Ngaahi ʻAta ʻi he Holisí
“ ʻOua ʻe manavahē, ʻe fānau iiki, he ʻoku ʻaʻaku ʻa kimoutolu, pea kuó u ikunaʻi ʻa e māmaní” (T&F 50:41).
Ne kaila ʻa Tesalei, “Fineʻeiki! Kuó u ilifia au!”
Ne ʻasi mai ʻa e Fineʻeikí he matapā ʻo Tesaleá ʻo fakaulo ʻa e maama ʻo e loki mohé. Ne hilehila atu ʻa Tesalei ki he tuliki ne ʻasi ai ʻa e ngaahi ʻatá. ʻOku halaʻatā ha meʻa ia ai.
Ne pehē ange ʻa Tesalei, “Pehē ʻe au ne u sio ki ha ulofi ʻi he tuliki ko ʻeé.”
Ne ʻōʻōfaki leva ʻe he Fineʻeikí ʻa Tesalei, ʻo ʻai ke ne ongoʻi māfana mo malu. Pehē ange leva ʻa e Fineʻeikí, “Ko e taimi ʻoku ulo ai ʻa e māmá, ʻokú ta lava ʻo sio ʻoku halaʻatā ha meʻa ia ai.”
ʻI he taimi ne ongoʻi nonga ange ai ʻa Tesaleá, ne tamateʻi leva ʻe he Fineʻeikí ʻa e māmá pea foki ki hono mohengá. Ne kuikui ʻa Tesalei ʻo feinga ke mohe. Fāifai pea kiʻi ʻāʻā hake hono mata pē taha ʻo sio ki he holisí. ʻOku kei ʻi ai pē ngaahi ʻatá ia.
Ne toe kaila leva, “Fineʻeiki!”
ʻI he taimi ko ʻení, naʻe ʻikai toe malimali ʻa e Fineʻeikí ʻi heʻene fakaulo ʻa e māmá. Naʻe fotu ongosia. Ne ne ʻeke ange leva, “Tesalei, ʻokú ke manatuʻi e meʻa naʻá ke sio ai ʻi he televīsoné ʻanenaí?”
Ne kamo pē ʻa Tesalei. Ne sio ia ʻi ha polokalama fekauʻaki mo e fanga ulofí.
Ne tangutu hifo leva ʻa e Fineʻeikí he mohenga ʻo Tesaleá. “Ko e meʻa ʻoku tau sio aí te ne lava ke uesia moʻoni kitautolu—ʻa ʻetau fakakaukaú, ʻetau ngaahi tōʻongá, pea naʻa mo ʻetau ngaahi ongó.”
Pehē ange ʻa Tesalei, “Ka ko e faiva naʻá ku sio ai fekauʻaki mo e fanga ulofí naʻe ʻikai ke kovi.”
Fakamatala ange leva ʻe he Fineʻeikí, “Ko e meʻa ʻoku tau sio ai he televīsoné te ne lava ke uesia ʻetau fakakaukaú, neongo kapau ʻoku ʻikai ko ha polokalama ʻoku kovi. ʻOku ou tui ko e meʻa ne ke sio ai he pōní ʻoku ʻi ai ʻene kaunga ki he meʻa ʻokú ke ongoʻí.”
Ne kiʻi fakakaukau ʻa Tesalei ki he meʻa ne lea ʻaki ʻe he Fineʻeikí. Naʻe teʻeki ai ke ne fakatokangaʻi hano uesia ia ʻe he meʻa naʻe sio ai ki muʻá.
Pehē ange leva ʻa Tesalei, “Masiʻi, kuo pau ke u toe tokanga ange ʻi hono fili ʻo e meʻa ke u sio aí.”
Ne malimali ʻa e Fineʻeikí. “Ko ha fakakaukau lelei ia, Tesalei.”
“Kae fēfē ʻa e pooni? ʻOku ou kei ongoʻi ilifia pē au.”
Ne pehē ange leva e Fineʻeikí, “ ʻOku ʻi ai ʻeku fakakaukau.” Naʻá ne toʻo mai leva ha tā ʻo Sīsū Kalaisi mei he tesi ʻo Tesaleí ʻo toʻo mei hono ʻesia papá. Naʻá ne fakapipiki fakalelei leva ia ki he holisi naʻe sio ai ʻa Tesalei ki he ngaahi ʻata fakailifiá. “ ʻE ʻi ai maʻu pē Ia ke tokoni atu, Tesalei. Manatuʻi ia ʻi he taimi ʻokú ke ilifia aí.”
ʻI he taimi naʻe tāmateʻi ai ʻe he Fineʻeikí ʻa e māmá, ne fonu e loto ʻo Tesaleá ʻe ha ongoʻi māfana. Naʻá ne ʻilo ko e meʻa ne lea ʻaki ʻe he Fineʻeikí naʻe moʻoni. ʻE tokangaʻi, tokoniʻi pea mo fakanonga maʻu pē ʻene ilifiá ʻe Sīsū.
Tā fakatātaaʻi ʻe Sam Nielson; konga naʻe toʻo mei he Ko Kalaisi mo e Talavou Koloaʻiá, tā ʻe Heinrich Hofmann, ʻi he angalelei ʻa e C. Harrison Conroy Co.