Sa Latou Saunoa Mai ia i Matou
Amata Minoi Loa
O le malolo ai i luga o le tuasivi e ono foliga mai o se auala saogalemu lea e aloese ai mai le faia o mea sese, ae o se auala foi lea e aloese ai mai le alualu i luma.
Na faamatalaina se tala e uiga i ni vaega o tagata e faapauu mai i faamalulele e tape ni afi. O nei alii ma tamaitai totoa latou te tapeina ni mu e ala i le faapauu mai i ni faamalulele i luga a’e o se afi ma tape mai le afi e amata mai luga e agai i lalo, ae o isi e tapeina mai i lalo.
I se tasi la o mu tele lava o le togavao, sa potopoto ai se vaega sili ona lelei o tagata tineimu e faapauu mai faamalulele mo se fonotaga a o le’i o ese atu i a latou vaalele. Na ta’u atu e le avefeau—o se tagata tineimu atamai ma poto masani—i tineimu e faapauu mai faamalulele ua matuai maaleale lava mea uma ma e le mafai ona ia tuuina tonu atu ni faatonuga ia i latou. Nai lo lena, na faatonuina e le avefeau, e tatau i tineimu e faapauu mai faamalulele ona fesootai atu lea o ia i le ualesi i le taimi tonu lava e felelei a’e ai i le tuasivi i luga ae o le afi. Ona ia tuuina atu lea ia i latou o ni faatonuga i le auala e tatau ona latou uia e amata ai ona tape le afi.
Na vave ona o ese atu le au tineimu e faapauu mai i faamalulele i a latou vaalele, ma faapauu ifo i le tuasivi i luga ae o le afi aasa ma faatulaga ai i latou lava mo le faatinoga. Ao latou vaavaai mai i le afi mai luga, na mafai ona latou iloa mai le tele o auala e mafai ona latou oso mai ai e amata la latou galuega.
Ina ia tausia la latou feagaiga ma le avefeau, na aumai ai e le taitai o le vaega se ualesi e uu i le lima, maua le alaleo talafeagai, ma valaau atu i le avefeau e fesili mo ni faatonuga po o le fea le auala e faaaoga. Peitai sa na o le gogolo lava o le ualesi; sa le mafai ona latou faalogoina le avefeau.
O le mafaufau ai e faapea ai sa pisi le avefeau i nisi o tiute, o lea na filifili ai le au tineimu e faapauu mai faamalulele e faatali mo le 10 minute ona toe taumafai lea. Ae ina ua latou toe taumafai mo le taimi lona lua e fesootai atu i le avefeau, sa latou maua lava lea tali e tasi—o le leai o se leo ma le gogolo ma leai ni faatonuga.
Sa talatalanoa le au tineimu e faapauu mai i faamalulele. Sa latou iloa atu lava nisi o auala i lalo o le mauga e mafai ona latou maua ai se tulaga lelei e tape ai le afi. Peitai sa latou popole ona latou te le’i maua ni faatonuga mai le avefeau. Sa latou popole nei o latou uia le auala lea e sili ona lelei ia i latou, ae avea ma mea e agai ese ai mai le ala tonu lea e manao le taitai latou te ui ai ma e ono toe fosi i latou e toe foi i tua.
O lea sa latou filifili ai loa e faatalitali i luga o le tuasivi. I le sefululima minute mulimuli ane na latou toe taumafai atu i le avefeau. Sa leai lava se mea. Sa aveese a latou ato faafafa ma saofafai i lalo. O le tolusefulu minute na avea ma itula; o le itula na oo atu i le lua itula. Sa latou taumafai pea e faafesootai le avefeau. Ae e pei lava o le taimi muamua, sa na o le gogolo na latou mauaina.
Sa tonu loa i le au tineimu e fai la latou taumafataga o le aoauli. Ina ua uma lena, ina ua le mafai lava ona latou fesootai atu i le avefeau, ona latou aluluga lea ia latou ato faafafa ma fai si malologa. Sa le fiafia i latou. Ana mafai lava ona faalogo mai le avefeau ia i latou ma tau mai le auala latou te uia, semanu ua latou o fiafia ma mulimuli i lena auala ma amata a latou taumafaiga o le tapeina o le afi. Peitai na foliga mai ua le ano mai le avefeau ia i latou, atonu na pisi i nisi tagata. Ma sa latou filifili e le mafai ona latou minoi e aunoa ma se faatonuga mai le avefeau. O le mea moni lava, ua uma ona folafola mai na faatonuga ae latou te le’i faapauu ifo i luga o le papa.
E fitu itula talu ona taunuu le au tineimu e faapauu mai i faamalulele i luga o le tuasivi, ae oo mai loa se taitai tineimu ua vaivai mai le vaega lea o loo tapeina le afi i lalo o le mauga, ma tau mai ia i latou. Sa matuai te’i lava o ia. Sa oo atu o ia i lo latou taitai, ma fai atu, “O le a le mea ua outou taotooto ai i luga o le tuasivi? Sa matou matuai manaomia lava la outou fesoasoani. Toeitiiti lava a le mafai ona matou tapeina le afi ona matou te lei maua se fesoasoani e tape ai. Ae o lea o loo outou malolo i lenei taimi atoa i luga o le tuasivi?”
