Naʻe ʻIkai Ke u Toe Tailiili

Poalisi ʻAnituanesi, Silei

Ne mau ō ke tufa ha ngaahi tohi tufa ke maʻu ha kau fie-fanongo maʻa ʻemau ʻekitivitī ʻa e konifelenisi fakasiteiki ʻemau toʻu tupú. Naʻá ku ʻosi lau ʻa e Ki Hono Fakamālohia ʻo e Toʻu Tupú. Ko e taimi ne kamata ai ʻa e ʻekitivitií, naʻá ku toe lī atu pē ia ki he tēpile naʻá ku maʻu aí. Ka naʻe haʻu ha fakakaukau kiate au ʻoku totonu ke u toʻo ʻo ʻalu mo ia. Ko ia, ne u toʻo leva ia ʻo faʻo ki heʻeku ngaahi folofolá.

Naʻa mau tailiili kotoa pē fekauʻaki mo e lea ki ha kakai ʻoku ʻikai ke mau maheni fekauʻaki mo e ongoongoleleí, ka ʻi heʻemau tuʻu ke fakalea ki ha fefine ʻoku fai ʻene taufō ʻi hono loto ʻapí, naʻe mātuʻaki anga fakakaumeʻa mo ne toʻo ha taha ʻo ʻemau ngaahi tohi tufá. ʻI he lolotonga ʻo ʻemau talanoá naʻá ne fakamatala mai fekauʻaki mo ʻene hohaʻa ki hono fāmilí. Ko haʻane tamasiʻi ʻe taha ʻoku fekuki mo e faitoʻo konatapú pea mo ha toe ngaahi palopalema kehe pē. Ne fai homau lelei tahá ke fakafiemālieʻi, pea mau hoko atu leva.

ʻOsi mei ai ha ngaahi miniti siʻi kuó u fakaava ʻeku folofolá. Ko e taimi naʻá ku sio hifo ai ki heʻeku kiʻi tohi tufa Ki Hono Fakamālohia ʻo e Toʻu Tupú, ne u manatuʻi e lea ʻa e fefiné fekauʻaki mo ʻene tamá peá u ongoʻi ʻa ʻeku fie foki ki ai. Naʻe ʻikai ke u toe ongoʻi tailiili.

Ne mau ʻilo ʻa e fefiné ʻoku kei ʻi tuʻa pē. Naʻá ku talaange leva ʻoku ʻi ai haʻaku meʻa mahalo ʻe saiʻia ai. Naʻá ku fakamatala fekauʻaki mo e ngaahi tuʻunga moʻui hotau toʻu tupú mo ʻoange ki ai ʻa e kiʻi tohi tufá ke ne lau mo ʻene tamá. Naʻe lava pē ke u tala naʻe fiefia ʻi heʻeku foaki ange iá. Naʻá ne ui mai leva ʻene tamá ki tuʻa, pea mau lava ai ke aleaʻi ha taimi ke na talanoa mo e kau faifekaú.

Ne u ongoʻi kuó u ʻosi hoko pē au ko ha faifekau! Naʻe fakafiefia ke maʻu ʻa e faingamālie ke akoʻi pea mahalo mo tokoni ki he talavou ko ʻení. Naʻá ku ʻilo ko e Laumālié naʻá ne talamai ke u toʻo ʻa e kiʻi tohi tufá.