Hopo Fakatonu ki he Fasi Faka-Samaiká
ʻI ha efiafi māfana ʻe taha ʻi Kingisitoni ʻi Samaika, mahalo te ke maʻu atu ʻa Samuela (taʻu 10) mo Siotaine (taʻu 7) ʻokú na hopohopo ʻi tuʻa mo hona ongo tuongaʻané. ʻI heʻenau hopohopó, ʻoku nau hiva fakatonu pē ki he fasí:
1, 2, 3, Fefine ko Lulú,
4, 5, 6, Fefine ko Lulú,
7, 8, 9, Fefine ko Lulú,
10, Fefine ko Lulú,
10, Fefine ko Lulú.
Ko Samuela mo Siotainé ko ha ongo kiʻi tamaiki fiefia ʻokú na poto ʻi ha ngaahi meʻa lahi. ʻOkú na fiefia ʻi he sipotí, ako mālohi ʻi he akó, tokoni ʻi he ngāue ʻi honau ʻapí, mo hoko ko ha faʻifaʻitakiʻanga kiate kinautolu ʻokú na feohí ʻaki ʻena ʻulungāanga malimalí mo ʻena loto fiefiá.
Ngaahi ʻAho Akó
ʻI Samaiká, ʻoku ʻi he ngaahi akoʻangá ha ʻAho ʻo e Tamasiʻí mo ha ʻAho ʻo e Taʻahiné ʻi he taʻu kotoa pē. ʻl he ʻAho ʻo e Taʻahiné, ʻoku ʻikai ō ai ʻa e tamaiki tangatá ia ki he akó. Ka, ʻoku lava ai ʻa e ngaahi faʻeé ke ō mo ʻenau fānau fefiné ki he akó. ʻOku fai ai haʻanau fakaʻaliʻali talēniti, feʻauhi sipela, mo ha ngaahi ʻekitivitī fakafiefia kehe.
Naʻe fili ʻa Siotaine mei heʻene kalasí ke kau ʻi he feʻauhi sipelá, pea naʻe mālohi. ʻOku pehē ʻe Siotaine, “Ko ʻeku foʻi lea ʻoku ou manako taha ke sipelá ko e ʻātakaí .”
ʻI he ʻAho ʻo e Tamasiʻí, ʻe lava ʻa e ngaahi tamaí ke ō ki he akó mo honau ngaahi fohá. Naʻe kau ʻa Samuela ʻi he feʻauhi faʻu tohí. Naʻá ne faʻu ha fakamatala ʻo fakamatalaʻi e founga ʻokú ne fakahaaʻi ai ʻene fakaʻapaʻapa kiate iá pea mo e niʻihi kehé. Naʻe maʻu foki ʻe ia mo e pale ʻuluakí.
Ko ha ʻAʻahi ki he Temipalé
ʻOku nofo ʻamanaki ʻa Samuela ki he ʻaho ʻe lava ai ʻo ʻalu ki he temipalé. Ko ha feilaulau lahi ki ha ngaahi fāmili lahi ʻi Samaika ke ō ki he temipalé koeʻuhí he ʻoku ʻikai ke ʻi ai ha temipale ia ʻi ai. ʻOku mamafa ʻaupito ke ō ki he ʻIunaiteti Siteití ke hū he temipalé.
Kae mālié, naʻe lava ʻa e fāmili ʻo Samuela mo Siotainé ke ō. ʻOku pehē ʻe Samuela, “Ko ʻeku folau mālōlō lelei tahá ko e taimi naʻa mau ō ai ki he Kolo ko Niu ʻIoké ke ʻaʻahi ki hoku mehikitangá. Naʻa mau sio ai ki he Temipale Meniheitení. Ko e temipale pē ia ʻe taha kuo faifaiangé peá u sio ai.”
Naʻe fiefia ʻa e fāmilí kotoa ʻi he taimi naʻe fakaava ai ʻa e Temipale Panamā Siti Panamaá ʻi he 2008 he ʻoku ʻikai faingataʻa fēfē ʻa e fononga ki ai. ʻOku tuʻo taha pe tuʻo ua ʻi he taʻu ha fononga ʻa e kāingalotu ʻi Samaiká ki he Temipale Panamā Sití. ʻOku pehē ʻe Samuela, “ ʻOku ou vēkeveke ke ʻalu ki he temipalé ʻi he taimi ʻe hoko ai hoku taʻu 12.”
Ko ha Tali ki he Lotú
ʻI ha taimi ʻe taha ne ʻamanaki tāpuni ai e kautaha ʻenau tamaí. Ne fakalotolahiʻi ʻe Siotaine hono fāmilí ke nau kole tokoni ki he Tamai Hēvaní. ʻOku pehē ʻe heʻene fineʻeikí, “ ʻOku lotu faivelenga ʻaupito ʻa Siotaine. ʻOkú ne fakamanatu maʻu pē ki homau fāmilí ʻa e ngaahi meʻa ʻoku fie maʻu ke mau lotuá.” Naʻe tali ʻa e lotu ʻa e fāmilí ʻi he taimi naʻe maʻu ai ha ngāue foʻou ʻa e tangataʻeikí. ʻOku fakamatala loto fiemālie ai ʻa Siotaine ʻi heʻene pehē, “Naʻá ku ʻilo kapau te mau lotu, ʻe lelei ʻa e meʻa kotoa pē.”
Ko ha Ongo Faiako Maʻongoʻonga
ʻOku fakaʻamu ʻa Samuela ke hoko ko ha faiako ʻi haʻane fuʻu lahi hake. ʻOku loto ke ne akoʻi ʻene ongo lēsoni ʻoku saiʻia taha aí: ʻa e fiká mo e saienisí. Ko Siotainé, ʻokú ne fakaʻapaʻapaʻi hono tuongaʻane lahí, pea ʻoku loto mo ia ke hoko ko ha faiako.
ʻOku ʻosi hoko ʻa Samuela ia mo Siotaine ko ha ongo faiako he taimí ni ʻaki ʻena hoko ko ha ongo faʻifaʻitakiʻanga ki hona ngaahi kaungāmeʻá. ʻOku tokosiʻi pē ha fānau ʻi honau ʻapi akó ʻoku kau ʻi he Siasí.
ʻOku pehē ʻe Samuela, “Ko e taimi ʻoku fai ai ʻe ha taha ha meʻa kovi, hangē ko e fuhú, ʻoku ou talaange ke nau fai ʻa e meʻa ʻoku totonú.”
ʻOku fiefia ʻa Samuela mo Siotaine he vahevahe ʻena fakamoʻoní, pea ʻoku ʻiloʻi ʻe heʻena palesiteni Palaimelí ʻe lava ʻo falala kiate kinaua ke na fai ha malanga kapau ʻoku ʻikai ke haʻu ʻa e tokotaha malangá ki he lotú. ʻOkú na ʻā hengihengia ʻi he ngaahi pongipongi Sāpaté ke teuteu ha malanga telia naʻa fie maʻu ke na malanga.
ʻOku feinga ʻa Samuela mo Siotaine ke na tauhi angatonu ki he ʻEikí ʻi he meʻa kotoa pē ʻokú na faí. ʻOku pehē ʻe Siotaine, “ ʻOku ou ʻiloʻi kapau ʻoku ou maʻu ha tui, he ʻikai ke u ʻauha, ka te u toe nofo mo e Tamai Hēvaní mo Sīsū Kalaisi.”
Ngaahi tā ʻo e fāmilí mo e fānaú ʻi he angalelei ʻa e fāmilí; ʻīmisi ʻo e fuká © Nova Development; tā ʻo e ʻulu pāmé © Getty Images