Mi Vida, Mi Historia

O tala o le faatuatua ma musumusuga mai le Au Paia o Aso e Gata Ai i Latina Amerika.

Na faasoa mai e tagata o le Au Paia o Aso e Gata Ai i nei itulau a latou tala o le tuuto ma le talitonuga i le talalelei a Iesu Keriso i se faaaliga talu ai nei a le Falemataaga o Talafaasolopito a le Ekalesia. Ua fai i latou ma sui o le faitau miliona o tagata o le Au Paia i Latina Amerika.

E luasefulu fa tala na faaali i totonu o le Falemataaga o Talafaasolopito a le Ekalesia i le Aai o Sate Leki, Iuta, ia Iuni 2011. O loo mafai lava ona maimoaina lenei faaaliga tuufaatasi i luga o le initoneti i le lds.org/churchhistory/museum/exhibits/mividamihistoria.

Carmen Echeverría Wood

Na fanau Carmen i totonu o se aiga lotu i le Aai o Guatemala, Kuatemala. Ina ua iva ona tausaga, sa aoaoina e tamaitai faifeautalai o le Au Paia o Aso e Gata Ai le talalelei ia te ia ma lona aiga. Sa fiafia o ia e auai i le Peraimeri ma talanoa e uiga i se lagona fou o le fiafia i totonu o lona aiga. O se tausaga mulimuli ane, sa papatisoina ai le aiga. Fai mai o ia, “O se taimi e maeu, le matagofie lenei.” Na te manatua le asiasiga a Peresitene Tavita O. MaKei (1873–1970) i Kuatemala i le 1954 ma aoao atu i tamaiti le mataupu faavae o le sefuluai. I le 17 o ona tausaga na valaauina ai o ia e auauna atu i le Misiona a Amerika Tutotonu ma sa fiafia e faasoa atu “le faamoemoe mo se olaga sili atu ma le faatasia e faavavau.”

Miriam Puerta Amato

O Miriama o se tagatanuu o Pasila. Ina ua manao o ia e alu i se misiona, sa ia faatumuina ana pepa. I le fitu o vaiaso mulimuli ane, a o faatasi ai ma lona aiga i le fale, sa ia faitaua ai le tusi o loo valaauina ai o ia i le Misiona a Utah Salt Lake City Temple Square. Fai mai a ia, “Ina ua ou faitauina le tusi, sa ese le malie o le feei o lo’u aiga e pei lava ona latou faia pe a sikoa le au soka a le atunuu o Pasila. Sa ou fiafia foi, ma sa ou iloa na auina atu a’u e le Alii.”

Nelson Mousqués

E le’i leva lava ona fanau Nelson i Asunción, Parakuei, ae feiloai loa ona matua ma faifeautalai. “I se tasi aso a o nofonofo lo’u tamā i le faapaologa o lo matou fale, sa ia iloa atu Elder Higbee ma Elder Johnson ae na te le’i iloa o i laua o ni faifeautalai,” na toe manatua ai e Brother Mousqués. “Na fai atu o ia i lo’u tuafafine e aumai ni nofoa se lua aua, fai mai a ia, “O le a suia o tatou olaga e na alii talavou.’ Ina ua tuitui mai faifeautalai i le faitotoa, sa ia tatalaina ma fai atu, ‘Susū mai i totonu. Sa matou faatali atu mo oulua.’ Sa auai lo’u tama ma le matou aiga atoa i le Ekalesia.”

Robin Mendoza

Sa ola ae Robin i le tulaga mativa i Ekuatoa, ae sa manao o ia ia sili atu se olaga mo ia lava. I se tasi taimi, a o galue ai i se faatoaga mo le 12 itula i le aso, sa ia tatalo mo le taitaiga, ma sa feemo uila i le taimi o lana tatalo. Sa manatu Robin o lenei mea o se savali lea mai le Atua e faapea o loo i ai se faamoemoega o le olaga. “Sa ou iloa o o’u lagona na sau mai le Atua,” na manatua ai e Robin. Na iu ina ia iloa o le faatuatua, e mafai ai ona ia suia lona olaga. I le 16 o ona tausaga na alu ai e faigaluega i Guayaquil, ma o iina na ia papatiso ai. O musumusuga faaauau pea na taitaiina atu ai o ia i le Iunivesite o Polika Iaga, lea na ia faataunuuina ai lana sini o le mauaina o se aoaoga.

