O O’u Aso Paionia i Calgary

Lorraine Gilmour, Ontario, Kanata

Sa ou fanau i le 1947 i se tamai nuu i Egelani i matu. Ina ua 15 o’u tausaga, sa faailoa atu a’u i faifeautalai e ni uo, ma ou auai ai i le Ekalesia. Peitai, sa le’i auai lo’u aiga.

A o ou aoao e uiga i paionia anamua o le Ekalesia, sa ou lagona le pei na ou faimamago i le leai o so’u talatuu o tuaa na sopoia ia laufanua valevalenoa. Ae a o o’u agaigai pea i luma i le talalelei, na suia o’u lagona.

Sa oo ina ou malamalama, na faavaeina e paionia anamua le ala mo tagata e pei o a’u ou te auai ai i le Ekalesia. O faifeautalai e toalua sa faailoaina mai ia te au le talalelei o ni tagata na tutupu mai i na paionia, o lea la e telē la’u aitalafu i tagata paionia. Sa ou lagona le fesootai atu ia i latou i se auala faapitoa.

Sa ou iloa ai foi e i ai so’u talatuu o tagata agaalofa, ma galulue malosi o e na ositaulaga, ma galulue, ma tau foi i ni taua ina ia mafai ona ou maua mea latou te le’i maua ma aumaia ia te a’u le saolotoga lea ua ou fiafia ai i le aso. E le’i auai o’u matua i le Ekalesia, ae na la faafaileleina a’u i ni tulaga faatauaina ma ni aoaoga lelei sa faapea ona saunia ai a’u e talia le talalelei.

Na ou iloaina mulimuli ane, e tele ituaiga paionia. O a’u o se augatupulaga muamua ua auai i le Ekalesia. Sa le’i fiafia lo’u aiga i la’u filifiliga e papatiso, o lea sa faigata ai ia te au ona ou auai i a’u sauniga. Sa taumafai lava si a matou tamai paranesi ona o le le lava o tagata, aemaise lava o e umia le perisitua. Mulimuli ane, na faamaonia ai o le a tapunia le matou paranesi e le misiona.

O se taunuuga la, sa ou filifili loa e siitia atu i Kanata, ma o se tasi lea o faaiuga na sili ona faigata sa ou faia. Na o a’u lava le tama a o’u matua ma sa ou alofa tele ia i laua, e pei foi ona la alolofa ia te a’u, ae e ono lamatia la’u molimau pe ana ou nofo ai i se eria lea e le mafai ona auai ai i le lotu. Ou te manatuaina pea le po na ou alu ese ai—na tamoe lo’u tama i autafa o le nofoaafi ma feula mai ni kisi ia te a’u ao tilotilo mai lo’u tina. Na nutimomoia lou loto, ae na ou iloa e tatau ona ou alu ese.

Sa ou taunuu i Calgary, Alberta, i le Aso o Tina ia Me 1967. Sa matou o i le lotu faatasi ma tagata o le ekalesia sa ou nofo ai ma sa ou tagi i le taimi atoa o le sauniga. Ou te manatua lo’u tusia o ni tusi i o’u matua a o tafe ifo o’u loimata, ma ta’u atu ia i laua sa ou fiafia i Kanata ae sa ou matuai misia lava Egelani faapea lo’u aiga.

Sa ou tauivi e faamasani i lo’u olaga fou, ma le mafatia i lou ma’i manatu i lo’u aiga, tuua toatasi, ma faanoanoaga, ae sa ou tumau faamaoni pea i le talalelei. Na ou auai i a’u sauniga uma ma talia valauaga. O o’u aso paionia ia.

Mulimuli ane, sa ou feiloai i lo’u toalua. Sa faamauina i maua i le Malumalu o Cardston Alberta ma tausia se fanau e toatolu i le Ekalesia.

O taimi uma lava ou te toe foi ai i Egelani, e faatumulia a’u i mea e manatua o lo’u liliuga ma e le mafai ona faagaloina lou agaga faafetai mo o’u faamanuiaga. O fea semanu ou te i ai i le asō pe ana ou le maua le lototele e faia ai se filifiliga faigata ma mulimuli ai i le Agaga?

O le a faavavau ona ou faafetai i paionia anamua i totonu ma fafo atu o le Ekalesia o e na asaina le ala ua mafai ai e a’u faapea foi ma isi e pei o a’u ona faalogo i le talalelei. Na aumaia e i latou o e na muamua atu ia te a’u le avanoa ma le lototele e avea ai ma se paionia faaonapo nei.

Ou te manatuaina pea le po na ou alu ese ai—na tamoe lo’u tama i autafa o le nofoaafi ma feula mai ni kisi ia te a’u ao tilotilo mai lo’u tina. Na nutimomoia lou loto, ae na ou iloa e tatau ona ou alu ese.