Ia Matuai Feinu i le Vai Ola

Saunia e Matthew Heaps

Tautua a le Uelefea

“A o se inu i le vai ou te avatu ia te ia, e le toe fia inu” (Ioane 4:14).

O la’u galuega e aveina atu ai au i nuu o le lalolagi atoa lea e le maua ai e tagata se vai mama. Matou te galulue faatasi ma malo ma tagata o le atunuu ina ia tuuina atu ni puna o vai mama e mafai ona tausia ma vaavaaia mo le tausiga o le ola e pei o vaieli ma vaipuna po o faatanoa e tali ai vai vaitimu.

Ua ofo atu e nei galuega faatino mo le suavai se faaleleia maoae o le tulaga lelei o le olaga. Ua maoae le faaleleia atili o le soifua maloloina aua o vai mama ua taofia ai le pipisi o le taifoi, kolera, ma isi faama’i e mafua mai i le vai. Ua faaleleia foi le tamaoaiga aua o matua ma fanau sa masani ona faaaluina o latou taimi e la’u ai vai ua mafai nei ona faaauauina galuega ma aoaoga. E oo lava foi i nuu e tele le mau faafitauli lautele, e masani lava ona fai mai tagata o vai mama o le mea sili lea ona latou manaomia.

Na faataunuu e le Faaola Lana galuega i le lalolagi i se taimi ma se nofoaga lea sa faalagolago ai tagata i vaieli mo le suavai. A o Ia aoaoina le fafine i le vaieli i le fetalai atu “a o se inu i le vai ou te avatu ia te ia, e le toe fia inu ia” (Ioane 4:14), pe sa Ia aoao mai foi ia i tatou e faapea, o Lana talalelei e faamalieina ai—tumau—mea masani e sili ona tatou manaomia? Ou te talitonu o lena lava.

O le a ou faafetai pea i se tamaitai i Kenya, Aferika, o lē na aoaoina au e uiga i le naunautai e galue mo le mauaina o le suavai. Sa ou feiloai ia te ia i se faafiafiaga ina ua uma ona fausia se vaieli i lona nuu. Ma le agaga faafetai sa ia ta’u mai ai ia te au o le vaieli fou o le a faaitiitia ai lana malaga i aso uma mo le iva maila (14 km) e aumai ni vai, i le na o le tasi le maila (1.6km). Sa matuai fiafia o ia i avanoa o le a ia maua.

Sa le mafai ona aveese mai lo’u mafaufau pe faapeī sou lagona pe afai ou te savali mo se maila e aumai ni vai. Sa faagaeetia a’u i lona tuueseina o mea uma—mai galuega o le fale i le faiga o le togalaau—ae alu lana malaga e aumai ni vai. Sa ia iloaina e le mafai ona faauma isi ana galuega e aunoa ma lena vai. Sa ou mafaufau i le mamafa o lana avega. O le amoina o le vai e manaomia ai le malosi ma le onosai. Ae, mo le manuia o lona aiga, sa naunau ai o ia e savali i le iva maila i aso uma e aumai [ia vai].

Ou te le iloa pe mafai e i tatou o e maua mai le suavai mama mai paipa i o tatou fale, ona faamoemoe i nisi taimi ia tutusa le faigofie o le o mai ia Keriso ma le mimiloina o se ki ia maua ai se ipuvai. Pe o tatou naunau ea e faataatia ese isi galuega, e oo lava i galuega taua, ina ia saili ai ia iloa Iesu Keriso ma Lona Tama?

Ou te iloa o le vaieli o le vai ola ua ofoina mai e le Faaola ia i tatou e le matutu lava ma e mama atoatoa ma maua ai le ola. A tatou o mai ia te Ia ma se ipu e leai se mea o i ai, o le a Ia faatumuina, o le tele lava o taimi, e sili atu nai lo lo tatou malosi e gafataulima ai. O Ia moni lava o le vai ola, o se faaaliga o le alofa o le Atua.

O Le A le Vai Ola?

O le vai ola o le talalelei lea a Iesu Keriso.
“O le puna o le vai o le ola … o se faatusa lea o le alofa o le Atua” (1 Nifae 11:25).
E mafai e le vai ola ona aumaia ia i tatou le “ola e faavavau” (Ioane 4:14; MFF 63:23).

Na aoao mai le Faaola, “A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau” (Ioane 4:14).

O Le Vaipuna o le Ola, saunia e Robert T. Barrett, e le mafai ona kopiina