Fanga kiʻi Meʻa Iiki mo Faingofua

2010

Sune 2010

Fanga Kiʻi Meʻa Iiki & Faingofua

“ ʻOku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6).

Founga ke Fakaleleiʻi ʻaki ʻa e Fetuʻutaki Fakafāmilí

Tāmateʻi pea tuku ki he tafaʻakí ʻa e ngaahi nāunau fakaʻilekitulōniká ki muʻa pea toki kamata ʻa e ngaahi fakataha fakafāmilí ʻo hangē ko e ngaahi houa kaí, ako folofolá, mo e efiafi fakafāmili ʻi ʻapí.
Feinga ke ʻoua naʻa siʻi ange ʻi he tuʻo tahá haʻamou maʻu-meʻatokoni fakataha ʻi he ʻaho kotoa pē.
Palani ke ʻi ai maʻu pē haʻamou ngaahi ʻekitivitī fakafāmili. ʻOku ʻikai fie maʻu ia ke faingataʻa. Mou kaimeʻakai, fononga lalo ʻo ʻeva, pe vaʻinga fakataha.
ʻAi haʻamou ngaahi fealēleaʻaki fakafāmili ʻa ē ʻe lava ai ke fakahā ʻa e loto pe ngaahi meʻa ʻoku hohaʻa ki ai ʻa e tokotaha kotoa. Fakafanongo moʻoni kae ʻoua ʻe fakamaau pe tafulu, pea ʻoua ʻe toe fakaheleleu.

ʻOkú ke Fakaʻaongaʻi Fēfē Ho Taimí?

ʻOku ʻi ai ha houa ʻe 24 ʻi he ʻahó. Mahalo ʻokú ke fakamoleki ha konga lahi ʻo ia ʻi he mohé mo e ngāué (pe akó), ka ʻoku ngalingali ʻoku ʻi ai haʻo ngaahi houa siʻi ʻi he ʻaho taki taha te ke lava ʻo fakaʻaongaʻi ki ha ngaahi ʻekitivitī kehe. Ko e hā ʻa e lahi ʻo e taimi ko ia ʻokú ke fakamoleki ʻi he sio TV pe tangutu ʻi he ʻInitanetí? Kapau te ke fakamoleki ha houa pē taha ʻi ha ʻaho ʻi ha taha ʻo e ngaahi meʻa ko ʻení, ko e hā nai hano lahi ʻo e ngaahi taumuʻa, fanga kiʻi ngāūe, pe ngaahi fatongia te ke lava ʻo fakakakato he lolotonga ʻo ha uike? ʻo ha māhina? ʻo ha taʻu?

Lau ʻa e folofolá pe ako maʻuloto ha ngaahi potu folofola.
Kau ʻi ha sipoti pe fakamālohisino.
Ako ha meʻa pe talēniti foʻou ʻokú ke manako ai: hangē ko e feimeʻatokoní, hivá, tuituí, ngoué pe tā ha meʻalea.
Kau ʻi ha efiafi fakafāmili ʻi ʻapi pe fakamoleki haʻo taimi mo ho fāmilí.
Lau ha tohi lelei.
Fai ha tohi langaki moʻui ki ha faifekau [taimi kakato] mei homou uōtí pe koló.
Ako ha lea fakafonua foʻou.
Ngāue ki he hisitōlia fakafāmilí.
ʻAlu ʻo faiako fakaʻapi pe faiako ʻaʻahi.
Fakahoko ho fatongia faka-Siasí.
Tohi ʻi hoʻo tohinoá.

Fakatupulaki ʻo ʻEku Fakamoʻoní

ʻI heʻeku feinga ko ia ke fakatupulaki ʻeku fakamoʻoni kia Sīsū Kalaisí, ʻoku ou fakatokangaʻi ʻoku hanga ʻe heʻeku toutou fai ʻa e fanga kiʻi meʻa faingofuá ʻo ʻai ʻeku fakamoʻoní ke tupulaki. Koeʻuhí ʻoku ou feinga ke lotu, ʻalu ki he lotú, lau ʻa e Tohi ʻa Molomoná mo tuʻu ko ha fakamoʻoni ʻo Kalaisi, ʻoku fakautuutu ai ʻa e tupulaki ʻeku fakamoʻoni ki he Fakamoʻuí.

Neongo ʻoku ʻi ai ha ngaahi faingataʻa mo ha ngaahi palopalema ʻoku hoko, ka kuó u lava ʻo taʻofi ha ngaahi meʻa naʻe mei fakatuʻutāmaki kiate au ʻaki ʻeku fanongo ki he ueʻi ʻa e Laumālie Māʻoniʻoní, ʻa ia ʻokú ne akoʻi mai ʻa e hala ʻoku totonu ke u filí.

Pea ʻi heʻeku muimui ki he faleʻi kuo fai ʻe he kau taki ʻo e Siasí, ʻoku ou ongoʻi ʻoku tupulaki ʻeku fakamoʻoní pea ʻoku ou ʻiloʻi ʻoku ou fakaʻau ke toe ofi ange ki heʻeku Tamai Hēvaní.

ʻEngi Sotavī, Kemipoutiá

Toʻohemá, mei ʻolunga: taá naʻe fai ʻe John Olu Faoseke; taá naʻe fai ʻe Matthew Reier; tā fakatātaaʻi ʻe Beth M. Whittaker; toʻomataʻú, mei ʻolunga: ʻata ʻi muí © Getty Images; taá ʻi he angalelei ʻa e Deseret News; taá naʻe fai ʻe Chad E. Phares