Aisea e tatau ai ona lilofia atoa i tatou i lalo o le vai pe a tatou papatiso?

Masalo na e auai i se papatisoga lea e toe fai faalua ai le papatisoga o se tagata o loo papatisoina ona e le’i lilofia atoa o ia i le vai i le taimi muamua. Ona o le papatisoga o se sauniga faaola, o lea e tatau ai ona faatinoina tonu ma le sa’o.

O le papatisoga o se faatinoga faafaatusa. Ua “faatusaina i le maliu, tanumia, ma le toetu, ma e na o le faatofu lava e mafai ona faataunuuina ai” (Bible Dictionary, “Baptism”). O le faatofuina i lalo o le vai ua faatusaina i le maliu ma le tanumia o Iesu Keriso, ae ua faatusaina foi i lo tatou lava oti (tagai i le Roma 6:3–6). O le alu ae nai le vai o le faatusa lea o le Toetu o Iesu Keriso ma ua faatusaina i le toe fanaufouina e avea ma Ona soo o le feagaiga. O molimau e toalua lea e tutu i autafa o le faatanoa o le vai paptisoga e vaavaai ia mautinoa ua lilofia atoa le tagata o loo papatiso, ma o le faatusa lea o le toe fanaufouina atoa.

Pe a tatou papatiso, ua tatou mulimuli i le mamanu lea na faatu e le Faaola, o lē na papatiso e ala i le faatofu i le vaitafe o Ioritana (tagai i le Mataio 3:13–17). E finagalo le Tama Faalelagi mo Ana fanau taitoatasi ina ia faamamaina mai a latou agasala ina ia mafai ona latou toe nonofo faatasi ma Ia. O se vaega taua o Lana fuafuaga paia le papatisoina e ala i le faatofuina, e pei ona sa faia e Keriso.