Ko e Hā ʻa e Fakaʻofoʻofa Moʻoní?

ʻOku pehē ʻe Palesiteni Monisoni ʻi he pōpoaki ko ʻení, “ ʻI hotau kuongá, ʻi he taimi lahi, ʻoku hangē ʻoku faʻa fika ua hake ʻa e anga-maʻá ki he fakaʻofoʻofá pe manakoá.” Mahalo ʻe fefaʻuhi siʻa kau finemui mo honau ʻīmisí pe ko hai koā kinautolu mo e tuʻunga te nau malava ʻo aʻusiá. Fakakaukauʻi e ngaahi fakakaukau ko ʻeni fekauʻaki mo e fakaʻofoʻofa moʻoní meia ʻEletā Lini G. Lōpini ʻo e Kau Fitungofulú:

Ko ha finemui ʻoku malama hono fofongá ʻi he fiefiá mo e angamaʻá ʻokú ne fakahoʻata atu ʻa e fakaʻofoʻofa ʻo lotó.
Ko e malimali ʻo e angamaʻá ʻoku fakaʻofoʻofa moʻoni ia ʻi heʻene fakafōtunga atu ʻi ha founga matuʻaki fakaenatula. ʻOku ʻikai lava ke tāvalivaliʻi ʻa e faʻahinga fakaʻofoʻofa ia ko ʻení ka ko ha meʻafoaki ia ʻo e Laumālié.
Ko e teunga molumalú ko ha fakaʻilonga ia ki tuʻa mo ha meʻa pau ʻoku fie maʻu ki he fakaʻofoʻofa ʻo lotó.
Kapau ʻokú ke taʻe-fiemālie ʻi ho fōtungá, ʻe tokoni kapau te ke vakai kiate koe ʻi he fofonga ʻo kinautolu ʻoku nau ʻofa ʻiate koé. ʻE lava ke hoko ʻa e fakaʻofoʻofa ʻoku ʻiloʻi ʻe kinautolu ʻoku ʻofa ʻiate kitá ʻa ia ʻoku ʻikai eʻa ki tuʻá ko ha meʻa ke ʻā ai e matá ʻo sio ki he ngaahi meʻa ʻe lava ke fakalakalaka ai ki muʻá.
Ko e faʻahinga tangata foki ʻoku fie maʻu ʻe ha fefine angamaʻa ke mali mo iá ʻoku “ ʻikai mamata” ʻo hangē ko e mamata ʻa e tangata fakaekakanó (vakai, 1 Samuela 16:7). ʻE tohoakiʻi ia ʻe he fakaʻofoʻofa moʻoni ʻoku malama mei ha loto maʻa mo fiefia. ʻOku toe hoko pehē foki ki ha finemui ʻoku fekumi ki ha talavou angamaʻá.
ʻOku ʻamanaki ʻa ʻetau Tamai Hēvaní ʻe fakahoko ʻe he ʻEne fānaú kotoa ʻa e fili ʻoku totonú, ʻa ia ko e founga pē ia ʻe taha ki he fiefia ʻoku tolongá mo e fakaʻofoʻofa ʻi lotó.
ʻI he ʻEikí, ʻoku ʻikai ha feʻauʻauhi ia. ʻOku maʻu ʻe he taha kotoa ʻa e faingamālie tatau ke tongitongi Hono ʻīmisí ʻi honau fofongá (vakai, ʻAlamā 5:19). ʻOku ʻikai ha toe fakaʻofoʻofa ia ʻe laka ai.

Ke lau kakato ʻa e pōpoakí, vakai, Lynn G. Robbins, “True Beauty,” New Era, Nov. 2008, 30. ʻE lava ʻa e kau talavoú ʻo maʻu ʻa e faleʻi meimei tatau pē ʻi he Errol S. Phippen, “Pato Palakū pe Suani Fakaʻeiʻeikí? Ko e Meʻa Pē Ia ʻa ʻAu,” Liahona, ʻOkatopa 2009, 36.