Taitaiina Oe i le Aiga
Mai se saunoaga i le konafesi aoao ia Aperila 2010.
E manao lo tatou Tama Faalelagi alofa ia toe foi atu Ana fanau agaga uma ia te Ia. Na Ia auina mai Lona Alo, o Iesu Keriso, e faia se alavaa saogalemu. Na Ia tuuina foi taiala ma tagata laveai e fesoasoani i Ana fanau i le ala. O matua, uso ma tuafafine, matua o matua, uso o tina, ma uso o tamā ma tuagane o tina, o ni taiala ma ni au laveai malolosi ia.
E fesoasoani foi le au galulue i le Peraimeri e taiala le fanau. O se tamaitai, a o talavou o ia, sa i ai i le au faatonu aoao o le Peraimeri sa fesoasoani i le faiga o le mautauave o le FMT. Sa faiaoga o ia i le Peraimeri o lana uarota seia lata ina atoa lona 90 tausaga. Sa lagonaina e fanau laiti lona alofa mo i latou. E sili i lo mea uma, ona o ana faataitaiga sa latou lagonaina ai ma iloa le Agaga Paia.
I se tasi aoauli sa ave atu ai e lo’u toalua lo ma atalii matua i le fale o se tamaitai sa aoaoina o ia e faitau. Sa tatau ona ou pikiina o ia pe a ou manava mai i la’u galuega.
Sa vave ona uma lana lesona nai lo le mea sa ma manatu ai. Sa ia mautinoa na ia iloaina le auala i le fale. O lea na amata ai ona savali o ia. Ina ua tusa ma le afa maila (0.8 km) lana savaliga, sa amata ona pogisa. E lei taitai lava ona oo o ia i le fale.
Sa ia tau le iloaina moli o taavale a o pasia o ia ona ona loimata. Sa ia iloaina sa ia manaomia se fesoasoani. O lea na ia aluese ai mai le auala ma maua se nofoaga e tootuli ai.
Sa mafai ona ia lagona atu i le togavao le agai mai o leo ia te ia. Sa faalogoina e ni talavou se toalua lana tagi. Sa la fai atu lea, “E mafai ona ma fesoasoani atu ia te oe?” Sa ia fai atu o ia ua se ma ua fia alu i le fale. Sa la fesili pe na te iloaina le numera telefoni o le fale po o lona tuatusi. Na te lei iloaina. Sa la aveina o ia i se nofoaga lata ane e nonofo ai i la’ua. Sa la mauaina le igoa o lo matou aiga i se tusi telefoni.
Ina ua ou maua le telefoni, sa ou faanatinati atu e laveai, ma le faafetai ona sa tuuina ni tagata agalelei i lona ala e agai i le fale. Ma e le uma lo’u agaga faafetai aua sa aoaoina o ia e tatalo ma le faatuatua ia oo mai le fesoasoani ina ua leiloa.
Ou te molimau atu e alofa le Alii ia te outou ma fanau uma lava a le Atua. A outou mulimuli i le taitaiga musuia i lenei Ekalesia moni a Iesu Keriso, e mafai ona laveaiina outou ma le saogalemu i lo tatou aiga i le Tama Faalelagi ma le Faaola. ◼
Ata na tusia e Jennifer Tolman; ata na pueina e Robert Casey