Naisīlia

Lolotonga e taʻu 1950 tupú, ne kamata ʻilo ai ʻe ha kau Naisīlia ʻe niʻihi fekauʻaki mo e Siasí ʻi ha ngaahi fakamatala fakamakasini mo ha ngaahi tohi ʻa e Siasí. Naʻa nau faitohi ki he ʻuluʻi ʻōfisi ʻo e Siasí ʻo fakahaaʻi ʻenau fie ʻilo lahi ange fekauʻaki mo e ngaahi akonaki ʻo e Siasí.

ʻI he tali ki he kolé ni, ne fakakaukau ai ʻa e kau taki ʻo e Siasí ke kamata ha polokalama ngāue fakafaifekau ʻi he fonuá. Neongo ia, naʻe hanga ʻe he tau fakalotofonuá, ngaahi faingataʻa ʻo e maʻu ha ngofua tūʻutá, pea mo e palopalema ʻo e ʻikai ke ʻi ai ha kau maʻu lakanga fakataulaʻeiki fakalotofonua tokolahi feʻunga ke nau fakalele ʻa e Siasí ʻo taʻofi ʻa e kau taki ʻo e Siasí mei hano fokotuʻu ha ngaahi ʻiuniti ʻo e Siasí ʻi he feituʻú ni.

Naʻe faifai pea toki lava ʻe he Siasí ʻo kamata ʻave ki ai ha kau faifekau ʻi he 1978. ʻI he taimi naʻe tūʻuta atu ai ʻa e kau fuofua faifekaú, naʻa nau ʻilo ai ha ngaahi falukunga kakai tokolahi ʻoku nau fie ʻilo ki he ongoongoleleí. Naʻe fakahoko ʻa e fuofua papitaisó ʻi Nōvema ʻo e taʻu pē ko iá, pea ʻi he ʻaho tatau pē, naʻe fokotuʻu ai ʻa e fuofua kolo ʻo e Siasí.

ʻI he 1987 ne aʻu hake ʻa e tokolahi ʻo e kāingalotu ʻo e Siasí ʻo meimei toko 10,000, pea ʻi he 1999, kuo tokolahi ange ʻa e kāingalotu ʻo e Siasí ʻi Naisīliá ʻi ha toe puleʻanga ʻAfilika, ko e fakakātoa honau kāingalotú ko e toko 42,746. ʻOku ʻi ai ha temipale ʻo Naisīlia he taimí ni ʻi ʻApa, ʻa ia naʻe fakatapui ʻi he 2005 ʻe Palesiteni Kōtoni B. Hingikelī (1910–2008).

Ko e Siasí ʻi Naisīlia
Tokolahi ʻo e Kāingalotú	83,919
Ngaahi Misioná	4
Ngaahi Siteikí mo e Vahefonuá	32
Ngaahi Uōtí mo e Ngaahi Koló	256
Ngaahi Temipalé	1

ʻOlungá: Ko e fakatahataha mai ʻa e kāingalotu ʻo e Siasí ʻi Naisīliá ke mamata ki he konifelenisi lahí. Toʻomataʻú: Ko e Temipale ʻApa Naisīliá.