Ako fekauʻaki mo e Ongoongoleleí

Neteti T. Lapaua, Kilipati

ʻI heʻeku kei siʻí naʻe ohi hake au ʻe ha mātuʻa lelei mo fakaʻofoʻofa ʻi ha ʻapi masiva fakataha mo ha fānaú ʻe toko fā. Naʻe ʻofa ʻemau mātuʻá ʻiate kimautolu, pea naʻa mau ʻofa foki ʻiate kinaua. Naʻá na fie maʻu ʻa e lelei tahá maʻamautolu, neongo naʻe ʻikai ke na lava ʻo maʻu ʻa e meʻa kotoa naʻa mau fie maʻú. Naʻá na ngāue mālohi koeʻuhí ke mau fiefia.

ʻI heʻeku lahi haké, naʻá ku mavahe leva ke hū ki ha akoʻanga ʻa e Siasí ʻi hoku fonuá, ʻi Kilipati. Naʻe akonakiʻi au ʻe heʻeku tangataʻeikí ke u ako lelei koeʻuhí ke u lava ʻo maʻu ha ngāue lelei ke tokoni ʻi hono tauhi hoku fāmilí. Hili ha taimi nounou ʻeku hū ki he akoʻanga ʻa e Siasí, naʻá ku papitaiso leva.

Ko e taha ʻo e ngaahi ʻuluaki meʻa ne u fakahoko ʻi heʻeku hoko ko e mēmipa ʻo e Siasí ko hono lau ʻo e Tohi ʻa Molomoná. Naʻe tokoni ʻeku laú ke fakamālohia ai ʻeku fakamoʻoni ki he Palōfita ko Siosefa Sāmitá. Naʻá ku ʻilo kapau ko e Tohi ʻa Molomoná ko e folofola ia ʻa e ʻOtuá, pea ta ko Siosefa Sāmitá ko ha palōfita moʻoni ia ʻa e ʻOtuá pea ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e Siasi moʻoni ia he funga ʻo e māmaní. Naʻá ku vahevahe ʻeku tuí mo hoku fāmilí, pea ne ʻosi mei ai ha ngaahi taʻu siʻi kuo papi ʻeku fineʻeikí, mo hoku tuongaʻane pea mo haku tokoua.

Kuo liliu ʻe he ongoongolelei ʻo Sīsū Kalaisí ʻeku moʻuí mo ʻomi kiate au ha holi ke ngāue maʻá e ʻOtuá mo tokoniʻi kinautolu ʻoku ʻikai kau ki heʻetau tui fakalotú. ʻOku ou fakamālō ʻi heʻeku maʻu ʻa e faingamālie ke ngāue fakafaifekaú mo ngāue ke ʻomi ʻa e ngaahi laumālié ki he ʻOtuá.