Fakatatau mo e Lea ʻa e Kau Taki ʻo e Siasí
Vahehongofulú—ko ha Fekau ʻo Kau ai ʻa e Masivá
Mei ha lea ʻi he konifelenisi lahi ʻo ʻEpeleli 2005.
ʻI ʻOkatopa ʻo e 1998 ne fakamamahiʻi ai ʻe he Afā ko Misí (Mitch) ha ngaahi konga lahi ʻo ʻAmelika Lotoloto. Naʻe hohaʻa lahi ʻaupito ʻa Palesiteni Kōtoni B. Hingikelī (1910–2008) ki he kau faingataʻaʻia he fakatamakí ni, he ko e tokolahi ʻo kinautolu naʻe mole ʻenau meʻa kotoa pē—ʻa e meʻakai, vala, mo e ngaahi nāunau falé. Naʻá ne ʻaʻahi ai ki he Kāingalotu ʻi he ngaahi kolo lalahi ʻo Seni Petelō Sula mo Tekusikalapa ʻi Honitula; mo Manākuā ʻi Nikalākuā. Pea hangē ko e ngaahi lea ʻa e palōfita ʻofeina ko ʻIlaisiaá ki he uitou fiekaiá, naʻe faitatau pehē ʻa e pōpoaki ʻa e palōfita fakaonopooni ko ʻení ki he koló takitaha—ke feilaulau mo talangofua ki he fono ʻo e vahehongofulú.
Ka ʻoku anga fēfē haʻatau lava ʻo kole ki ha taha masiva ke feilaulau? Naʻe meaʻi ʻe Palesiteni Hingikelī ʻe tokoni ʻa e ngaahi uta meʻatokoni mo e vala te nau maʻú ke nau moʻui ʻi he faingataʻaʻiá ni, ka naʻe mahulu atu ʻene ʻofa mo ʻene tokangá kiate kinautolu. Neongo hono mahuʻinga ʻo e tokoni ʻofa fakaetangatá, naʻá ne meaʻi ko e tokoni mahuʻinga tahá ʻoku haʻu ia mei he ʻOtuá, kae ʻikai mei he tangatá. Naʻe loto ʻa e palōfitá ke tokoniʻi kinautolu ke nau fakaava ʻa e ngaahi matapā ʻo e langí ʻo hangē ko e talaʻofa ʻa e ʻEikí he tohi ʻa Malakaí (vakai, Malakai 3:10; Mōsaia 2:24).
Naʻe akoʻi kinautolu ʻe Palesiteni Hingikelī kapau te nau totongi ʻenau vahehongofulú, ʻe ʻi ai maʻu pē ha meʻakai ʻi heʻenau tēpilé, ʻe ʻi ai maʻu pē haʻanau vala, pea ʻe ʻi ai maʻu pē ha fale ke nau malu ki ai.
Naʻe ʻaʻahi ʻa Palesiteni Kōtoni B. Hingikelī ki he kāingalotu ʻo e Siasí ʻi Honitula ʻi he hili ʻo e afā ʻi he 1998.