Pe tetee le Ekalesia i taaloga vitio uma pe na o ata tau?

E tele taaloga vitio e mama, faigata, ma malie, ma o nisi o taaloga e toatele le au taaalo e mafai ona avea ma se gaoioiga toatele faafiafia. E le o tetee le Ekalesia i taaloga vitio, ae o loo uunaia le autalavou ina ia atamamai i a latou filifiliga o taaloga ma le tele o le taimi latou te faaaluina ai. Ua poloaiina i tatou e faaaoga ma le atamai o tatou taimi (tagai i le MFF 60:13). E le faapea a mama ma malie se mea o le a talafeagai ai le faia.

Na faamalamalama mai e Elder M. Russell Ballard o le Korama a Aposetolo e Toasefululua: “O se tasi o auala a Satani … e faavaivai ai lou malosi faaleagaga o le uunaia lea o oe e faaalu se vaega tele o lou taimi e faia ai ni mea e laitiiti lava sona aoga. Ou te talanoa atu i nisi o mea e pei o le nofo ai lava mo le tele o itula e matamata i le televise po o vitio, taalo i taaloga i vitio i po uma, [po o le] faasee i luga o le Initoneti” (“Be Strong in the Lord,” Ensign, Iulai 2004, 13).

E leai se afaina i le faaaluina o sou taimi e taalo ai i taaloga vitio lea e talafeagai ma tulaga o ala o faasalalauga o loo maua i le Mo Le Malosi o le Autalavou. Ae ia naunau e tuu i lalo ia ki faatonutonu pe tape le komepiuta ae agai atu i se isi mea. Aua nei faatagaina ia taaloga vitio e taofia mai oe i le faia o isi gaoioiga aoga e pei o le faamalositino, suesue i le talalelei, faia o meaaoga, po o le faaaluina o le taimi ma lou aiga.