Mai le Misiona
O Se Mea e le Taua i se tasi Tagata o se Oa Lea i Se Isi Tagata
O se tusi e auro ona mataitusi i le faavaa na avea o se oa i se tasi na sailia le upumoni.
O se aso vevela o le taumafanafana i la’u misiona. Sa ma savalia ma la’u soa magaala o St. Petersburg, i Rusia, ma le faamoemoe ia maua ai ni tagata sailiili fou. O le afiafi lena na matou feiloai ai ma se toeaina i talaane o lo ma fale ma amata loa ona matou talatalanoa. E ui sa lei faaalia sona fiafia i le talalelei, ae na taufai musuia i ma’ua e ave i ai se kopi o le Tusi a Mamona. I totonu o le tusi sa ma tusia ai o ma moomooga alofa mo ia, a ma molimau, ma faamatalaga e faafesootai ai i ma’ua.
Mulimuli ane i lena lava afiafi, i lo ma le iloaina, ae sa tafafao ai se taulealea e igoa ia Ilya ma lona uso. A o savalivali i se auala e tau le malamalama i lalo o le eleele, sa vaaia ai e Ilya se ilaila mai o se auro i le faavaa o se tusi i luga o le palapala. Ina ua faatu ifo i lalo e vaai lelei i ai, sa ia faitauina ni mataitusi auro na lolomi i luga o le tusi—O Le Tusi a Mamona: O Se Tasi Molimau ia Iesu Keriso. Sa tago ma aumai ma ave i le fale.
I le aso na sosoo ai, sa ma tau mafaufau ai ma la’u soa pe o le a faapefea ona ma maua nisi tagata sailiili fou. Sa vave ona oo mai i lo’u mafaufau ni manatu: “O loo ta taumafai malosi e sue ni avanoa fou. A o fea o i ai taunuuga? Atonu ua tatau ona sui se mea o loo ma faia.”
E lei leva ae tatagi le telefoni. Sa ou pikiina i luga. Sa fesili mai le leo, “O se alii faifeautalai lea? Sa ou mauaina lau tusi na leiloa i le ala kolosi i lalo o le eleele. Ou te manao e toe faafoi atu.”
Sa vave ona ou tepa atu i le fata i le mea sa taatitia ai a’u tusitusiga paia. “Ailoga na leiloa a’u tusitusiga paia i le auala o nofoaafi i lalo o le eleele.” Na ou tali atu ai. “Leai, e le’i leiloa la’u kopi o le Tusi a Mamona, ae e mafai ona tuu ma oe e te faitau ai.”
Sa fai mai le taulealea o lona igoa o Ilya ma sa ia faamatala mai o ia e sau mai Orsk, i Rusia, ae na sau i St. Petersburg e faigaluega.
“Ou te fia aoao atili e uiga i lenei tusi ma la outou ekalesia,” o lana tala lea. “E mafai ona ta feiloai?”
Sa ou osooso i le fiafia. E le o aso uma e valaau mai ai ni tagata sailiili ma talosaga mai e faatulaga se feiloaiga e aoao atili ai i le Ekalesia.
“Ioe, e mafai ona tatou feiloai, Ilya!” Sa ou tali fiafia atu ai.
Ina ua matou feiloai ma Ilya, sa ia faalogologo ma le toto’a ma fai mai ana fesili. Sa ma fiafia ona sa ia talia fiafia le talalelei.
I se tasi taimi a o faia le lesona, sa ou susu’eina ai le kopi o le Tusi a Mamona a Ilya. A o ou susueina itulau amata, sa ou vaaia se tusitusi e foliga ou te masani ai—o la’u tusitusi lea! Sa ou iloa ai o le tusi lava lenei sa ma tuuina i le toeaina i le aso ua mavae. O le mea moni, na tia’i e le tamaloa le tusi, lea sa lei leva ae maua e Ilya. Sa tumu au i le lotofaafetai ona sa ma filifili ma la’u soa e tuu le tusi i le toeaina, e ui ina sa ma le malamalama pe aisea.
E lei leva ae filifili loa Ilya e auai i le Ekalesia. Na amata ona ia faasoa atu ma le naunautai le savali o le talalelei i ona aiga faapea ma ana uo.
Sa ou aoaoina e silafia e le Tama Faalelagi le taimi ua saunia ai se tagata e talia Lana afioga. Na te manaomia i tatou, o ni faifeautalai ma tagata o Lana Ekalesia, ia tau lava ina faataunuu Ana poloaiga ma gauai atu i Lona finagalo a o tatou saili e faasoa atu le talalelei. O le tulaga lenei, sa silafia lava e le Atua e ui lava o le a le iloa e le tagata muamua na tuu i ai le ma Tusi a Mamona ia lona taua, ae o le a le faapena Ilya (tagai 1 Nifae 19:7).
Ata na tusia e Allan Garns