Pōpoaki ʻa e Faiako ʻAʻahí
Fakafoʻou ʻo e Ngaahi Fuakavá ʻi he Sākalamēnití
Akoʻi e ngaahi potufolofola mo e ngaahi lea ko ʻení, pe ko ha tefitoʻi moʻoni kehe te ne faitāpuekina ʻa e kau fafine ʻokú ke ʻaʻahi ki aí, ʻo ka fie maʻu. Fai hoʻo fakamoʻoni ʻo kau ki he tokāteliné. Fakaafeʻi ʻa kinautolu ʻokú ke akoʻí ke nau fakamatala atu ha meʻa ne nau ongoʻi mo akó.
Naʻe Kamata ʻe Sīsū Kalaisi ʻa e Sākalamēnití
“Naʻe toʻo ʻe Sīsū ʻa e maá, peá ne tāpuakiʻi, mo pakipaki ia, ʻo ʻoatu ki heʻene kau ʻAposetoló, mo ne pehē, ʻToʻo, ʻo kai’ (Mātiu 26:26). ʻKo hoku sinó ʻeni ʻa ia kuo foaki koeʻuhí ko kimoutolu: fai ʻeni ʻi he fakamanatu kiate au’ (Luke 22:19). ʻI he founga tatau, naʻá ne toʻo ʻa e ipu uainé, ʻa ia ʻi hono anga totonú kuo ʻosi huʻi ʻaki ʻa e vai, peá ne fai ha lotu ʻo fakafetaʻi koeʻuhí ko ia, mo ne ʻoatu ia kiate kinautolu naʻe haʻohaʻo maí, mo pehē: ʻKo e ipú ni ko e fuakava foʻou ʻi hoku totó,’ ʻ ʻa ia ʻoku lilingi … ke fakamolemoleʻi ai ʻa e angahalá.’ ʻFai ʻEni ʻi he Fakamanatu Kiate au.’
“Talu mei he meʻa ko ia naʻe hoko ʻi he fata ʻo e falé ʻi he efiafi ki muʻa pea toki hoko ʻa e ngaahi meʻa ʻi Ketisemani mo Kolokotá, mo e haʻisia ʻa e fānau ʻo e talaʻofá ki he fuakava ke nau manatuʻi ʻa e feilaulau ʻa Kalaisí ʻi ha founga foʻou mo māʻolunga ange pea mo toputapu ange mo fakafoʻituitui.”1
ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá.
ʻOku Tau Fakafoʻou ʻEtau Ngaahi Fuakava ʻo e Papitaisó ʻi he Sākalamēnití
“Ko e taimi ʻoku tau papitaiso aí, ʻoku tau toʻo kiate kitautolu ʻa e huafa toputapu ʻo Sīsū Kalaisí. Ko ʻetau toʻo ko ia kiate kitautolu Hono huafá ko e taha ia ʻo e ngaahi meʻa mahuʻinga taha ʻoku tau foua ʻi he moʻuí. …
“ ʻOku tau palōmesi ʻi he uike taki taha ʻi he houalotu sākalamēnití ke tau manatuʻi ʻa e feilaulau fakalelei ʻa hotau Fakamoʻuí ʻi heʻetau fakafoʻou ʻetau fuakava ʻi he papitaisó. ʻOku tau palōmesi ke fai ʻa e meʻa naʻe fai ʻe he Fakamoʻuí—ke tau talangofua ki he Tamaí pea tauhi maʻu pē ʻa ʻEne ngaahi fekaú. Ko e tāpuaki ʻoku tau maʻu aí, ko ʻetau maʻu ʻa Hono Laumālié ke ʻiate kitautolu maʻu ai pē.”2
ʻEletā Robert D. Hales ʻo e Kōlomu ʻo e Kau ʻAposetolo ʻe Toko Hongofulu Mā Uá.
“Naʻá ku kau fakataha mo ha kiʻi taʻahine taʻu valu ʻi he ʻaho ʻo hono papitaisó. ʻI he fakaʻosinga ʻo e ʻahó naʻá ne pehē loto vēkeveke mai, ʻKuo papitaiso au he ʻaho kakato, pea ʻoku teʻeki ai ke u fai ha angahala ʻe taha!’ Ka naʻe ʻikai tuʻuloa e haohaoa hono ʻahó, pea ʻoku ou tui ʻokú ne ako he ʻahó ni, ʻo hangē ko kitautolú, neongo e lahi ʻetau feingá, ka he ʻikai ke tau lava ʻo fakaʻehiʻehi mei he tūkunga taʻe fakafiemālie pe fili hala kotoa pē. …
“… He ʻikai malava ke tau fakahoko toko taha pē ʻa e liliú ʻiate kitautolu. ʻOku ʻikai feʻunga pē hotau lotó mo ʻetau fakaʻamú. ʻI he taimi ʻoku tau fai ai ha fehālaaki pe fili hala, kuo pau ke tau maʻu mai e tokoni ʻa e Fakamoʻuí ka tau lava ʻo foki ki he hala totonú. ʻOku tau kai ʻa e sākalamēnití he uike takitaha ke fakahaaʻi ʻetau tuí ki Hono mālohí ke Ne liliu kitautolu. ʻOku tau vete ʻetau angahalá mo palōmesi te tau siʻaki kinautolu.”3
Julie B. Beck, palesiteni lahi ʻo e Fineʻofá.
Faitaaʻi ʻe Jerry Garns