O Le Auala Na Ou Iloa Ai
O Le Tali i le Fuaiupu e Valu
Na maua e Iosefa Samita lana tali i le Iakopo 1:5. Sa ou mauaina la’u tali i nai fuaiupu o loo sosoo mai ai.
O le ta o le 11 i le po, ma sa ou i ai i lo’u potumoe ina ua uma ona matou tafafao ma nai a’u uo o le aoga maualuga. Sa ou iloa ou te le’i faia ni filifiliga sili ona lelei i lena po. “Peitai, sa ou manatu e faapea, “ou te le’i faia foi ni filifiliga sili ona leaga.”
I lo’u le fiafia, sa ou aumaia ai se meaaoga e fai i le fale. Sa ou matuai vaivai lava ma sa na o le fia faauma lava ae ou moe. “E manaomia ona faitau a’u tusitusiga paia. Ae o le a faamisi i lenei po,” o lo’u mafaufau lea.
Sa amata ona ou mafaufau i mea uma lava sa tatau ona ou faia. Faitau a’u tusitusiga paia, auai i le seminare i le vaveao, auai i le lotu ma le Mutuale, ia maua ni togi lelei, ia auai i gaoioiga faaopoopo, maua se galuega le tumau … Ma sa faaauau pea le lisi.
Sa ou lagona le mamafatu i soo se vaega o lo’u olaga, aemaise e na o a’u lava le tamaitai o le Au Paia o Aso e Gata Ai i la’u aoga maualuga. Sa ou toe faamanatu ia te a’u lava ia, masalo e na o a’u lava le tamaitai o le Au Paia o Aso e Gata Ai na feiloai i ai au uo, ma o lea e tatau ai ona avea a’u ma se faataitaiga lelei. Ae na ou iloa ua amata ona ou seesee ese.
“Maimau pe ana mafai ona ou saoloto e pei o a’u uo,” o lo’u mafaufau lea. Maimau foi pe ana faapea ou te le lagonaina le faanoanoa ina ua ou alu i se pati pe fai se upu leaga, ae o le mea moni lava sa ou lagonaina. Ou te lagona ai le ma’i faaletino pe a ou faia ni filifiliga ou te iloa e le sa’o. Peitai, mo nisi mafuaaga, sa faaauau pea ona ou faia.
Toeitiiti lava oo i le vaeluaga o le po ae uma loa a’u meaaoga. Toe lima itula tatagi la’u uati. Ou te ala i luga, alu toai i le seminare, ma taumafai ina ia uma atu se isi aso o le a’oga.
Ona oo mai lea o se manatu ia te a’u. E le faapea e tatau lava ona ou usitai i tulafono uma. E mafai ona ou le toe alu i le lotu, seminare, ma le Mutuale pe a ou manao i ai. E le faapea ona o loo o lo’u aiga, ona tatau ai foi lea ona ou alu.
Sa o se manatu faamalieloto tele. Sa ou tolotolo atu i le moega ma na toeitiiti lava a ou moe ae oo mai loa se uunaiga malosi e faitau ia tusitusiga paia. “Leai,” o lou mafaufau lea. “Ua uma a’u mea e fai.”
Sa ou toe lagonaina foi. O le taimi la lea sa ou mafaufau ai, “Atonu o le taimi mulimuli lava lea.”
I le seminare i lena tausaga, sa matou suesue ai i le Feagaiga Fou. Sa ou sue i le mea o i ai la’u faailogatusi i le Iakopo mataupu 1. O le mataupu lea na faitauina e Iosefa Samita ma musuia ai o ia e alu i le Vao Paia ma sasaa atu lona loto i le Tama Faalelagi. “Tai ese foi,” o lo’u manatu lea. Sa amata ona ou faitau.
Sa ou masani i le fuaiupu e 5: “A e afai ua leai se poto i so outou …” Ae o le fuaiupu e 8 lea na tatalaina ou mata i lena po. Na faapea mai, “O le tagata faalotolotolua e faaletumau ia i ona ala uma.” Ou te le’i toe minoi. Ona ou toe faitauina lea.
Sa faalotolotolua lo’u mafaufau. Sa ou faapea atu o a’u o se tagata o le Au Paia o Aso e Gata Ai, ae ua amata ona ese le tulaga ua faia e a’u amioga. Ma afai ou te faaauau ai pea, e tusa lava po o le a le auala ou te filifilia, o le a ou faalotolotolua ma le mautonu ma matua faanoanoa.
Sa manaomia ona ou iloa pe moni le talalelei. Sa manaomia ona ou iloa pe aoga lo’u ala i luga i le 5 i taeao uma e suesue i le talalelei. Sa manaomia ona ou iloa sa ou taumafai e ola i se olaga e sili atu ou te mafaia, e ui ina i ai taimi e ulagia ai a’u, aua o le a aumaia moni ai ia te au le fiafia ma le olioli sili.
Sa toeitiiti lava ta le 1 i le vaveao i lena taimi, ae sa ou tootuli ifo i autafa o lo’u moega ma sasaa atu lo’u loto i lo’u Tama oi le Lagi. Sa ou ole atu ia te Ia e fesoasoani mai ina ia ou iloa le mea sa’o, ina ia iloa le auala e ui ai, ma taitai atu lo’u lima ma aveesea le le mautonu sa ou lagonaina.
Na oo mai ma le faigofie, manino, ma le toafilemu le manatu i lo’u mafaufau, “Ua uma ona e iloaina.” Ma sa ou iloaina.
Sa ou tu ae i luga, tape le moli, ma ou moe loa. O le fa itula mulimuli ane na tatagi ai la’u uati. Sa ou tapeina ma le fiamoe. E tasi le minute mulimuli ane, ua ou sauni mo se isi foi aso, e aofia ai ma le seminare i le taeao po.
Ua leva tausaga talu ona tupu lena aafiaga matagofie o le vaeluaga o le po. Ae o loo faaauau pea ona tupu la’u molimau. O nisi taimi e sili atu le malosi nai lo isi taimi. O le eseesega, ua ou iloa ma e ou te le’i toe tepa lava i tua.
Ata na tusia e Taia Morley