Ursula Binder Brock

E manatua e Sister Brock lona mafaufau i le uiga o le olaga i le na o le lima o ona tausaga. A o talavou o ia i Venesuela, sa aoao atu e faifeautalai le talalelei ia te ia ma lona aiga, ma sa papatisoina i latou. Sa tumu o ia i le faatuatua, ma sa valaauina o ia e avea ma se peresitene o le Peraimeri o le paranesi i le 16 o ona tausaga. I le taimi nei, ina ua maea se soifuaga o auaunaga, ua ia iloa ai mo ia lava o le, “faatuatua o se filifiliga.” Sa ia faamatala mai, “Sa ou filifili ina ia i ai se avanoa mo le Faaola i lo’u olaga. Ua ou iloa o le Togiola o le faatinoga aupito sili lea ona matagofie ma le le manatu faapito o le alofa mo tagata uma. Ua avea ma a’u uo mamae, lo’u Faaola ma le Togiola, o le Na te aumaia le filemu—o se tulaga faaauau pea mo a’u.”

Lincoln Peters

Sa nonofo Lincoln ma lona aiga i Santiago, Chile, seia oo ina maliu lona tina i le 10 o ona tausaga. Mulimuli ane, sa nofo o ia i le fafine ma le tamaloa o lona aiga. Ina ua 18 tausaga o Lincoln, na o mai ia Elder Barton ma Elder Bentley i lo latou fale. Sa vave ona talia e le fafine o le aiga o Lincoln ma lona tinamatua le talalelei, ae sa fealofa’i solo Lincoln mai faifeautalai. I se taeao o se tasi Aso Sa, sa sau ai i lona potu lona tinamatua o lē e masani lava ona agamalu, ma toso ese le ie o lona moega, ma fai atu ia te ia o le a latou o faatasi i le lotu. O lona te’i i lea amioga e le masani ai a lona tinamatua ma ona o lona faaaloalo ia te ia, sa ia tu ai i luga ma alu i le lotu. O lena aso, sa ia lagonaina ai se mea fou ma mamana i totonu o lona agaga ma na suia ai lona olaga. E le’i umi ae avea o ia ma uluai tagata na liliu mai i le Ekalesia i Chile.

Luis ma Karla Hernández

Na fetaui ia Luis ma Karla a o talavou i Honetura. Sa amata ona la tafafao faamasani ma sa le’i umi ae faaipoipo. O Luis, e le auai i le Ekalesia, ma e faamemelo lava i matua o Karla, lea e “faaalia e le tasi i le isi le faaaloalo ma le alofa, ma o lea tulaga na ou manao ai ia ou malamalama i o laua tulaga faatauaina.” E le’i leva a e papatiso loa ia Luis, ma sa faamauina ia Karla ma Luis i le Malumalu o le Aai o Kuatemala i Kuatemala. I le ta’i 30 ma ona tupu o o la tausaga, sa tulaga faaletonu ai le la mafutaga, ma tuua ai e Karla le aiga, ma fesiligia ai pe le o se mea sese lo la faaipoipo talavou. Sa anapogi ma tatalo Luis ma aioi atu i le Atua ina ia “toe aumai Karla i le aiga, ma sa Ia faia lava. Sa Ia faia.” Ua sili atu le malosi o le la ulugalii i le taimi nei nai lo se isi lava taimi.

Noemí Guzman de Abrea

Sa fanau Noemí i Atenitina, lea na auai ai lona aiga i le Ekalesia. Sa latou malaga atu i le Iunaite Setete a o talavou o ia. E ui i lona fiafia e avea ma se tagatanuu o Amerika, ae e sili atu lona fiafia pe a mafai ona ia iloa ia aganuu a Atenitina. “E matuai agalelei lava tagata, i Latina Amerika. E vave ona latou faamasani ia te oe; faauo ia te oe; ma faaaumea ia te oe. Latou te fiafia e faatasi ma aiga ma uo, ma taumafa i meaai lelei. O se mea matagofie tele lena, ma o le iloaina o lena vaega o le aganuu o se mea lea ou te le fia suia mo se isi lava mea.”

Omar Canals

I Iurukuei i le 1948, sa ofo atu e le tina o Omar lona faamalu i tamaitai faifeautalai e toalua o le Au Paia o Aso e Gata Ai. O se taunuuga la, sa amata ona latou talatalanoa ma faifeautalai, ma na papatiso mulimuli ane ai le tuafafine matua o Omar. Na fanau Omar i le 1948, ma o ia le pepe muamua na faamanuiaina i le Misiona a Iurukuei, lea na tatalaina i le 1947. Na papatiso Omar ma ona matua ina ua valu ona tausaga. I ni nai tausaga talu ona faaipoipo Omar ma lana manamea, sa la malaga atu ai i le Iunaite Setete. Sa avea lava o ia ma se tagata faasalalau, ma sa faafaigaluega ai Omar e le Ekalesia i le 1973 ma avea ai ma tagata faaliliu o le gagana Sipaniolo mo le konafesi aoao.

Ata na pueina e Mark J. Davis, Craig Dimond, Kent Miles, ma Craig J. Law