“Faapei ona Ou Alofa Atu ia te Outou”

Saunia e Barbara Thompson

Fesoasoani Lona Lua i le Au Peresitene Aoao o le Aualofa

O le alofa ma le auauna atu o mea ia e iloa ai o tatou o soo o Keriso.

Sa i ai sa’u uo sa ma potu ma o se tagata lelei tele, peitai e toeitiiti lava o mea uma sa ou faia na foliga mai e le fiafia ai. Sa ou mafaufau, “E faapefea ona ou faaitaina o ia? O au o se tagata e faigofie tele. E sao?”

Ona sa le fiafia o ia ia te au, o lea sa ou faaaogaina ai lena mea e fai ma se ‘alofaga ou te le alofa ai foi ia te ia. O le mea na lelei ai, sa ou toe manatua le fautuaga na tuuina mai e se epikopo i le taimi o se sauniga faamanatuga ao ou i ai i le kolisi. Ou te manatua lelei lava lana fautuaga: “Afai e le tele sou alofa i se tasi, masalo e le’i lava lau auaunaga i lena tagata. Afai e te auauna atu i se tagata, o le a e alofa i lena tagata.”

Ina ua uma ona ou mafaufau i le fautuaga a lo’u epikopo, sa ou filifili loa e tatau ona ou auauna atu i lenei tamaitai ma te potu faatasi ma tofotofo foi i le fautuaga a le epikopo. Sa amata ona ou sailia ni auala laiti e fesoasoani ai i la’u uo, faaali atu le agalelei ia te ia, ma tali atu i mea na te manaomia ma moomia.

Ona tupu faafuasei ai lea o se vavega! Sa ou iloaina sa ou alofa moni lava ia te ia. O ia o se tagata lelei, ma talenia. O se faamanuiaga mo au le ma potu faatasi. Sa ou ofo i le vave ona suia o o’u manatu e uiga ia te ia i se taimi puupuu lava.

Alofa ma Auauna Atu i Isi

Pe a tatou suesueina le Ioane 13, tatou te iloa ai o nisi o lesona sili ona taua na aoao mai e le Faaola i le taimi o Lana galuega talai i le lalolagi, e aofia ai le:

Auauna atu o le tasi i le isi.
Alofa o le tasi i le isi.

A o faatasitasi le Faaola ma Ana Aposetolo e faamamalu le tausamiga o le Paseka, sa lagonaina le filemu i totonu o le potu. Sa silafia e le Faaola e le o toe mamao ae ofoina atu o Ia ma faasatauroina. Ou te mautinoa e tusa pe sa le’i malamalama le au Aposetolo i lena taimi i le taua o mea na tutupu i lena po, ae o le a le toe mamao ae o latou iloa ma malamalama atili i le misiona a le Faaola.

Ina ua maea le tausamiga na ave e Iesu se solo, sasaa ni vai i totonu o se pesini, ma mulumulu ai vae o alii uma sa i ai. O le mulumuluina o vae sa faia i se tulaga o le migao ma le lotomaualalo, e pei ona taulimaina ma le le masalosalo e le Faaola ia lagona o le faanoanoa mo mea o le a le toe mamao ona faaalia lea, e aofia ai ma le faalataina o Ia lea o loo faamalumalu mai.

Sa iloa e Peteru o Iesu o le Mesia ma le Faaola na folafola mai, o lea sa manao ai e auauna atu i le Alii nai lo le auauna atu o le Alii ia te ia. “Afai ou te le mulumulu ia te oe,” na fetalai atu ai le Faaola, “e leai sou tofi faatasi ma a’u” (Ioane 13:8). Ona taliaina ai lea ma le fiafia e Peteru le auaunaga alofa a le Faaola.

Mulimuli ane, na faamalamalama ai e Iesu:

“Tou te ta’ua mai a’u, o le Aoao ma le Alii: ua lelei foi la outou e fai mai na; aua o a’u lava lea.