Sa faamatala atu e le taitai o le au tineimu e faapauu mai i faamalulele lo latou tulaga i le taitai fuimu. Sa folafola mai ia i latou ni faatonuga mai le avefeau. Sa latou mataala i le taumafaiga e maua mai na faatonuga. Ae sa le’i ano mai lava le avefeau ia i latou, ma e le’i tali mai foi i a latou valaau. E moni, na mafai ona latou vaaia nisi o auala e o atu ai i lalo i le afi. Ae sa latou fefefe ne’i o latou ui i le auala sese. Ma o lea na latou filifili ai e faatali seia latou maua mai faatonuga ia na folafola mai e le avefeau.
Sa faalālā atu le lima o le taitai fuimu ma aumai le tamai leitio lea na faaaoga e le au tineimu e faapauu mai i faamalulele. Ona ia savali lea pe tusa ma le 50 iata (45 m) i lalo o se tasi o auala lea e agai atu ai i le afi. Ona ia tu lea ma faataitai le leitio. Sa leotele ma manino le sau o le leo o le avefeau. Ona toe savali lea o le taitai fuiumu i luga o le tumutumu o le tuasivi ma savali agai i lalo pe tusa ma le 50 iata i le isi auala. Na ia tu ma valaau atu i le avefeau. Na vave foi ona toe sau le leo o le avefeau.
Sa toe foi atu le taitai fuimu i le au tineimu e faapauu mai i faamalulele ma togi atu le leitio i le taitai ma fai atu i ai, “O loo outou i ai i se nofoaga e le ola ai le leitio. Na pau lava le mea sa tatau ona outou faia o le amata minoi atu i lalo o se tasi o auala, ma semanu e faigofie lava e le avefeau ona ta’u atu ia te outou le auala sao ma taitai atu outou i le nofoaga sa matou manaomia ai outou. Peitai ua outou taotooto i luga nei, ma sa leai ma so outou aoga ia i matou.”
E masani lava i taimi tatou te manaomia ai se taitaiiga ma se taiala faaleagaga, e mafai ona faaosoosoina i tatou e fai le mea tonu lava lea na fai e le au tineimu e faapauu mai i faamalulele. Tatou te oo i ni nofoaga e le masani ai. Tatou te vaai i ni auala e mafai ona tatou uia, ae tatou te le mautinoa po o fea le itu e tatau ona tatou ui ai. Ua folafola mai ia i tatou ni musumusuga ma le fesoasoani mai lo tatou Tama Faalelagi. Ae peitai e le o taimi uma e vave oo mai ai. E oo mai lo tatou le fiafia ma filifili ai o le a na o lo tatou saofafai ma faatalitali seia oo mai taiala ia na folafolaina mai. Tatou te faatali ma faatali ma faatali, ma mafaufau pe aisea ua le fesoasoani mai ai le Avefeau faalelagi ia i tatou ma lo tatou auala.
I le faia o lena mea, ua tatou le amanaia ai se mataupu faavae taua o faaaliga. O loo faamoemoe mai lo tatou Tama o i le Lagi e faaaoga lo tatou lava atamai, gafatia, ma tomai e asa ai o tatou uluai auala. Ao tatou fetaomi atu i luma i le auala ua tatou filifilia, ua tatou i ai i se tulaga e sili atu ona lelei e maua ai ni faasaoga o le auala lea e ono tuuina mai e Ia mo i tatou. Ae afai ua na o lo tatou saofafai i luga o le tuasivi ma aluluga i a tatou ato faafafa seia tuu mai e Ia ni faatonuga, ua tatou i ai la i se tulaga lamatia o le mauaina o i tatou lava i se nofoaga e leai se faaleagaga.
Na aoao mai i tatou e Peresitene Boyd K. Packer, Peresitene o le Korama a Aposetolo e Toasefululua:
“Ua faamoemoe tatou te faaaogaina le malamalama ma le poto ua tatou mauaina e galueaiina ai o tatou olaga. Tatou te le manaomia se faaaliga e faatonu ai i tatou e faataunuu o tatou tiute, aua ua uma ona ta’u mai na mea ia i tatou i tusitusiga paia; tatou te le faamoemoe foi e suitulaga ni faaaliga i le poto faaleagaga ma le faaletino lea ua uma ona tatou maua—ae ua na o le faalauaiteleina. E tatau ona faagasolo pea o tatou olaga e pei ona masani ai, i se auala o aso uma, ma mulimuli i faatulagaga ma tulafono lea e pulea le olaga.
“O tulafono ma aiaiga ma poloaiga o ni puipuiga taua tele. Afai tatou te manaomia ni faatonuga e faaalia mai e suia ai lo tatou ala, o le a faatali mai i le auala pe a tatou taunuu atu i le nofoaga e manaomia ai.”1
Ou te molimau atu o le a oo mai le taitaiga sili ma le manino i o tatou olaga pe afai e le na o lo tatou faatalitali i le Tama Faalelagi e auina mai le fesoasoani ma le taitaiga, ae e oo mai pe afai o loo tatou galulue ma le punouai i le galuega. Mo outou na o loo faatalitali i le Alii mo se taitaiga i o outou olaga—o e o loo manaomia se fesoasoani i se faaiuga tele po o se fesili—ou te tuuina atu ia te outou le lui lenei: Ia faaaoga ma le agaga tatalo ma le faautauta lou lava atamai ma au lava punaoa e filifili ai se auala e foliga o loo sa’o ia te oe. Ona amata lea ona auai ma le naunautai i le uia o lena auala (tagai i le MFF 58:26–28). Pe a oo mai le taimi mo le faasaoga o le auala, o le a i ai o Ia iina e fesoasoani ia te oe ma taialaina oe.
Ata pue © Landov