatātā fekauʻaki mo e meʻa naʻá ke faí. ʻOku founga fēfē ʻene tokoni ʻa e meʻa ne ke faí ke mahino kiate koe ʻa e Molonai 10:5?
Ko hai te ne akoʻi mai ʻa e meʻa kotoa pē mo tokoniʻi au ke u manatuʻí?
ʻOku lea fēfē ʻa e Laumālie Māʻoniʻoní kiate kitautolú?
ʻE lava fēfē nai ke u ʻiloʻi ʻa e ngaahi ueʻi ʻa e Laumālie Māʻoniʻoní?
ʻE founga fēfē haʻatau ʻilo hono moʻoni ʻo e meʻa kotoa peé?
Tāfakatātā ʻe James Johnson