Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni ʻe niʻihi.
“Langa ʻi he funga Maká,” p. 12: Hili hono vahevahe ʻo e fakamatalá, fakakaukau ke aleaʻi ʻa e ʻuhinga ʻo e “ko e Siasi ko ʻení ʻoku langa ia ʻi he funga maka ʻo Kalaisí, ʻi he ngaahi tefitoʻi moʻoni ʻo e maʻu fakahā fakaonopōní.” Fekumi ki ha ngaahi fakatātā mei he konifelenisi lahí ʻo e hokohoko atu ʻo e maʻu fakahaá.
“Ko e Ngaahi Meʻa ʻo Hangē ko Honau Angamoʻoní,” p. 22: Fakakaukau ke lau ʻa e fakamatalá kimuʻa pea filifili ʻi he faʻa lotu ʻa e ngaahi konga ʻoku fekauʻaki mo e ngaahi fie maʻu ʻa ho fāmilí. ʻE lava pē ke ke ngāue ʻaki ʻa e fakamatalá ni ki ha lēsoni efiafi fakafāmili ʻi ʻapi ʻe ua.
“Ko Ho Misiona he Moʻuí ko e Taimí ni,” p. 42: Kole ki ha mēmipa ʻi he fāmilí ke ne fakamatalaʻi ʻa e ʻuhinga ʻo e fetaulakiʻangá. Fakakaukau ke lau ʻa e konga ʻi he fakamatalá “Ko ha Misiona ʻi he ʻAho Kotoa Pē.” Kole leva ki he kau mēmipa ʻi he fāmilí ke nau vahevahe ha meʻa naʻa nau aʻusia ʻa ia ne nau vakai, pe ko ha vakai ʻa ha niʻihi kehe, ki ha fie maʻu tokoni pea naʻa nau lava ʻo tokoni.
“Ke Fakakāinga pe ʻIkai Fakakāinga,” p. 50: Hili hono vahevahe ʻo e talanoa ko ʻení mo ho fāmilí, fakamamafaʻi ʻa e kupuʻi lea, “ ʻOku ʻikai faingataʻa ʻa e fili pe te u fakakāingá koeʻuhí he kuó u ʻosi fai ʻa e fili ko iá.” Fakakaukau ke aleaʻi ʻa e fehuʻí, ʻE lava fēfē ke hanga ʻe he fakapapauʻi kimuʻa ʻa hono fai ʻo ha meʻá ʻo fakafaingofuaʻi ʻa e fai ʻo e meʻa ʻoku totonú?
Langa ʻo ha Vaka
Kuó u ako pea tanganeʻia ʻi he ngaahi meʻa naʻe aʻusia ʻe he palōfita ko Nīfaí, tautautefito ki he vilitakí mo e mapuleʻi kitá ʻa ia naʻá ne foʻu ʻaki ʻa e vaká. Kuó u maʻu ha loto houngaʻia ʻi he taumuʻa poto ʻa e ʻEikí ke Ne fekauʻi ia ke fai ʻa e ngāué.
ʻI he taimi naʻe ʻaʻahi mai ai ʻa Palesiteni Kōtoni B. Hingikelī (1910–2008) ki Kuatemala ʻi he 1997, ko ʻene akonaki faingofua naʻe tō mamafa ki hoku lotó ko ʻene fakalotolahi ke fakahoko ʻa e efiafi fakafāmili ʻi ʻapí. ʻI hono ueʻi kimautolu ʻe he ngaahi lea ʻa hotau palōfitá, naʻá ku fakataha mo hoku uaifí mo ʻema fānau ʻe toko faá ʻo fokotuʻu ha taumuʻa ke mau “langa ha vaka ʻoku ui ko e efiafi fakafāmili ʻi ʻapí.” Naʻa mau ʻiloʻi ʻa e ngāue naʻe fie maʻu ki aí ka naʻa mau ʻiloʻi naʻe ʻi ai ha taumuʻa poto ʻa e ʻEikí ʻi hono kole mai kiate kimautolu ke fai iá.
Hili ha ngaahi taʻu mo ha ngaahi efiafi fakafāmili ʻe laungeau, kuo tupulaki homau vaka efiafi fakafāmili ʻi ʻapí fakataha mo homau fāmilí. Pea kuo mau aʻusia ʻa e ngaahi meʻa naʻe talaʻofa ʻe Palesiteni Hingikelií. Mei he fanga kiʻi fakataha ko ʻení—ʻa ia ʻoku fakahoko maʻu pē ʻi he vilitakí—kuo hoko ai ha meʻa fakaofo. Kuo tupulaki ʻa e ʻofa ki he ongomātuʻá. Kuo tupulaki ʻa e feʻofaʻaki ʻi he tuongaʻané mo e tuofefiné. Pea toe lahi ange ʻemau ʻofa ki he Tamai Hēvaní mo e Fakamoʻuí. Kuo haʻu ki homau lotó ʻa e houngaʻia ʻi he ngaahi meʻa ʻoku mahinongofua mo leleí. (Vakai Gordon B. Hinckley, “Some Lessons I Learned as a Boy,” Ensign, May 1993, 54.)
Loni Saula Kāsia Menitesi, Kuatemala