Fesoasoani le Tasi i le Isi i Initia

Saunia e Elder Charles ma Sister Carol Kewish

Faifeau Faamisiona Matutua, Eria a Asia

Ina ua faataumaoia e afa malolosi ma afā asiosio ia Initia i saute ia Oketopa 2009, sa galulue alii talavou ma le autalavou matutua mai Itu o Hyderabad ma Bangalore e fesoasoani e faamama avega i mafatiaga o i latou na afaina i lologa.

Na saunoa Peresitene Prasada Gudey o le Itu o Hyderabad Inidia, “Sa matagofie le galuega sa faia e o tatou alii talavou i le la’uina o meaai ma vai ia i latou sa manaomia. Na taunuu oloa o foa’i i le itumalo, ae sa le mafai e le malo ona tufatufa atu i le fiaafe o tagata na aafia sa i ai i tolauapiga e 200 mo tagata sulufai. Sa iloagofie lava o tatou tagata i o latou taoofu o Lima Fesoasoani Mamona, a o latou faatinoina la latou galuega lelei i le la’uina o meaai ma vai i tagata uma.”

Sa ta’ua e nisi o alii talavou ma talavou matutua o e sa faia le auaunaga, lo latou fiafia ma le faamalieina ona o le auauna atu.

Lalo ifo: O Prabhu Kumar (i luga o le loli) o se tasi o sui e 60 o le Ekalesia sa malaga i le tolauapiga a tagata sulufai i le Siteki a Karnataka i matu. Sa latou la’uina atu ia palanikeke, tapoleni, ma pusa o mea faamama na tuufaatasia e tagata o le Ekalesia. Sa fai mai o ia, “Sa matuai ofoofogia le fesoasoani atu i lenei galuega faatino o se toomaga mo lologa. Sa i ai lava lo’u naunau e fesoasoani ma auauna atu i isi. Sa ou matua faafetai ina ua mafai ona ou auauna atu. Sa maligi o’u loimata ona sa mafai ona ou vaai i na tagata sa leiloloa uma a latou mea i le lologa. O se faamanuiaga sili le mafai ona fesoasoani i tagata o lo’u atunuu.”

Luga: “Ina ua ou faamatala atu i a’u uo i le kolisi e uiga i le galuega faatino, sa matua fiafia i latou i le mea sa ou faia. Sa ou faamatalaina i ai mea sa matou faia ma faasoa atu i ai mataupu faavae o le Ekalesia. Sa ou lagona le fiafia ina ua ou fesoasoani atu i tagata i le galuega faatino. E faamalo atu i le faalapotopotoga a le Ekalesia i le aumaia o lenei avanoa ia i matou e auauna atu ai i isi.” —Deepak Shalma

Taumatau: “Sa ou matua fiafia lava ina ua ou maua se avanoa e auauna atu ai i o’u uso a tagata. Sa ou maua se aafiaga matagofie, ma sa tele mea na ou aoaoina e ala i le faia, ma sa matou fiafia ai foi e faatasitasi ma uo ma fu’e ma utu meaai ma sapalai na manaomia. Sa ou lagonaina le alofa ma le filemu o lo’u Faaola a o ou auauna atu i isi.” —Venus Armstrong

“Sa ou matua fiafia lava ina ua mafai ona fesoasoani i lenei galuega faatino. Sa ou maua ai le fiafia tele i le iloa sa ou fesoasoani e auauna atu i tagata sa matua manaomia le fesoasoani. Sa ou tatalo ina ia faamanuiaina tagata.” —Vishali Natta

Taumatau: “O se lagona lelei tele le galulue ai i le galuega faatino o le toomaga i lologa. Sa ou fesoasoani e vali faapea foi ma le tufaina o afifi meaai. O se faamanuiaga tele le i ai iina ma isi uso a perisitua ma mafai ona fesoasoani ma auauna atu i tagata sa matua manaomia le fesoasoani.”—Avinash Thomas

Na E Iloaina?

Na aoao mai le Perofeta o Iosefa Samita e faapea, o se tagata moni o le Ekalesia “e fafagaina i latou e fia aai, faaofu e le lavalava, e tausia fafine ua oti a latou tane, e soloia loimata o e matua oti, e faamafanafana i e mafatia, pe o i totonu o lenei ekalesia, pe le auai foi i se lotu, po o fea lava na te maua ai i latou” (Aoaoga a Peresitene o le Ekalesia: Iosefa Samita [2007], 455). Ona o lo tatou naunau e auauna atu i isi, o lea ua lagolagoina ai e le Ekalesia le toomaga ma le atiina ae o galuega faatino i le lalolagi i le polokalama o fesoasoaniga mo tagata. Mo se faataitaiga, i le 2009:

• E 763,737 aso na ofoina atu e galulue fua ai i fale o le uelefea a le Ekalesia.

• E silia ma le 8,000 faifeautalai o loo auauna atu i le Tautua a le Uelefea.

Mai le va o le 1985 ma le 2010, ua tuuina atu ai e le Ekalesia le fesoasoani mo tagata i atunuu e 178. O nisi o galuega faatino patino e aofia ai mea nei:

• Tuuina atu o le toomaga mo faalavelave faafuasei ina ua mavae mafuie i Haiti, Initonesia, ma Chile; ina ua mavae le galulolo i Samoa; ma ina ua mavae afā asiosio i Filipaina.

• Faatupeina se faalauiloaga o tui puipui mo le misela i Aferika.

• Auina atu le 10.3 miliona o pusa o mea faamama, pusa o mea e faaaoga e pepe faatoa fananau mai, ma pusa o meaaoga.

• Tufatufaina le silia ma le 61,000 tone o meaai; e silia ma le 13,000 tone o sapalai mo falema’i; ma e silia ma le 89,000 tone o lavalava.

Mo nisi faamatalaga e uiga i le polokalama o le uelefea a le Ekalesia, tagai i le www.providentliving.org.

Ata na pueina e Charles ma Carol Kewish; atavali o Iosefa Samita na saunia e Dan Weggeland, mai faaaloaloga a le Falemataaga o Talafaasolopito o le Ekalesia