Seia Tatou Toe Feiloai
Fausia i luga o se Faavae Mautu
E mafai ona le maluelue se molimau.
O loo taoto i tuaoi o Louisville, Kentucky e le mamao ese mai le eria tele o le Vaitafe o Ohaio se tamai nuu, ua taua o Anchorage. Sa avea muamua o se nuu faifaatoaga lea na amata ai e se kapeteni o se vaa o le vaitafe lana malaga mulimuli, ua avea ma nofoaga o aiga o le tele o faatuatuaga eseese.
O iina i le lotu, ma le aiga, ma a o mafaufau atu i le lalolagi matagofie i lalo o laau o le sukamolo, aruna, moapila, ifi, ma uilo, sa ou aoao ai e uiga i se tasi o faavae o le faaKerisiano: na afio mai Iesu o le matai aoao, ma aoaoina i tatou i auala o le lelei ma le amiosa’o.
O ni tagata lelei ou matua, ma e faamaoni i le la lotu. Sa la aoaoina au ina ia avea ma se tagata lelei ma e i ai nisi o mea e lelei, e pei o le agalelei atu i isi, ma nisi mea e le lelei, e pei o le gaoi. I se isi itu, sa la aoao mai foi faapea o le mea e talitonu le tasi tagata e moni e tutusa lava ma le mea o loo manatu le isi tagata e moni, e tusa lava pe eseese na talitonuga i ala e faavae ai. O lenei la filosofia, e pei ona ou malamalama ai, e leai ni mataupu faavae moni e faavavau mo tagata uma, na o ni vaaiga faaletagata e i ai le aia tatau ma matafaioi a tagata atamamai e fuafuaina ai pe moni mo i latou lava.
Ona o na talitonuga autu o faatatauga o aoaoga, o lea sa faigata ai lava ona ou talitonu i mea na aoaoina ai au e faifeautalai Mamona e uiga i le manaomia o le Togiola, pule o le perisitua, ma perofeta. E moni, o lau malaga i le liua e ono tausaga o le luitauina e le aunoa ma fesili po o ai au, o a mea sa ou talitonu ai, ma pe i ai moni lava, se Atua o le na faavaeina ia mataupu faavae faavavau o le upumoni ma le sese, agasala ma taunuuga.
O se mea e faagaeetia ai, sa ou maua se faamautinoaga faaleagaga, ae e lei oo mai vagana ai ua lava lo’u lotomaulalo e taliaina ai. Na muamua oo mai se molimau o le papatisoga, ona oo mai lea o le Tusi a Mamona, sosoo ai ma Iosefa Samita o se perofeta moni. Na mulimuli mai ni molimau faaopoopo, o lea mataupu ma lea mataupu, e tusa ai ma perofeta ma aposetolo o le taimi nei.
Na iu lava, ina sa i ai se taimi i lou olaga na ou le talitonu ai e moni le talalelei—sa ou iloaina. O le taunuuga o le tele o nai molimau iti na fausia ai se faavae ma faamautu ai lou faatuatua, o se puipuiga mautu mai luitau e motusia ai se molimau.
O la tatou aia paia le sailia o ni tali mai le Alii. Ma e tatau ona tatou tumau i le tausiaina faaleagaga o i tatou lava i aso uma ina ia tumau malosi ai a tatou molimau. Ae ou te iloa foi i le faatulagaga a le Alii, e le o se tulaga lelei le faaauau pea ona fesiligia ia mataupu faavae e faatatau i mea na tatou mauaina o se molimau. E moni, e ono taitaiina atu ai i le liliuese.
Ou te le o toe tauivi ma le faatatauga o aoaoga i le taimi o lou talavou. Ou te iloa pe a saunoa mai le perofeta, o ana upu e a le Atua ia. Pe a tulai mai se faafitauli e luitau ai lau molimau, ou te faalagolago i le molimau ua uma ona ou maua, ona ou faia lea o le mea sili ou te ola ai. O le auala lena i le filemu; o le auala lena i le fiafia.