Sa Le Popole i le Vai
O Iosefa o le Motu o Apu Inti, Vaituloto o Titicaca, Peru
Sa ola ae Iosefa e fitu tausaga le matua i nofoaga e siomia i vai. Pe faapea foi, sa ola ae o ia—o siosiomia e vai malulu o le Vaituloto o Titicaca i Peru. O le mea lena e tupu pe a e ola ae i se tamai motu e fausia i ni vao ofe opeopea.
O Iosefa ma lona aiga o se vaega o tagata Uro, o e na fausia ma ola ae i motu opeopea i le Vaituloto o Titicaca mo le faitau selau o tausaga. Latou te fagogota i le vaituloto. Latou te taeele i le vaituloto. Latou te aloalo atu i le isi itu o le vaituloto e o ai i lea motu ma lea motu.
Atonu e te manatu, ona ua masani Iosefa i le vai, o le a le popole ai i lona tu i totonu o le vai papatisoga i ni nai masina o le a papatiso ai. Ae e tutusa lelei lava ona lagona ma le toatele o isi foi tamaiti.
“Ua ou fiafia lava,” o lana tala lea. “Ae ou te popole i le alu i lalo o le vai.”
I le siomia ai o i latou i vai, ua aoaoina ai tamaiti Uro ina ia faaeteete i le vai. O lea la ina ua uma ona tau atu e Iosefa i ona matua lona popolega, sa talanoa ai loa le aiga i le papatisoga i le taimi o le afiafi faaleaiga, ma faataitai ai e Iosefa ma lona tamā le auala e fai ai.
“O le a papatisoina a’u e lo’u tamā,” o le tala lea a Iosefa. “Sa ia fesoasoani ia te a’u ia aua ne’i o’u fefe.”
Ua sauniuni nei ma le filiga Iosefa mo lona papatisoga. O loo ia taumafai malosi lava e faalogo lelei i le taimi o le Peraimeri ma aoao ia Mataupu Faavae o le Faatuatua. Na te iloa o le a fesoasoani lea ia te ia i le taimi nei ma le lumanai.
“O le a ou alu i se misiona,” o lana tala lea. “E pei ona fai mai Nifae, ou te alu atu ma fai ia mea ua poloaiina ai e le Alii” (tagai i le 1 Nifae 3:7).
Ata na pueina e Adam C. Olson