Pe a Ou Toe Feiloai i Lo’u Tuagane

María Isabel Parra de Uribe, Mekisiko

A o o’u laitiiti, sa ou matuai manao lava i lo’u tuagane o Juan Fernando, ia tamoe ma taalo e pei o isi tamaiti. Ina ua ou fesili atu i lo’u tina pe aisea na le mafai ai e lo’u tuagane, ae fai mai o ia na afaina lona faiai i le taimi na fanau ai ona o le le lava o le okesene ma o le a le mafai ai lava ona ia faia na mea.

Sa faaaluina e lo’u tuagane lona olaga atoa i le taoto. Ona sa ou ola ae i le Ekalesia, o lea sa ou malamalama ma talia ai lona tulaga ma iloa le maoae o lona agaga. Ae ui i lea, sa naunau lava lou loto laitiiti ina ia pei o ia o isi, e ui lava ina sa le mafai ona ou vaai faalemafaufau pe o le a faapeī le vaai atu ia te ia o savali pe tamoe pe tautala foi.

Sa ou popole po o ai o le a tausia o ia pe afai e maliliu muamua ia tagata uma o le aiga nai lo ia. I a’u tatalo ma lo’u loto sa ou aioi atu ai i le Tama Faalelagi ia aua nei Ona aveina atu muamua i matou nai lo Juan Fernado. Sa ou iloa o le a Ia tali mai ia te au.

Na maliu lo’u tuagane i le 16 o ona tausaga i se aoauli o le taumalulu, ma tuua ai se avanoa tele i totonu o lo matou aiga. Sa matou lagonaina le faanoanoa ae sa i ai foi le faamoemoe. Ina ua mavae ni nai aso talu ona maliu o ia, sa ou moe ai a o ou mafaufau ia te ia ma ou faia ai se miti matagofie.

Sa ou savali, ae na puaoa la’u vaaiga i ao. Sa mafai ona ou iloa mamao atu se mea, o lea sa faaauau ai pea ona ou savali lemu atu i ai. A o ou latalata atu i ai, sa ou vaai ai i se taavaletoso e tumu i fugalaau matagofie. Ao o’u sioa atu i ai, sa ou vaaia ai se alii talavou aulelei, na ofu i ni ofu papae, ma o loo tutu i autafa o le taavaletoso. Sa ou tu mo se taimi, ma taumafai e matau atu o ia, ona ou iloa ai lea o lo’u tuagane lea. Sa ou matua fiafia lava e vaai atu ia te ia. Sa ia talanoa mai ia te a’u, ma sa ou manao e opo mai ma sogi atu ia te ia. Ona ou ala ai lea i luga.

Sa ou faafetai lava ona sa ou faalogo i lona leo ma vaai i lona tulaga atoatoa. Tafefe i le taimi o le a matou toe feiloai ai. Ou te mautinoa o le a i ai ni feopoaiga ma ni feasogi ma upu alofa—e faafetaia ai lava le Togiola a Iesu Keriso. O le a toetutu tagata uma mai le tuugamau ma toe faatasia o ni aiga ona o le Faaola, ma o le a le toe tetea ese lava.

Ou te manatuaina upu a Amoleka: “E toe faatasia le agaga ma le tino i lona uiga atoatoa; o ivi atoa ma gaugaivi e toe faatuina i le tino e tatau ai” (Alema 11:43).

Ou te faafetai mo le talalelei toefuataiina a Iesu Keriso, lea e aumaia ai le filemu i lo’u agaga. Ou te iloa o le a ou toe vaai i lo’u tuagane i se aso.