O Le Galue O Se Mataupu Faavae e Faavavau

Sa galulue lo tatou Tama Faalelagi ma Iesu Keriso e foafoa le lagi ma le lalolagi. Sa La foafoaina le la, le masina, ma fetu. Sa la faapotopotoina le sami ma faia ia alia’e le laueleele matutu ma laau ina ia ola ai. Ona La foafoaina lea o meaola uma i le sami ma luga o le laueleele. (Tagai i le Kenese 1; Mose 2.) Ua faaalia i la La’ua faataitaiga o le galue e taua i le lagi ma le lalolagi. (Tagai foi i le Ioane 5:17; 9:4.)

Ina ua foafoaina e le Atua le tane ma le fafine i Lona lava faatusa, sa Ia tuuina i laua i le Faatoaga o Etena (tagai i le Kenese 1:26–27; 2:8). Mulimuli ane, ina ua tuliesea i laua mai le faatoaga, sa fetalai atu le Alii ia Atamu, “E te ‘ai foi au mea e ‘ai ma le afu o ou mata” (Kenese 3:19). Talu mai lena taimi, na galulue Atamu ma Eva ina ia tausia o laua manaoga ma manaoga o le la fanau (tagai i le Mose 5:1).

Talu mai le taimi o Atamu ma Eva, ua avea le galue ma se ituaiga olaga mo i tatou uma i le lalolagi. Tatou te galulue e saunia mea mo le manuia faaletino, faaleagaga, ma le faalelagona mo i tatou lava faapea ma o tatou aiga. E taumafai matua e faatulaga ni aiga e aoaoina ai le mataupu faavae o le galue. O le tuuina atu i le fanau o ni galuega e fai e fetaui ma o latou tomai ma faamalo atu ia latou taumafaiga, e fesoasoani lea latou te maua ai ni aafiaga lelei o le galue. O se taunuuga, e mafai ona latou atiina ae se talitonuga malosi i le galue, se uiga lelei, ma ni tomai masani.

E tatau foi ona tatou saili ia maua le paleni lelei i le va o le galue ma le malolo. E ono aso i le vaiaso, e mafai ona tatou maua faamanuiaga a o tatou manatua e faafefiloi le galue ma gaoioiga e toe faafouina ai lo tatou malosi. Ae peitai, i Aso Sa, ua folafola mai e le Alii ia i tatou ni faamanuiaga faapitoa pe a tatou usitaia Ana poloaiga ina ia aloese mai le faia o a tatou galuega faaletino ae ia tausi le aso Sapati ia paia (tagai i le Esoto 20:9–11; MFF 59:9–19).

O le galue o se vaega o le fuafuaga a lo tatou Tama Faalelagi mo i tatou i le lagi ma le lalolagi. Afai tatou te amiotonu, o le a tatou toe foi atu e mau faatasi ma Ia. O iina o le a faaauau ai pea ona tatou maua avanoa e galulue ai a o tatou fesoasoani i le fausiaina o le malo o le Atua (tagai i le Mose 1:39).

Tatou te nafa ma le tausiga o i tatou lava ma o tatou aiga.

Ua i ai i matua se tiute paia e tausia a latou fanau (tagai i le MFF 83).
O le a faamanuiaina le fanau a o latou tausiaina o latou matua matutua (tagai i le 1 Timoteo 5:3–4, 8).
E tatau ona tatou fesoasoani atu i tagata o tatou aiga lautele pe a talafeagai ai.

E oo mai faamanuiaga ia i tatou o se taunuuga o le galue.

E faamalolosia o tatou uiga faaletagata ma atiina ae tomai o le galue.
Tatou te lagonaina le olioli i le fuafuaga a le Atua mo i tatou i le lalolagi.
Tatou te lava saunia ma ola faalagolago le tagata ia te ia lava pe a tatou faaputuina se sapalai o meaai, vai, ma isi mea e manaomia mo le tolu masina.

A o tatou fesoasoani atu i le tasi ma le isi ma tausoa le mamafa o a tatou galuega, e oo lava i le avega e sili ona mamafa o le a faapea ona faamāmāina.