E Ala i Mea Faatauvaa
Sa ou manatu o loo lelei lava a’u taumafaiga. Ua maea la’u misiona, faauu mai i le kolisi, maua se galuega tumau, ma mulimuli ane na ou see atu ai i so’u lava fale mautotogi. Sa ou auai i le lotu i Aso Sa uma ae o nisi o taimi ou te alu ai i gaoioiga. Sa toatele au uo, nofofua ma e ua faaipoipoina, ma sa te’i lava ua tele ou taimi ou te faitau ai, o se mea lea sa sili ona ou fiafia e fai ao o’u laitiiti. Ae e ui lava i le tele o nei gaoioiga, ae sa ou lagona lava le le mautonu.
I le Alema mataupu e 37, tatou te faitau ai i le fautuaga a Alema i lona atalii o Helamana. I fuaiupu e 41–42, o loo talanoa mai ai Alema e uiga i le aiga o Liae ma le Liahona. Na ia faamatala mai sa le’i galue le Liahona ona “sa paie i latou, ma ua galo ia te i latou e faaaoga lo latou faatuatua ma le filifiliga” ma ua “le alualu i luma foi i latou i la latou malaga; o le mea lea na faatuai ai i latou i le vao, ma ua le malaga i le ala sa’o.” O le faitauina o nei fuaiupu na fesoasoani lea ou te iloa ai sa ou le alualu i luma. Sa ou le faaaogaina lo’u faatuatua pe filiga i soo se mea i lo’u olaga. Sa ou le toe galue agai i se sini. Sa na o lo’u faatalitali lava mo se mea e tupu.
E le’i i ai se taimi faapitoa se tasi na ou faia ai se lisi ma tusi i lalo mea uma na manaomia ou te suia. Nai lo lena, na auauai mai na suiga. Muamua, na amata ona ou alapo ou te alu e momo’e pe fai nisi ituaiga o faamalositino. Na sosoo ai, ma le amata ona ou vaavaai i polokalama o aoga lea e ono mafai ona fesoasoani i lo’u alualu i luma i la’u galuega pe mafai ai foi ona ou maua se isi galuega e ese mai ai. Sa ou maua se polokalama ona faaalu lea o lo’u taimi e tapena ai e fai ni suega e manaomia e talosaga ai. Sa amata ona taua ia te au le suesue i tusitusiga paia ma le tatalo, ma sa ou taumafai e faaalu se taimi i aso uma e fiafia ai i afioga a Keriso ma saili ia lagona le Agaga. Sa ou faia se taumafaiga faapitoa ina ia ou aafia atili i la’u uarota—tusa lava pe ositaulagaina ai nisi o taimi mo au lava ia.
Talu ona ou amata faia nei suiga laiti, ua sili atu le fiafia ua ou lagonaina. Sa ou lagona ua ou alualu i luma ma ua tuu mai e le Tama Faalelagi ia te au ni luitau fou. E mafai ona ou faafetauia na luitau ma le faamoemoe nai lo le fefe po o le lotovaivai. Ua ou aoaoina afai e taofi lo tatou galulue po o le faaaogaina o lo tatou faatuatua ma agai atu i se auala, o le a le mafai ona fesoasoani le Tama Faalelagi ina ia tatou alualu i luma, ma o le a le mafai foi ona tatou oo atu i lo tatou taunuuga. Ou te matua faafetai mo suiga laiti i lo’u olaga lea na fesoasoani ou te iloa ai le ala i luma atu.