O Le Tausaga Lenei O se Vao—Vele Ese

Saunia e Mont Poulsen

A o ou ola ae i Liae, Iuta, ISA, sa lava le tele o le faatoaga a lo’u aiga ma sa feauaua’i ona toto ai le sana ma le pateta i tausaga taitasi. I se tasi aso na fai mai ai lo’u tamā ou te tago e vele ia sana ae vele e ia ia pateta. A o o’u galue i se laina sana e ono-futu-le maualuluga (15 cm), sa ou maua ai se pateta ua matuai ese lona ola ma aulelei atu nai lo pateta i le itu o le faatoaga la e i ai Tama. Sa ou valaau atu ia te ia ma fesili atu, “O le a la’u mea a fai i lea?”

Sa le’i ea lelei mai i luga tamā. “Vele ese.”

Ona o lo’u talitonu na te le’i iloa mai o la sa ou tusi agai i se pateta, sa ou faasalavei atu ai, “Ae Tamā, e le o se vao. O se pateta.” Sa toe fai mai o ia e aunoa ma le tilotilo mai, “E le o le tausaga lenei. O le tausaga lenei, o se vao. Vele ese.” O lea sa ou faia ai.

Talu mai lena taimi sa ou mafaufau soo ai i le poto o upu a lo’u tamā. Sa ou iloa ai, o le usiusitai e le na o le faia o se filifiliga sa’o ae o le faia o se filifiliga sa’o i le vaitau sa’o. Pe a ou mafaufau i mea uma e finagalo le Tama Faalelagi ou te faia i lenei olaga, o le faia o na mea i le taimi sa’o e foliga mai e taua tele e faapei lava o le faia uma o na mea. Mo se faataitaiga, o le faia o se misiona, tafao faaamasani, faaipoipo, faia o se fanau, a’otauina, ma le amata ona faigaluega tumau o ni filifiliga sa’o ia. Ae a faia e tagata nei mea i le faasologa sese, e tele lava ina matautia ona taunuuga.

Sa aoao mai e le Tupu o Peniamina e faapea e tatau ona “faia nei mea uma … i le poto ma le auauai lelei” (Mosaea 4:27). Na aoao mai Elder Neal A. Maxwell (1926–2004) o le Korama a Aposetolo e Toasefululua, “O le faatuatua e aofia ai foi le faalagolago i le taimi a le Atua, aua na Ia fetalai mai, ‘O mea uma e ao ina oo mai i ona aso’(MFF 64:32).”¹

Ou te talitonu e faaseseina i tatou e Satani i le faatalitonuina lea o i tatou e faia mea sa’o i le faasologa sese: o feusuaiga a o lei faaipoipo, tafafao faamasani a o lei atoa le 16 tausaga, avea o se matua ona faatoa faaipoipo ai lea, ma isi lava mea. O poloaiga sili a le Atua, a oo ina fetuutuunai pe faaleagaina, ona avea lea ma laau e ola a o lei oo i le vaitau e tatau ai—o ni vao. Ina ua faaosoosoina au e ta’uamiotonuina le faia o le mea sa’o i le vaitau sese, sa ou faafetai lava mo le lesona taua a lo’u tamā: “E le o le tausaga lenei. O le tausaga lenei o se vao. Vele ese.”