Aumaia o le Peraimeri i le Fale
O Le Malumalu o Le Maota o le Atua
“O sauniga paia ma feagaiga e maua i malumalu paia e mafai ona toe foi atu ai tagata taitoatasi i le afioaga o le Atua ma toe faatasia aiga e faavavau. (“O Le Aiga: O se Folafolaga i le Lalolagi”).
E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.
O le a sou lagona pe a e vaai i le matagofie o le malumalu? Pe oo atu upu nei i lou mafaufau: “Ou te fia vaai i le malumalu. Ou te ulu i ai i se aso”?
O nisi taimi pe a usuina e tamaiti le pese “Ou te Fia Vaai i le Malumalu,”1 latou te mananao e o i le malumalu i se aso, ae latou te le malamalama pe aisea ua i ai malumalu, pe o a mea e tutupu i totonu o le malumalu, ae po o a foi mea e tatau ona latou faia ina ia mafai ai ona o i totonu. Se’i o tatou suesue atili e uiga i le malumalu.
Aisea ua faia ai malumalu?
Na fetalai mai le Alii, “Ia fausia se fale i lo’u igoa, mo Lē Silisili e nofo ai” (MFF 124:27). E nofo le Agaga o le Alii i Ona malumalu. O le malumalu o le maota o le Atua. O se nofoaga tatou te osia ai feagaiga (po o folafolaga) ma le Tama Faalelagi. Afai tatou te tausia a tatou feagaiga, o le a mafai ona tatou toe nonofo faatasi ma Ia.
O le a le mea e tupu i totonu o le malumalu?
E tatau ona papatisoina tagata uma e toe foi atu ai i le Tama Faalelagi. O le toatele o fanau a le Tama Faalelagi sa maliliu a o lei papatisoina. A atoa lou 12, e mafai ona papatisoina oe i totonu o le malumalu mo na tagata ina ia mafai ai ona latou mauaina na faamanuiaga.
I totonu o le malumlau tatou te maua ai foi se faaeega paia, po o se meaalofa. O lenei meaalofa o le folafolaga afai tatou te tausia poloaiga, e mafai ona tatou maua le ola faavavau.
O totonu o le malumalu e mafai ona faamauina ai se tane ma le ava o se aiga mo le olaga nei ma le faavavau. O lona uiga afai e tumau lo la’ua agavaa, o le a faaipoipoina i laua e faavavau ma mafuta ma a la’ua fanau i se aiga e faavavau.
O mea uma e faia i totonu o le malumalu e faia i le perisitua, po o le pule a le Atua.
E faapefea ona ou saunia e ulu atu i totonu i se aso?
Ina ia alu i totonu o le malumalu, e tatau ona le itiiti ifo ma le 12 tausaga lou matua. E tatau ona papatisoina ma faamauina oe. E tatau ona e talitonu i le Tama Faalelagi ma Lona Alo, o Iesu Keriso. E tatau ona e talitonu i Le Ekalesia a Iesu Keriso o le Au Paia o Aso e Gata Ai. E tatau ona e ola i poloaiga a le Tama Faalelagi. O le a faatalanoaina oe e lou epikopo po o le peresitene o le paranesi ina ia mautinoa ua e agavaa e ulu atu i le malumalu, o le a e mauaina se pepa faataga o le malumalu e faaali atu i le malumalu. O le i ai o se pepa faataga o lona uiga o loo e ola i le ala e tatau ai ina ia e ulu atu i totonu.
A e tumau ai i le ala e aveatu ai oe i le malumalu, o le a e saunia e te alu atu iina “e lagona ai le Agaga, ma tatalo ai. O le maota o le Atua, e i ai le alofa.”2
Ata o le Malumalu o Bern Switzerland na pueina e Chris Wills; ata na tusia e Adam Koford