Puipuia o La’u Suesuega—ma le Tusi a Mamona

Scott Macdonald, Kalefonia, ISA

Ao avea a’u ma se tagata aoga i le iunivesite, o le polokalama maualuga sa ou lesitala ai na manaomia ai tagata aooga e tusi se suesuega. O suesuega a tagata aoga taitoaitasi sa tatau ona vaavaaia ma faamaonia e ni polofesa se toalua.

Mo la’u suesuega na ou filifili ai e suesue ma sailiili i tala o taua i totonu o le Tusi a Mamona. Sa ma talanoa ma se tasi o polofesa e uiga i lo’u manatu, ma na ioe o ia e avea ma se tasi o a’u supavaisa. Sa na fautuaina mai foi se isi polofesa e ono avea ma se supavaisa faaolioli lona lua.

Sa ma feiloai ma le polofesa lona lua e faamatala i ai le autu o la’u suesuega. O le taimi lava na ou ta’ua ai le Tusi a Mamona, na suia ai ona uiga ma amata ona ia faitio i le Ekalesia. Sa ou faalogologo ma le filemu se’i uma ana faamatalaga ona ou faamalamalama puupuu atu lea i ai, ou te iloa e le malamalama o ia i o tatou talitonuga. E le’i foliga mai na talitonu o ia, ae na ou te’i i lona ioe mai e na te taitaia la’u suesuega.

Ina ua uma le toetoe o se tausaga atoa o sailiiliga ma tusitusiga, sa ou tuuina atu loa la’u suesuega mo le faamaoniga a faiaoga. I le aluga o lena tausaga, sa taliaina ai a’u i le aoga faaloia, ma sa manaomia lo’u faamaeaina o lenei galuega faatino ina ia ou faauu ma agai ai i luma.

E tusa ma se vaiaso ae ou maua se i-meli mai le polofesa lea na faitioina le Ekalesia. Sa fai mai o ia ma te feiloai i lona ofisa.

Ina ua ou taunuu atu, sa fai mai o ia e tapuni le faitotoa ae ou nofo i lalo. I le taimi lava lena, sa ia osofaia ai a’u i ni faamatalaga—e le faatatau i la’u suesuega ae e uiga i le Tusi a Mamona. I le to’a na ou mafaia ai, na ou tuuina atu ai la’u molimau e uiga i le Tusi a Mamona.

Sa ou fesili atu i le polofesa ma le le mautinoa pe o le a ia faamaonia lava la’u suesuega. Na fai mai o ia e leai.

Sa ou alu i le fale ma le lagona faanoanoa ma le le mautonu i se mea a fai. A aunoa ma le faamaoniga a lenei alii, e ono le maua so’u avanoa ou te faauu ai mai le polokalama maualuga ae ou amata i le aoga faaloia. Ae sa ou tatalo pea ina ia lelei mea uma.

Ina ua ou faamatalaina atu lo’u tulaga i le isi polofesa lea na taitaia la’u suesuega, sa ia fautua mai ou te asiasi atu i le polofesa i le aso e sosoo ai ma toe tuu atu i ai se isi avanoa na te faamaonia ai la’u suesuega.

O le taeao na sosoo ai, sa ou faatalitali ai i fafo o le ofisa o le polofesa. Sa ou gatete, ma lē mautonu pe o le a faapeī sana tali mai pe a toe vaai mai ia te a’u. Ina ua ia taunuu mai, sa ia tatalaina lemu le faitotoa o lona ofisa, ma geno mai ou te alu atu i totonu. E aunoa ma se upu na fai mai ai, sa ia aumaia ai se peni ma saini la’u suesuega, ma tuuina aloaia mai ai ia te a’u lana faamaoniga. Na te le’i tuuina mai se faamalamalamaga o le mafuaaga na suia ai lona mafaufau ae na ataata mai ia te au ina ua ou faatofa atu i ai.

Ou te faafetai ona sa ou maua le avanoa e tuuina atu ai la’u molimau i lenei tamalii. Ou te iloa pe a tatou tutu atu mo mea tatou te talitonu i ai, o le a faamalosia ma faamanuia i tatou e le Tama Faalelagi.

I le taimi lava lena, sa osofaia ai a’u e le polofesa i ni faamatalaga malolosi—e le faatatau i la’u suesuega ae o le Tusi a Mamona. I le to’a na ou mafaia ai, na ou tuuina atu ai la’u molimau e uiga i le Tusi a Mamona.