ʻOkú Ke ʻOsi ʻIloʻi

Fai ʻe Elizabeth Stitt

Naʻá ku ʻilo ʻoku moʻoni ʻa e Siasí, ka ko e fē taimi naʻá ku maʻu ai ʻa e fakamoʻoni ko iá?

ʻI ha ʻaho ʻe taha ʻi he akó, ne fāifai peá ma aʻu mai mo haku kaungā ako ki he tefito ʻo e tui fakalotú. Ne kamata hoku kaungāakó ke kiʻi fakafepaki mo kamata ke ne fakaangaʻi ʻa e meʻa naʻá ku tui ki aí.

Naʻe sio hangatonu pē ki hoku matá mo pehē mai, “ ʻOkú ke tui pē koe ki ho Siasí koeʻuhí he naʻe ohi hake koe ʻe hoʻo mātuʻá ai. Ka ne ʻikai, he ʻikai ke ke tui koe ki ai.”

ʻOku ʻikai ke u manatuʻi e meʻa naʻá ku talaangé, ka naʻá ku kei fakakaukau pē ki heʻene leá mo fifili pe ko e hā naʻe lea pehē aí. Naʻe ohi hake au ʻi he Siasí, pea ko hono moʻoní, naʻe teʻeki ai ke u fehuʻia ʻa e ngaahi akonaki pe ko e ngaahi tokāteline ʻo e Siasí. Talu mei heʻeku kei siʻi, mo ʻeku ongoʻi ʻoku moʻoni ʻa e Siasí. Pea ki muʻa peá u papitaisó, naʻe lau fakataha ʻe homau fāmilí ʻa e Tohi ʻa Molomoná, pea naʻá ku ʻilo naʻe moʻoni. Naʻe ʻikai ke u tui pē; ka naʻá ku ʻiloʻi ia mo ʻikai ha toe veiveiua. Ka ʻoku ʻikai ke u fakapapauʻi ʻa e mōmēniti pau naʻá ku maʻu ai ʻa e fakamoʻoni ko iá. Naʻe uesia au ʻi ha vahaʻa taimi ʻe he meʻá ni. Naʻá ku fie maʻu ke hoko tonu mai ha taimi ke u lotu ai peá u maʻu ʻi he taimi pē ko iá ʻa e talí. Naʻe ʻikai ke teitei hoko ia.

Ka ko e meʻa ʻoku ou fakapapauʻí ko e mōmēniti naʻe fakapapauʻi ai ʻeku fakamoʻoní. Hili hoku ʻuluaki taʻu ʻi he akoʻanga māʻolungá, naʻá ku alu mo ha toʻu tupu kehe ʻo ʻaʻahi ki he ngaahi feituʻu fakahistōlia ʻo e Siasí. ʻI he ʻemau aʻu atu ki he Vaoʻakau Tapú, ne fakaafeʻi kimautolu ʻe homau takimamatá ke mau feinga ke maʻu haʻamau fakamoʻoni fakafoʻituitui ko e meʻa ne hoko aí naʻe moʻoni: naʻe hā ʻa e ʻOtua ko e Tamaí mo Sīsū Kalaisi kia Siosefa Sāmita mo kamata hono Fakafoki mai ʻo e Ongoongoleleí. Naʻá ku maʻu ha kiʻi potu lōngonoa ʻi he vaoʻakaú ʻo u lau ai a e fakamatala ʻo e ʻUluaki Mata Meʻa-hā Maí. Hili ia peá u tūʻulutui ʻo lotu. Naʻá ku ʻosi ʻilo ʻe au naʻe hoko ʻa e ʻUluaki Mata Meʻa-hā Maí pea ko Siosefa Sāmitá ko ha palōfita. Ka naʻá ku toe fehuʻi pē. Naʻe ʻosi ʻeku lotú, pea naʻe ʻikai ke hoko ha meʻa ia. Hala ha ongo mamafa, hala ha mata meʻa hā mai, hala ha kau ʻāngelo. Hala ʻatā.

Naʻá ku maʻu ha fuʻu maka peá u hekeheka ai ʻo fakaava hoku tāpuaki fakapēteliaké ʻo kamata ke lau. ʻOku hā ʻi hoku tāpuakí ʻa e Fakafoki mai ʻo e ongoongoleleí, pea naʻe toutou ongo ʻi heʻeku fakakaukaú ʻa e ngaahi lea ko ʻení: “ ʻOkú ke ʻosi ʻiloʻi. ʻOkú ke ʻosi ʻiloʻi.”

Kapau ne u lava ke toe foki ki he mōmēniti ko ia ne fakafepakiʻi ai ʻe hoku kaungāmeʻá ʻa e meʻa ʻoku ou tui ki aí, ʻoku ʻikai ke u ʻilo ʻe au pe te u fakamatalaʻi fēfē ʻa e founga ne u ʻilo ai ʻoku moʻoni ʻa e Siasí. Ka ʻoku ou fakaʻamu ne u talaange ki ai neongo naʻe akoʻi au ʻe heʻeku ongomātuʻá ʻi he ngaahi meʻa ne na ʻilo ʻoku moʻoní, naʻe pau ke u kumi ʻe au ʻiate au pē ʻa e tali ko iá. Pea naʻá ku fai ia.

Naʻe ʻikai fie maʻu ia ke u ʻalu ki he Vaoʻakau tapú ke u toki ʻilo ai ʻoku moʻoni ʻa e Siasí. Naʻe ʻikai ke u fie maʻu ha meʻa maʻongoʻonga ke u toki ʻilo ai ʻoku moʻoni ʻa e Siasí. Naʻá ku fie maʻu pē ʻe au ha fakamanatu, “ ʻOkú ke ʻosi ʻiloʻi.”