I Le Lalolagi Atoa
Fai mai Elder Perry, E Tatau Ona Avea le Autalavou Matutua ma Tupulaga Silisili.
“Ua ou vaai i le mana naunautai faaleagaga o le autalavou matutua i lenei Ekalesia,” o le saunoaga lea a Elder L. Tom Perry o le Korama a Aposetolo e Toasefululua, i se faeasaite a le Ofisa o Aoga a le Ekalesia, sa faasalalauina mo le autalavou matutua i le aso 6 o Mati, 2011. “Ua ou iloa lo outou malosiaga.”
Sa ia aoaoina atu ni mea se fa o le a fesoasoani i le autalavou matutua e faataunuu ai mea latou te gafatia ma fesoasoani ai i isi ia toe maua lo latou faatuatua ia Keriso: tatalo i aso uma, suesue i tusitusiga paia i aso uma, agavaa mo le malumalu, ma galuega auauna atu i aso uma.
“O outou o le tupulaga ua faasaoina e le Alii mo lenei taimi. … Ou te luiina outou ia avea ma ‘tupulaga silisili,’” na saunoa ai Elder Perry.
Faitau, faalogologo i ai, pe maimoa i le saunoaga i le tele o gagana i le institute.lds.org. Kiliki i le CES Firesides, ona filifili lea o se gagana.
Na Ta’u Atu e Elder Cook i le Au Paia i Asia, O Le Talalelei e Aumaia ai le Olioli
Mai le aso 12 e oo i le aso 20 o Fepuari, 2011, na asiasi atu ai Elder Quentin L. Cook o le Korama a Aposetolo e Toasefululua i le Au Paia i Korea ma Iapani.
Sa ia aoao atu i tagata o le Ekalesia i Seoul, Korea, e tatau ona tatou faafetai mo mea ua tatou maua nai lo le taulai atu i mea tatou te le o maua. Sa ia faamanatu atu ia i latou, o le talalelei e aumai ai le olioli, fiafia, ma le filemu o loo tatou sailia uma.
Sa feiloai foi Elder Cook ma le au tusitala mai nisi o nusipepa mo se fonotaga o fesili-ma-tali.
Sa faaaluina e Elder Cook le taimi e aoao atu ai, fautuaina, ma le taliina o fesili mai faifeautalai o le Misiona a Korea Daejeon ma sa auai i se konafesi a taitai perisitua mo le eria a le Misiona a Korea Daejeon.
Sa faaiuina le asiasiga i le auai atu o Elder Cook i se konafesi faalesiteki sa faia i le Siteki a Cheongju Korea, o le taimi muamua lea ua asiasi atu ai se Aposetolo i le siteki.
Sa auai foi Elder Cook i se konafesi a taitai perisitua i Kobe, Iapani, ma le konafesi a le Siteki o Okayama Iapani; sa feiloai foi ma sui mai Meiji Shrine i Tokyo, Iapani; ma faia foi se asiasiga puupuu i Viatename.
O Tulafono e Mafai Ai ona Tatou Ausia o Tatou Tulaga Gafatia, na Saunoa ai Elder Christofferson
“Ua faasafua mai e le Atua ia i tatou, o Lana fanau, le avanoa ma le tiutetauave e faavae ai ni tulafono ma ni faiga faaletulafono e limataitaiina ai sootaga ma amioga a tagata,” o le saunoaga lea a Elder D. Todd Christofferson o le Korama a Aposetolo e Toasefululua i sui o le Sosaiete a J. Reuben Clark i le aso 4 o Fepuari. Sa ia saunoa i le tiute o le tulafono i le faatagaina o tagata taitoatasi ia ausia o latou gafatia atoatoa i lenei olaga ma le olaga a sau.
Sa faamanatu atu e Elder Christofferson i le aofia e faapea, “e le mafai ona tatou ausia le faamasinoga tonu mulimuli e ese mai ia Iesu Keriso,” ma o le “lelei aupito sili e mafai ona tatou faia e fesoasoani ai i isi ia avea ma tagata e mafai ona latou oo i ai, o le taitai atu lea o i latou i le Faaola.” Sa ia molimau atu i le mana o le Faaola e faasa’o ai mea sese ma “suia o tatou le atoatoa ma ta’uamiotonuina i tatou i luma o lena tulafono lea e mafai ai ona avea i tatou o ni suli faatasi ma Ia i le ola e faavavau.” Sa ia faaiuina i lana molimau o loo soifua ia Keriso.
I le taimi foi o le faeasaite, sa tauaao atu ai ia Elder Christofferson le Taui mo Auaunaga Maoae a le Sosaiete a J. Reuben Clark Law mo lona sao i galuega faaletulafono.
Na Faamamafa Atu e Sister Beck le Matafaioi o le Aualofa i le Fuafuaga a le Atua
Sa feiloai le peresitene aoao o le Aualofa o Julie B. Beck ma le toeitiiti 10,000 o uso ma taitai o le Aualofa i le lotoa o le BYU–Idaho i le aso 26 o Fepuari, 2011, e faamalosia o latou faatuatua ma uunaia i latou i a latou matafaioi i le Aualofa ma i le ata o le faaolataga.
I se sauniga lautele ma se sauniga o aoaoga mo le au taitai, sa taulimaina ai e Sister Beck ia fesili mai tamaitai ma taitai perisitua mai le silia i le 40 o siteki i Idaho, sautesasae, ISA.
Sa molimau atu Sister Beck, a o manatua ma teufatuina e i latou o loo aafia i le galuega o le Aualofa ia faamoemoega o le Alii, ma faataunuu Ona faamoemoega iinei i le lalolagi, o le a faamanuiaina, faamalolosia, faamamaina, ma faamaloloina i latou.
“Ua i ai sa tatou faalapotopotoga ua faatuina e le Alii e faamanuia ai Ona afafine,” na ia saunoa ai. “O loo silafia oe e le Alii, aua o Lana galuega lea. O le a Ia faamalosia ma faalauteleina oe.”
Faitau atili i mea na aoao mai e Sister Beck ma maimoa i se vitio e faatatau i ai i le news.lds.org. (O le vitio ma le anotusi e na o le Igilisi e maua ai.)
I lana malaga i Korea i Saute, sa faamanatu atu ai e Elder Quentin L. Cook i le Au Paia o Aso e Gata Ai, o le talalelei e aumai ai le olioli ma le filemu o loo tatou sailia. O loo maua ata faaopoopo i le news.lds.org.
Ata na pueina e geon woo jun