Ke ke ʻi he Tafaʻaki ʻo e ʻEikí

Fai ʻe Palesiteni Dieter F. Uchtdorf

Tokoni Ua ʻi he Kau Palesitenisī ʻUluakí

Mei he “Kaumeʻa ki he Kaumeʻá,” Liahona, ʻEpeleli 1999, K2–K4.

President Dieter F. Uchtdorf

ʻI heʻeku kei siʻí, naʻá ku nofo ʻi Suikau (Zwickau) ʻi Siamane. Naʻe ʻi ai ha kaungāmeʻa ʻeku kui-fefiné naʻe hinā mo loloa hono louʻulú. Ko hono hingoá ko Sisitā ʻEuiki (Ewig), pea naʻá ne fakaafeʻi ʻeku kui fefiné ki he lotú. Ko e taimi naʻe ō atu ki ai homau fāmilí, naʻa mau fakatokangaʻi ai ha fānau tokolahi. Ne mau mālieʻia kotoa ʻi he ngaahi fasí, tautautefito ki he ngaahi hivá. Naʻá ku mālieʻia ʻaupito ʻi ha foʻi hiva ʻe taha, “Fie maʻu Au ʻe Sīsū Ke u Ulo Hangē ko ha Hueló.”¹ Naʻá ku ongoʻi ofi kia Sīsū ʻi he taimi naʻá ku hivaʻi ai iá. Naʻá ku ʻilo naʻá ne fie maʻu au ke u hoko ko ha huelo ʻo e laʻaá Maʻana. ʻOku ou kei saiʻia pē he foʻi hiva ko iá—mo e fakamoʻoni naʻá ne ʻomi kiate au kau ki he Fakamoʻuí.

Naʻe papitaiso kotoa hoku fāmilí—tuku kehe pē au, he naʻá ku kei taʻu 6 pē---ʻo hoko ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI he hoko hoku taʻu valú, naʻe papitaiso au ʻi ha vai-kaukauʻanga fakapuleʻanga ʻe heʻeku tangataʻeikí.

ʻI hoku taʻu 11, naʻe pau ke hiki hoku fāmilí mei Siamane Hahake. Ne mau hiki ki Felengifeeti ʻi Siamane Hihifo. Naʻá ku maʻu lotu ai ʻi he Kolo Felengifētí, ʻa ia naʻe ʻikai ke lahi tatau mo ia ʻi Suikaú. Ko e falelotu ʻi Felengifētí naʻe siʻisiʻi, pea naʻe fai ʻemau ngaahi kalasí ʻi he ngaahi loki ki lalo falé. Naʻe akoʻi kimautolu ai ʻe he kau faifekaú ki he ngaahi tefitoʻi moʻoni mahuʻinga ʻo e ongoongoleleí.

Naʻe mahuʻinga ʻaupito kiate au ha faifekau ʻe taha, ko ʻEletā Situlingihemi, ʻi heʻene ngaahi lēsoni he Mataʻi Tofe Mahuʻingá, tautautefito ʻi he konga naʻe akoʻi ai ʻa Mōsese ko e foha ia ʻo e ʻOtuá (vakai, Mōsese 1:3–4). Naʻe toe akoʻi foki au ʻe ʻEletā Situlingihemi e potufolofola ko ia ʻoku pehē, “Ka kuo kau ʻa e ʻOtuá maʻatautolu, pea ko hai ʻe angatuʻu kiate kitautolu?” (Loma 8:31). Naʻe ʻomi ʻe he potu folofolá ni kiate au ha fakafiemālie mo ha loto toʻa, he ko e taimi ko iá naʻe taʻeʻiloa ʻa e kahaʻú ʻi Siamane. Naʻe havehave ʻa e kolo ko Felengifētí ʻi hono pomu ʻo e ngaahi falé. Kuo nofo ʻa e akonaki ko iá mo au ʻi heʻeku moʻuí kotoa. Naʻá ne akoʻi au ʻoku fie maʻu ke u kau mo e ʻEikí. ʻOku ʻikai totonu ke u taʻe-kau mo e ʻEikí.

ʻOku ou fakatukupaaʻi ai kimoutolu fānau ke mou muimui he ngaahi lea ʻa e kau palōfitá. ʻI hoʻomou fai iá, te mou maʻu leva ʻa e tali ki hoʻomou ngaahi fehuʻí, ʻo tatau ai pē pe ʻokú ke taʻu 6, 9, 11, 19, pe taʻu 69 hangē ko aú!

Maʻuʻanga Fakamatalá

1. “Fie maʻu Au ʻe Sīsū Ke u Ulo Hangē ko ha Hueló,” Tohi Hiva ʻa e Fānaú, 38.

Hoko ko ha Huelo ʻo e Laʻaá maʻa Sīsū

Ko e fuofua taimi ne ʻalu ai ʻa Palesiteni ʻUkitofa ki he lotú, naʻá ne fanongo ai ʻi he foʻi hiva ko e “Huelo ʻo e Laʻaá.” Te ke lava ʻo hoko ko ha huelo ʻo e laʻaá ʻi homou fāmilí ʻaki haʻo fakahoko ha ngaahi ngāue ʻofa mo tuku ha fanga kiʻi tohi fakamālō ʻoku fakafiefiá:

1. Tā fakatatau ʻa e fōtunga ʻo e laʻaá ki ha pepa manifi, pea kosi ʻo toʻo.

2. Hiki ha hingoa ʻo ha mēmipa ʻo e fāmilí ʻi he tafaʻaki ʻe taha ʻo e foʻi laʻaá, pea toki valivali ia ʻaki e lanu fakaʻofoʻofa ʻokú ke saiʻia taha aí.

3. ʻI he tafaʻaki ʻe tahá, fai ai ha kiʻi tohi fakamālō ki he mēmipa ʻo e fāmilí ʻi ha faʻahinga meʻa naʻá ne fai maʻau.

4. Fai ha kiʻi ngāue ʻofa fakapulipuli maʻá e taha ko iá, hangē ko hano ngaahi hono mohengá pe pelupelu hono valá, pea toki tuku ai ʻa e kiʻi tohi fakafiefiá.

Kau Faifekau Makehe

Hangē ko Palesiteni ʻUkitofá, ko ha mēmipa koe ʻo e Siasí he ʻahó ni koeʻuhí he naʻe akoʻi koe ʻe ha taha makehe ʻi homou fāmilí fekauʻaki mo e ongoongoleleí. Kole ki hoʻo fineʻeikí pe tangataʻeikí ke ne talaatu pe ko hai ʻa e fuofua mēmipa ʻo e Siasí ʻi homou fāmilí, pea vakai pe te ke lava ʻo ʻilo pe ko hai naʻá ne akoʻi ʻa e ʻuluaki kau mēmipa ʻo e Siasí ʻi homou fāmilí. Fakafonu ki he lahi tahá ʻa e ngaahi tali ʻi laló:

Ko e ʻuluaki mēmipa ʻo e Siasí ʻi homau fāmilí:

Taimi naʻe kau ai ki he Siasí:

Feituʻu naʻe kau ai ki he Siasí:

Founga naʻe ʻilo ai ki he Siasí mo e anga e maʻu ʻo ʻene fakamoʻoní:

Tokotaha naʻá ne akoʻi ange ki ai ʻa e ongoongoleleí:

ʻAta mei muí: tā fakatātaaʻi ʻe Dilleen Marsh; tohi © Getty Images