Tau Lava o le Aau Pea
E fiafia lava Monika e sefululua ona tausaga e aau. O ia o se tasi o tagata aau pito i lelei i Niu Sila. Atonu e i ai sona itu i’a.
Ia, atonu e le mo’i le faapea e i ai sona itu i’a. Ae na pau le isi faamatalaga ua mafua ai ona lelei tele o ia ona o lona koleni malosi.
E lua itula e i ai i le vai i taeao uma o Aso Gafua, Aso Lulu, ma Aso Faraile i le 5:00 i le taeao. O Aso Lua, Aso Tofi, ma Aso Toonai e momo’e ai i le malae pe momo’e faataamilo pe a tuua le aoga.
O lana taga e faale-fiafia i ai o le aau faō ae apata limatasi, e tuu i luga lona auvae, ma e ta’i 100 mita ma ona lima. “E matua lailai lava ou tau’au,” o lana tala lea.
Ae sa ia aoaoina, a oo ina faigata, e le faigofie le olaga pe a togi le solo. O le faia o galuega faigata e atili ai lona malosi.
Galue Malosi ma Taimi Faigata
Sa fesoasoani uma lava lena galue malosi. Sa amata ona ia manumalo i pine i le 10 o ona tausaga. I le 11 o ona tausaga sa i ai o ia i le 10 pito i luga a le atunuu i lana vaega i le aau faō ma apata limatasi. O le 12 o ona tausaga sa filifilia ai o ia mo se tolauapiga mo le atinaega o le aau ma le au a le atunuu ma sa filifilia ai o ia e aau i Taaloga a le Oceania i Samoa e tauva ai ma le au feausi mai isi atunuu.
Fai mai a ia, “O le tala e masani ona fai mai ai lo’u tamā, “E maua le manumalo i le galue malosi. E le te’ite’i lava ua oo mai.’”
Sa aoaoina e Monika e moni lena mea mo le aau, ma sa ia iloa ai e sa’o foi lena mea i le olaga ina ua maliu faafuasei lona tamā i nai masina ina ua mavae lona aso fanau e atoa i ai lona sefulutasi tausaga.
“Sa matuai o’u latalata lava i lo’u tama,” o le tala lea a Monika. “O ia na amata aoaoina au e aau. Sa ia momoliina au i a’u aoga aau uma lava ma a’u tauvaga. Ina ua maliu o ia, sa pei ua leai se isi ou te toe talanoa i ai.”
Aua Le Fiu
O le maliu o lona tamā o se mea faigata. Peitai e le fiu Monika i taimi o faataitaiga faigata, o lea ina ua maliu lona tamā, na te lei lafoaia foi lona faatuatua i le Tama Faalelagi.
“O lo’u tamā o lo’u faataitaiga lea,” o lana tala lea. “Sa ia aoaoina a’u i le ala e ola ai i le talalelei.”
Talu mai lona maliu, ua amata ai e Monika ona suesue i tusitusiga paia a o lei moe, “ma taumafai ia avea o se mea e masani ai,” o lana tala lea. E tu atu o ia mo ona talitonuga i le aoga. “E oo mai ia te a’u le tele o le mau fesili e uiga i le Ekalesia,” sa ia fai mai ai. Ma o loo galue foi o ia o se faatonu o musika i le uarota.
“Ua faamanuiaina lava au i le avea ai o se tagata o le ekalesia,” o le tala lea a Monika. “E faamafanafanaina au pe a ou atuatuvale tele.”
Malosi Atu i le Faaiuga
E misia lava e Monika si ona tamā. Ae o le lagolago a lona tina ma le aiga, o loo faaauau ai pea o ia.
E tumu lona olaga i lesona o le piano ma le vaiolini, o fonotaga a le aufono a tamaiti aoga, aau, Alualu i Luma o le Tagata Lava Ia, ma le taitaia o musika i lotu faamanatuga.
Na te le o iloaina lava pe o le a le mamao o le a oo i ai lana aau pe o le a foi le umi o le a tumau ai. Ae o le talalelei lava ia, ua naunau o ia e tumau ai seia oo lava i le iuga.
“O nisi taimi e faigata ai le olaga,” o le tala lea a Monika. “Ae o le faia o mea faigata e mafai ona faamalolosia ai i tatou. Pau lava le mea o le aau pea.”
Ata na pueina e Adam C. Olson