O Le Valaauga
“Ia fausia se fale i lo’u igoa, i lenei lava mea, ina ia outou faamaonia ai outou lava ia te au tou te faamaoni i mea uma ou te poloaiina ai outou” (MFF 124:55).
“Isaako, Isaako.” O le valaau lea a lona tina. “O loo manaomia oe e lou tamā i le pa o povi.”
Sa ea a’e i luga le ulu o Isaako ma autilo atu i le faamalama. E sa’o lava, ua i luga le la, ma o lona uiga ua oo i le taimi o feau. Sa tautevateva le tu a’e o Isaako mai lona moega ma aapa atu i lona mitiafu. Ua na lagona atu le fetagisi mai o povi.
A o ulufafo atu o ia i le faitotoa o le umukuka, sa ia vaaia Papa o taitai atu le aumatua i le faitotoa.
“O fea a e usu po i ai, Papa?” Sa fesili ai Isaako.
“I le pa. Ou te manao e te uuina le pakete saito ina le migoi ai Taurusi.”
Sa tagi leotele le povi, e pei o fesili, “O le a le mea lea ua tupu i lenei taeao?” Ae a o tuutuu atu e Isaako le pakete i lalo ifo o lona isu, sa filemu Taurusi ma amata ona etoeto ia saito i lona laulaufaiva umi. A o ‘ai le povi, sa nonoa e Papa le maea e taofi mau ai i le pa.
Ina ua oso mai Mama i luma o le faitotoa, sa fai atu i ai Papa, “E i ai sa’u galuega faatino faapitoa, Emeline. E mafai ona e aumaia faamolemole le penitala lautele kamuta mai le kesi?”
Ina ua toe sau Mama ma le penitala, sa tuu e Papa ni laupapa i luga o le palapala. Ina ua uma ona vaai lelei atu ia Taurusi, ona ia amata tusitusi ai lea i luga o le laupapa lamolemole samasama.
“O le a lau mea na e fai, Papa?” Sa fesili ai Isaako.
“Na tuuina mai ia ma’ua ma Uso Fordham se galuega taua mo le malumalu,” sa faamatala ane ai Papa. “O le a ma faia faatusa o povi e 12 e faatietie ai le faatanoa i le potu mo papatisoga. O lea ou te tusia le mamanu, ma o Taurusi o la’u ata faataitai lea.”
Ina ua faalogo atu i lona igoa, sa ea ae i luga le ulu o Taurusi, ona toe foi ai lea i lana ‘aiga o le taeao.
Sa vaavaai atu Isaako i le tusiaina e lona tamā o ni laina uumi, lautetele. “O lena ua amata ona foliga mai e pei lava o Taurusi,” o le tala lea a Isaako. “Ae aisea na e filifilia ai o ia?”
“Aua e malosi o ia ma o le povi aupito sili foi lea ua ou vaai i ai. Ua e vaai atu i lana tu? E foliga mai ua na iloaina lava lona taua. E usitai foi Taurusi.”
“O lenei galuega faatino o se valaauga e ese le faapitoa, Papa. A ea?”
“Ioe, Atalii, e sa’o. Ou te faafetai lava ina ua faatonuina au ou te fesoasoani.”
Sa milimili e Isaako le ua o Taurusi. Sa mafai ona ia lagonaina maso malolosi o le povi. “O se faamamaluga tele mo oe, toeaina,” na ia musumusu atu ai.
Sa vave ona faauma e Isaako ana feau. Na vave atu foi ona uma le faiga o lana lua tasene o pine laau faamau lavalava nai lo le mea e masani ai. Sa ia iloa e uma loa ona maua lea o le taimi e fai ai mea e manao ai.
O le asō, na manao Isaako e tusi ni ata. Na tuu atu e ona matua ia te ia le faatagaga e tusi ai ana ata i luga o le magalafu, e faaaoga ai fasi malala mai motumotu. Sa faigofie ona tape ese le malala, ma sa mafai ona ia faaaogaina e tusi ai laina lautetele pe lauiti foi.
A o tusi e Isaako le ata o Taurusi, sa mafaufau o ia i lona tamā ma le malumalu matagofie ua fausia i Navu. Afai e malosi ma usiusitai Isaako e pei o Taurusi, atonu o le a filifilia o ia e le Alii e galue i le malumalu, e faapei lava o lona tamā.
Ata na tusia e Jim Madsen