Efiafi Fakafāmili ʻi ʻApi ʻi he ʻInitanetí
ʻI heʻemau hoko ko e fāmilí ne mau fakahoko maʻu pē ʻemau efiafi fakafāmili ʻi ʻapí; neongo ia, naʻe faʻa folau ʻeku tangataʻeikí ʻi ha ngaahi vahaʻa taimi lōloa ʻi heʻene ngāué. ʻI he taimi ʻe niʻihi ʻe mavahe ai ia ʻi he taimi ʻe fakahoko ai ʻemau efiafi fakafāmili ʻi ʻapí.
Pea ʻi he taʻu ʻe ua kuo hilí, ʻi he taimi ne maʻu ai heʻeku tangataʻeikí ʻene komipiuta toʻotoʻó, ne fakakaukau ai ha taha ʻo e fānaú, “Ko e hā ʻoku ʻikai ke tau efiafi fakafāmili ai ʻi ʻapi ʻi he ʻInitanetí mo e Tangataʻeikí?”
Talu mei ai, ko e taimi pē ʻoku mamaʻo ai ʻemau tangataʻeikí he lolotonga ʻo e efiafi fakafāmili ʻi ʻapí, ʻoku mau fokotuʻu pē ha taimi pau, pea mau fetuʻutaki. Ne mau lava pē ke mamata mo fanongo ki ai, pea naʻe lava mo ia ke mamata mo fanongo mai kiate kimautolu. Kuo hanga ʻe he ʻInitanetí mo e komipiutá ʻo ʻai ʻemau tangataʻeikí ke kau ʻi heʻemau ngaahi efiafi fakafāmili ʻi ʻapí.
ʻOku ʻikai fie maʻu ia ke mau toe mavahe mei he taimi-tēpile ne ʻosi fokotuʻú: hangē ko ʻení, kapau ko e tangataʻeikí ʻoku tonu ke fai lēsoní, ʻokú ne fakahoko pē. Ko e taha e ngaahi meʻa tukufakaholo homau fāmilí ko hano vakaiʻi ʻo ʻemau ngaahi taumuʻa fakafoʻituituí ʻi he uike kotoa pē; ʻoku ʻikai toe uesia ʻeni. Pea ko ha toe meʻa mahuʻinga ʻe taha: ko ʻemau lau fakafāmili ʻo e Tohi ʻa Molomoná kuo hokohoko ʻeni, he kuo ʻikai haʻamau toe ʻuhinga ke taʻe-lau ai.
ʻOku toe fakaʻaongaʻi foki heʻeku tangataʻeikí ʻa e ʻInitanetí ke fetuʻutaki ai mo kimautolu ʻi ha ngaahi toe founga kehe. Ko e taimi ʻoku mamaʻo ai mei homau ʻapi ʻi Peluú, ʻoku fetuʻutaki mai ʻo vakai pe ko e hā ʻoku mau faí pea mo e feituʻu ʻoku mau ʻi aí. Pea ʻi he hoko ʻa e taimi ki he ʻinitaviú pe fakataha alēlea fakafāmilí, ʻoku fakahoko ʻeni ʻi he taimi naʻe ʻosi fokotuʻú, ʻo aʻu ai pē ki he taimi ʻoku folau aí.
ʻOku lahi ha ngaahi fakalakalaka fakatekinolosia lelei mo ʻaonga ʻoku ʻikai ke tau faʻa fakaʻaongaʻi lelei koeʻuhí ko haʻatau manavasiʻi ki hono fakaʻaongaʻi halaʻí pea mo e kovi te ne lava ʻo fakahoko maí. Ka neongo ia, kapau te tau fakaʻaongaʻi fakapotopoto mo anga fakatōkilalo ʻa e faʻahinga tekinolosia peheé, ʻe lava ʻo hoko ko ha tokoni lahi.
ʻOku mau ongoʻi fakafetaʻi lahi ʻi homau fāmilí koeʻuhí ko e ʻInitanetí he kuo hoko ko ha meʻangāue lelei ki hono toʻo atu ʻo e ngaahi meʻa taʻefeʻunga ne ne mei fakamāvahevaheʻi homau fāmilí.
Ne ʻeke ʻe ha taha ʻo e fānaú, “Ko e hā ʻoku ʻikai ke tau efiafi fakafāmili ai ʻi ʻapi ʻi he ʻInitanetí mo e Tangataʻeikí?”
Tā fakatātaaʻi ʻo e ʻatá ʻe David Stoker