O Lo Tatou Talatuu Faamamaluina o Paionia
E tele ni mea e mafai e i tatou uma ona aoao mai i o tatou tuaa paionia anamua, o a latou tauiviga ma mafatiaga na faafetaiaia ma le lototele naua ma le faatuatua mausali i se Atua soifua
O Mafatiaga o Paionia
“O lena malaga muamua o le 1847, lea sa faatulagaina ma taitaia e Polika Iaga, ua faamatalaina e tagata tusitala faasolopito, o se tasi o tala e maoae le mataina o le talafaasolopito o le Iunaite Setete. E faitau selau paionia Mamona na pagatia ma maliliu i faama’i, leai ni malutaga, pe na matelaina foi. Sa i ai nisi sa leai ni a latou taavale solofanua ma ni solofanua, ma na faapea ona savavali atu i le 1,300 maila (2,000 km) i fanua valevalenoa, ma ui atu i atumauga, ma toso ma tulei ni taavaletosolima.”1
Faatuatua Musuia
“E tele ni mea e mafai e i tatou uma ona aoao mai i o tatou tuaa paionia anamua, o a latou tauiviga ma mafatiaga na faafetaiaia ma le lototele naua ma le faatuatua mausali i se Atua soifua. … O talavou ma tamaiti, o nisi ia o le faitau afe o i latou sa tosoina ma tuleia taavaletosolima, pe na savalia lena auala o paionia, e faapei foi o le Au Paia i aso nei o e o loo avea ma paionia i o latou lava eria i le lalolagi atoa. Ou te manatu e leai se tagata o lenei Ekalesia i aso nei e lei ootia i tala e uiga i paionia anamua. O i latou sa faia le tele o mea mo le manuia o tagata uma, na mautinoa lava o lo latou faamoemoe o le musuia o le faatuatua. Ua latou ausia lenei sini i se auala matagofie.”2
Taulimaina o Faigata
“O itulau ua leva o se api talaaga ua pefua a se paionia o loo faamatalaina ai ma le ootia e faapea: “Na matou punonou i se tatalo ma le lotomaulalo i le Atua Silisiliese, ma loto na tutumu i le faafetai ia te Ia, ma faapaiaina lenei laueleele ia te Ia mo se nofoaga e aumau ai Lona nuu.’
“Na faamatala e se tasi sa i ai iina ao tamaitiiti ia fale le lelei i upu nei: “Sa leai se faamalama o lo matou fale. Sa leai foi se faitotoa. Sa tautauina e lo’u tina se palanikeke tuai, lea na avea ma a matou faitotoa i le taumalulu muamua. O lo matou potumoe lenei, potu malolo, potu nofonofo, umukuka, potu e momoe ai, o mea uma lava e faia i totonu o lenei potu pe tusa ma le 12 i le 16 futu [3.6 i le 4.9 m]. Ou te matuai le iloa lava pe na faapefea ona matou nonofo lelei ai i totonu. Ou te toe manatua upu na fai mai ai si o’u tina pele, e leai se masiofo sa ulu atu i lona maota na sili atu ona fiafia ma mitamita i le malutaga ma faamanuiaga a le Alii nai lo ia i le taimi na ulu atu ai i lena ana ina ua uma ona eli.’
O tofotofoga na, ma faigata, ma tauiviga, ma tiga o aso anamua. Sa faafetaiaia ma le lototele ma le faatuatua mausali i le Atua soifua.”3
O Paionia i Aso Nei
“Tatou te faamamaluina i latou o e sa onosaia faigata uiga ese. Tatou te viia o latou igoa ma manatunatu i a latou osigataulaga.
“Ae faapefea o tatou taimi? O i ai ea ni aafiaga faapaionia mo i tatou? Pe o le a manatunatu ea tupulaga o le lumanai ma le agaga faafetai i a tatou taumafaiga, ma a tatou faataitaiga? O outou na le autalavou, e mafai ona avea outou ma ni paionia i le lototele, i le faatuatua, i le alofa mama, i le naunautai.
“E mafai ona outou faamalosi atu i le tasi; o loo i ai ia te outou le malosiaga e iloa ai i latou e le o amanaiaina. Afai e i ai ni o outou mata e vaai ai, ma ni taliga e faalogo ai, ma ni loto e lagona ai, o le a mafai ona outou aapa atu ma faasaoina mai i latou tou te tupulaga.”4
O Le Paionia Tupito
“O le susueina o itulau o le talafaasolopito faatusi paia mai le amataga e oo i le iuga, tatou te aoao ai i le paionia tupito—o Iesu Keriso. Na muai ta’u mai Lona soifua mai e perofeta anamua; o Lona afio mai i le tulaga o le olaga na fofogaina mai e se agelu. O Lona soifua ma Lana galuega ua suia ai le lalolagi. …
“O loo ta’ua i se fuaiupu se tasi o le tusi a Galuega e faapea: Na ‘femaliuai [Iesu] ma agalelei … aua sa ia te ia le Atua’ (Galuega 10:38). …
“O Lana misiona, o Lana galuega i tagata, o Ana aoaoga o le upumoni, o Ana galuega o le alofa tunoa, o Lona alofa e le maluelue mo i tatou e uunaia ai lo tatou agaga faafetai ma fiafia ai o tatou loto. O Iesu Keriso, le Faaola o le lalolagi—le Alo o le Atua—o le paionia tupito, aua na muamua atu o Ia, e faailoa atu i isi tagata uma le ala e mulimuli ai. Ia tatou mulimuli ia te Ia.”5