Naʻá ku Fili ke ʻOua Te u Inu
Tositeni Koniki, Siamane
Lolotonga haʻaku fononga ki ha konifelenisi ʻa e toʻu tupú ʻi Situtikaati ʻi Siamane, ne u maʻu ai ha faingamālie ke talanoa mo ha fefine toulekeleka fekauʻaki mo e temipalé pea fekauʻaki mo ʻeku tui ki he ongoongolelei kuo toe fakafoki maí. Naʻe maheni mo e Siasí pea lahi mo ʻene ʻilo ki ha niʻihi ʻo e ngaahi tokāteline ʻo e ongoongoleleí.
Ka ʻi he lolotonga ʻo ʻema talanoá, ne fai ʻe he fefiné he lea naʻá ku loto mamahi ai. Ko e taimi naʻe fakafeʻiloaki ange ai ʻa e Siasí kiate ia ʻi he meimei taʻu nai ʻe 40 ki muʻá ʻe hano kaungāmeʻa Siasi, naʻe ʻi ai ha meʻa naʻe lea ʻaki ʻe hono kaungāmeʻá ʻokú ne kei manatuʻi pē. Ne talaange ʻe hono kaungāmeʻá, “ ʻOku ʻikai fakangofua au ke u inu.” Pea talamai leva ʻe he fefiné ʻokú ne ʻilo ha Kāingalotu tokosiʻi ʻoku nau inu “ʻi ha ngaahi taimi ʻe niʻihi.”
Kehe mei he fakakaukau ʻa e fefiné ni, ʻoku ʻikai fakamālohiʻi ʻa e ongoongoleleí ia ki ha taha. ʻOku tau taki taha maʻu kotoa pē ʻa e totonu ke fai ʻetau filí. Naʻe ʻomi ʻe he Tamai Hēvaní kiate kitautolu ʻa e Lea ʻo e Potó ke tokoni ke tau tauhi hotau sinó ke māʻoniʻoni, ka kuo pau ke tau taki taha fili pe te tau moʻui ʻaki ʻa ʻEne fono ki he moʻui leleí he naʻá Ne toe foaki mai foki mo ʻetau tauʻatāina ke filí.
Naʻá ku fakakaukau ʻi he ngaahi taʻu lahi kuo hilí ʻi hoku papitaisó te u muimui ʻia Sīsū Kalaisi. ʻI he ʻuhinga ko iá, ʻoku ʻikai ke u inu ʻolokaholo ai. Ko e ngaahi fekau ʻa e ʻOtuá ko ha ngaahi meʻaʻofa ia kiate kitautolu, pea kapau te tau tauhi ia, te nau taki fakafoki atu kitautolu kiate Ia.
Mei he kiʻi meʻa ko ʻeni ne hokó, naʻe fakamanatu mai ai kiate au ko ʻete hoko ko e mēmipa ʻo e Siasi ʻo e ʻEikí, ʻoku tau hoko maʻu pē ko ha faʻifaʻitakiʻanga ki he kakai kehé. Ka, ʻoku tau fili pe ko e hā ʻa e faʻahinga faʻifaʻitakiʻanga ko iá.