O Le Misiona o le Olaga a se Tina Alofa

Saunia e Peiholani Kauvaka

A o o’u tuputupu ae i Toga, sa masani lava ona fesoasoani lo’u tina e faiaoga i le seminare. Mai le taimi na 5 ai ou tausaga seia oo i lo’u 10 tausaga, sa masani lava ona ia fafaguina a’u a o le’i faia le seminare ma taitai atu a’u i le fale sa faia ai le vasega. E ui ina sa le atoa se kuata maila (0.4 km) e savali atu ai i le auala e ui atu i le toga kuava, ae na te fesili mai ia te au, “O e fefe?” Ou te tali atu ma le lototele, “Leai.”

Ona ia fai mai lea, “E i ai se aso e tatau ai ona e lototele ma auauna atu i lou Tama Faalelagi. Ua Ia sauniaina mea uma mo i tatou, e oo lava i se fuafuaga ina ia mafai ona tatou toe foi atu ma mau faatasi ma Ia. E i ai se aso o le a e alu ai i se misiona ma auauna atu ia te Ia ma lou loto atoa, mafaufau atoa, manatu atoa, ma le malosi atoa. E ao ona e amata tapena i le taimi nei e avea o se faifeautalai lelei.”

Na iu ina ave e ou matua lo matou aiga i Ontario, Kalefoni, ISA. Sa i ai lo’u tina i se atunuu sa le masani ai, sa le mafai ona tautala i le gagana ma sa faateia foi i tu ma aga. E pei o le matuamoa o loo ofoofotai ana tamatamaimoa i lalo o ona apaau, e na te ofoofotai ai i matou uma o lana fanau ma faapau i ona tulivae, ma aioi atu i le Tama Faalelagi ina ia leai se tasi o le fanau na Ia tuuina mai ia te ia e alu ese mai Le Ekalesia a Iesu Keriso o le Au Paia o Aso e Gata Ai. Sa faaaoga e o’u matua ia tatalo faaleaiga, faitauina o tusitusiga paia i aso uma, anapogi faaleaiga e faia soo, afiafi faaleaiga faalevaiaso, ma sauniga o le Ekalesia e saili ai le fesoasoaniga a le Tama Faalelagi e faamalosia ai lo matou aiga.

Sa fautuaina i matou e o’u matua a o matou laiti ia matou amio e pei o ni faifeautalai. Sa masani lava ona matou ofuina ni ofutino papae i le lotu ma oti o matou ulu e pei o ni faifeautalai. I le avea ai ma se ositaulaga ou te faamanuiaina ai le faamanatuga, ae tapena ma tufa e o’u uso laiti le faamanatuga o ni aoao ma ni tiakono. Sa ou iloa atu lo’u tina ma lo’u tama o vaavaai mai ia i matou, ma faamautinoa e faamaeaina ma le faamaoni o matou tiute.

Ae ou te le’i alu i la’u misiona, sa fai mai lo’u tina, “Fai lau vaega, ma o le a fai foi la’u vaega. O le a ou anapogi ma tatalo ina ia e maua ni tagata e aoao.” Sa faaauau pea ona ia anapogi ma tatalo mo ana fanau tama uma e toafa i le taimi o a latou misiona. Sa matou auauna uma ma le faamaoni ma toe foi mai i le aiga ma le mamalu.

I le taimi o la’u asiasiga mulimuli ia te ia a o le’i maliu, sa fai mai lo’u tina, “Peiholani, ua uma ona ou aoaoina oe i mea uma ou te iloa e sili ona taua i lenei olaga ma le olaga a sau. O lena mea, e moni le talalelei a Iesu Keriso. O le toto togiola o Iesu Keriso o se faaolataga lea i lou agaga. Ia e faamamalu i feagaiga na e osia ma le Alii i le malumalu. A e faia lenei mea, o le a toe faatasia ai lo tatou aiga. Ua ou iloa lenei mea e aunoa ma se masalosalo aua o loo soifua le Tama Faalelagi ma Iesu Keriso.”

Na fausia la’u molimau i le talalelei, i upu uma na fai mai ai lo’u tina ma lo’u tama. Ou te iloa o le a toe faatasia lo matou aiga i se aso aua na faataunuu e o’u matua le la misiona o le aoao o i matou i le talalelei ma taitai atu i matou i le Faaola.

Luga: O Mose, o le tamā o le tusitala, lona tina o Lavinia, ma lona tei i le lotoa o le Malumalu o Los Angeles Kalefonia i le 1999.

Ata mai faaaloaloga a Peiholani Kauvaka