“O lenei, afai o a’u le Alii, ma le Aoao, ua ou mulumuluina o outou vae; e tatau ona outou femulumuluai o outou vae.

“Aua ua ou avatu le faaaoao ia te outou, e pei ona ou faia ia te outou, ia faapea lava e outou ona fai” (Ioane 13:13–15).

Na finagalo Iesu i le Toasefululua—faapea foi i tatou taitoatasi—ia iloa o le lotomaualalo ma le auauna atu o ni uiga tauaogaina ia e tatau ona tatou saili ina ia maua. Na Ia aoao mai e leai se tasi e sili atu lona taua e auauna atu i isi. O le mea moni lava, o se tasi o mea e avea ai i tatou ma tagata maoae o lo tatou naunautai lea e auauna atu ma tuuina atu i tatou lava. E pei ona fetalai mai le Faaola, “A o le sili ia te outou e fai lea ma a outou auauna” (Mataio 23:11; tagai foi i le Luka 22:26).

Mulimuli i Faataitaiga a le Faaola

O lenei mea e toe manatua ai le auaunaga na faatino ina ua mavae nisi o mala faalenatura na tutupu i masina ma tausaga ua mavae. Sa tatou molimauina ni afa, mafuie, oge, ma faama’i. E tele tala i tagata, e ui ina mafatia foi i latou lava, ae sa latou tausia lava isi o e na manunua, mama’i, pe na manaomia le fesoasoani.

Ina ua maea se mafuie i Peru lea na faataumaoia ai fale o le faitau fia o tagata, sa tuua ai e se epikopo ia mea na faaleagaina o lona lava fale ae faatopetope atu ina ia faitauina tagata o lana uarota ma faamanuia ma faamafanafana i lana tamai lafu.

A o faavauvau se tina i Haiti i le maliliu o tagata o lona lava aiga ina ua mavae se mafuie, sa aapa atu pea o ia e fesoasoani e faatoafilemu ia popolega ma faamalulu i loto nutimomoia o isi, ma faamalosiau atu i tagata na faasaoina ma fesoasoani ia i latou ia maua ni meaai ma ni malutaga.

Na faatalise atu le autalavou matutua a Chile e fesoasoani i le tufaina o meaai ma sapalai ia i latou na sili ona afaina i le mafuie iina. A o auauna atu nei tagata o le au paia, na nana e o latou foliga fiafia ma lima naunautai le tulaga moni o le le mautu o o latou foi tulaga patino.

Na mulimuli uma lava nei tagata ma le toatele o isi i le augani mai a le Faaola “e pei ona ou faia ia te outou, ia faapea lava e outou ona fai” (Ioane 13:15). Mulimuli ane i le Ioane mataupu e 13 tatou te faitau ai:

“O le poloaiga fou ou te tuu atu ai ia te outou, Ia outou fealofani; faapei ona ou alofa atu ia te outou, ia fealofani foi outou.

“O le mea lea e iloa ai e tagata uma lava o o’u soo outou, pe afai ua outou fealofani” (fuaiupu 34–35).

Pe na outou matauina le tele o taimi e faailoa mai ai e taitai o le Ekalesia—mai ia Peresitene Thomas S. Monson i Aposetolo e Toasefululua i au peresitene o le lotoifale, au epikopo, ma faiaoga—lo latou alolofa mo i latou o loo latou auauna atu i ai? O lenei alofa e oo mai i le mulimuli i faataitaiga a le Faaola.

O le auauna atu i isi o le auala lea tatou te faaalia ai lo tatou alolofa ia i latou. Atonu o le alofa ma le auauna atu e tasi ma e tutusa. E moni, o mea ia e iloa ai o i tatou o soo o Keriso.

Faamatalaga mai le Ina Tuu Mai ia o Tama Iti e O Mai ia te Au, saunia e Carl Heinrich Bloch, faaaloaloga o le National Historic Museum at Frederiksborg i Hillerød, Tenimaka