Sa tatau ona avea le Agaga Paia ma a tatou soa tumau, ae ou te le iloa pe ou te lagonaina le Agaga i taimi uma. E i ai se mea o sese ia te au?

Afai o loo e agavaa ae e te le o lagonaina le Agaga i taimi uma, o lona uiga atonu o loo e aoao pea e iloa ma galue i le taitaiga a le Fesoasoani Sili. Na faamalamalama mai e Elder David A. Bednar o le Korama a Aposetolo e Toasefululua, “Tusa lava pe tatou te taumafai e faamaoni ma usiusitai, e i ai taimi e le iloagofie ai i o tatou olaga le taitaiga, faamautinoaga ma le filemu o le Agaga” (“Ina ia Tatou Maua Pea Lona Agaga e Faatasi ma i Tatou,” Liahona, Me 2006, 29).

Afai e te le o iloa pe o faatasi le Agaga Paia ma oe, ia faaavanoa se taimi e te filemu ai ma faalogo. Atonu e te lagonaina le uunaiga a le Agaga i se faamautinoaga filemu, ma le toafilemu. Taumafai ia e iloa le leo lemu, ma le itiiti pe a o e faia ni mea e valaaulia ai le Agaga, e pei o le tatalo, suesue i tusitusiga paia, po o le auai i sauniga faamanatuga. Pe a e faatinoina musumusuga ma faataitai ona faalogo i le Agaga, o le a faaleleia atili ou tomai e iloa ai na lagona filemu ma le maaleale.

E tatau ona e ola agavaa ina ia mafuta le Agaga ma oe (tagai i le Mosaea 2:36). Afai e te le o lagonaina le uunaiga a le Agaga i lou olaga, masalo o se faailoga lea o le lapataiga e tatau ona e salamo ma toe iloilo au mea e faamuamua. E mafai ona e valaaulia le Agaga i lou olaga pe a e salamo faamaoni, tatalo, suesue i tusitusiga paia, ma faia isi gaoioiga musuia.