O Lo Tatou Avanoa
O Le Mau e Sili Ona Ou Fiafia i Ai
O lenei fuaiupu e avea pea ma ou taiala ma uunaiga i soo se taimi lava ou te le mautonu ai, popole, pe i ai i se tulaga faigata. Na avea pea ma a’u fuaitau e sili ona ou fiafia i ai talu ona ou fesiligia pe aisea e tatau ai ona i ai le faafeagai. Aisea e tatau ai ona i ai ni feteenaiga? Aisea e le mafai ai ona i ai na o le lelei, fiafia, faigofie ma le manuia i le olaga? Aisea e tatau ai ona i ai le leaga?
Na fesoasoani lenei fuaiupu ou te malamalama ai i le olaga ma ona faigata. Na fesoasoani ina ia ou talisapaia atili ai le uiga o le olaga. Na ou iloa ai le faamoemoega o le faafeagai ma e tatau ona ou faafetai ai. Pe ana leai, semanu tatou te le iloa le aano moni ma le matagofie o le olaga. Pe ana leai le faafeagai, semanu tatou te le iloa ona alolofa atu, fiafia, po o le faamanuiaina. Ua ou aoao ia fiafia i le olaga ma taliaina e pei ona i ai ma faalagolago i le Alii aua o Lona poto e le mafesiligia.
Sheena P., Filipaina
O Le Auala e Maua ai Mafaufauga Mama
E tusa lava pe oo mai ni mafaufauga leaga ia i tatou, e le tatau lava ona tatou faatagaina e ofi mai ma nofo i o tatou mafaufau. O le taimi sili lava tatou te puipuia ai i tatou lava mai faaosoosoga o le taimi lea ua amata ona fotuai mai se manatu; faatamaia loa le fatu, ma o le a le tupu lava le laau. Pe a ou oo i sea tulaga, ou te usuina le viiga e sili ona ou fiafia i ai ma ou taumafai e tuu foliga o Iesu i lo’u loto seia oo lava ina mafai ona ou teteeina. Afai tatou te teena pea i taimi uma ia manatu leaga, o le a o ese mai ia i tatou.
Jorge G., Venesuela
Sa ou pueina le ata lenei i Thessaloníki, Eleni. E faamanatu mai ai ia te au le ao pogisa i le miti a Liae (tagai i le 1 Nifae 8:22–24).
Kevin K., Siamani
Ata tusi o le tusi na saunia e Gene Christiansen; ata tusi o le moli o le ava na saunia e Scott Greer