Kae ʻOua Ke Tau Toe Feʻiloaki
Faingataʻa ʻIkai Pulí
Naʻe tokoni ha kiʻi hone mo ha heka pasi ke u ʻilo ai ʻoku ʻi ai ha founga ke hao ai mei he palopalemá—ka ko e taimi lahi kuo pau ke tau falala ki ha taha ʻoku lava ʻo sio.
Lolotonga haʻaku heka pasi ʻi ha pongipongi ʻe taha ki he ngāué, ne u tangutu ofi he matapā sioʻatá. Naʻe ʻikai fuoloa kuó u fakatokangaʻi ha kiʻi hone ʻoku feinga ke hao mei ha tūkunga faingataʻa. Naʻe ʻefihia ʻi he vahaʻa ʻo e ongo laʻi sioʻata ʻo e matapā sioʻatá, pea neongo ʻene feinga mālohí, naʻe ʻikai ke lava ia ʻo hao ki tuʻa. Kuo maʻu pōpula ia ʻi ha pilīsone ʻoku ʻasi mahino, ʻoku lava pē ʻo sio ki he tauʻatāiná ka naʻe ʻikai ke ne maʻu ha hala ke hao ai. Mahalo naʻe ilifia, he naʻe kapatā mālohi mo taʻetuku hono ongo kiʻi kapakaú mo tuiʻi ʻa e sioʻatá.
Ko ha taha au naʻe ʻikai ke u teitei saiʻia ʻi ha taha pe faʻahinga meʻa ʻoku mamahi. Ko ia, ʻi he hili ʻeku siofi ʻa e kiʻi honé ʻi ha taimi lahi, ne u kamata feinga leva ke fakahaofi ia mei hono faingataʻaʻiá. Ka ʻi he ʻikai ke falala mai mo ʻikai ke mahino ki ai ʻeku feinga ke tokoní, naʻe ʻikai ke ne fakaʻaongaʻi ʻa e tokoni naʻá ku faí. Ko hono moʻoní, ko e meʻa pē naʻá ne faí ko hono tuiʻi ʻa e matapā sioʻatá. Fāifai pea kamata ke u kiʻi ʻita.
Ka ne u toe kamata ke fakakaukau ki he founga ʻoku faʻa tō ai ʻa e kakaí ki ha ngaahi tūkunga meimei peheni. ʻOku tau tō ki ha ngaahi faingataʻa—ko e niʻihi ai ʻoku ʻikai ko haʻatau fakatupu. ʻOku tau toe fakahoko foki mo ha ngaahi fehālaaki, ʻo aʻu ki ha ngaahi fehālaaki lalahi. Kae hangē ko e kiʻi honé, ʻe lava ke tau ongoʻi kuo fakapōpulaʻi kitautolu ʻe he ngaahi faingataʻa ko ʻení. Meʻapango, he neongo ʻoku ʻafioʻi ʻe he ʻEikí ʻa e meʻa ʻoku tau fie maʻu ke hao ai mei hotau ngaahi faingataʻaʻiá, ko e taimi lahi ʻoku ʻikai ke tau tafoki kiate Ia—pe kiate kinautolu naʻá Ne fili ke taki kitautolú—ke maʻu ha tokoni ʻi he taimi ʻo ʻetau faingataʻaʻiá. ʻOku ʻikai ke tau tokanga ki he fanafana ʻa e Laumālié pea tau feinga ke fehangahangai mo hotau ngaahi faingataʻaʻiá ʻiate kitautolu pē, kae ʻikai falala kiate kinautolu ʻoku nau sio lelei angé.
ʻI heʻetau hoko ko e Kāingalotu ʻo e Ngaahi ʻAho Kimui Ní, ʻoku tau ʻiloʻi lelei ʻa e founga ke ikunaʻi ai ʻa e faingataʻá: ʻoku tau maʻu ʻa e folofolá, lotú mo e feohi ʻo e Laumālie Māʻoniʻoní. Kuo ʻosi ui hotau kau takí ʻe he ʻEikí pea ʻoku nau mateuteu ke tokoni.
Ki muʻa peá u aʻu ki hoku hifoʻangá pea hili e faingataʻaʻia lahi ʻa e kiʻi honé, ne fāifai pea hao mei hono tūkunga faingataʻaʻiá. Naʻá ku ako mei ai te tau lava mo kitautolu ke ikunaʻi hotau ngaahi faingataʻaʻiá—ka ʻe siʻi ange ʻetau faingataʻaʻiá kapau te tau tafoki mo falala ki he Tamai Hēvaní mo Hono ʻAlo ko Sīsū Kalaisí, ʻa ē ʻoku ʻikai puli ki ai ʻa e ngaahi faingataʻa kotoa peé.
Tā fakatātaaʻi ʻe Jorge Cocco