Tatou te Talanoa ia Keriso
O Se Tali mo Soo Se “Pe Faapefea Pe Afai?”
“Ma o le a afio atu o ia [Iesu], ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata” (Alema 7:11).
I ni nai tausaga ua mavae atu, na ou pau ai i la’u mea faase’e, ma ou pau ai i le ogatotonu o le auala. Na so’a a’u i le taimi lava lena e se isi taavale—e telē atu—ma toso a’u i le auala. Na ta’ua e i latou na lipotia mai le faalavelave ou te le ola.
Ina ua iloa e le au faigaluega o faalavelave faafuasei o lea lava ou te ola, sa latou ave faanatinati a’u i le falemai, ma faia ai ni ou taotoga faatopetope e tele mo isi aso na sosoo ai. Ao faaola a’u i le masini ma ou le iloa se mea, sa tuu e lo’u tama ma nisi o latou lima i o’u luga ma faamanuia a’u, e ala i le mana o le perisitua. Mai lena lava taimi, na avea le faagasologa o lo’u malosi ma se vavega. Peitai na sili atu ona taua le mea lea na tupu faaleagaga nai lo le mea na tupu faaletino.
O lenei aafiaga na tatala atu ai lo’u loto i le uunaiga a le Faaola. O le vaiaso talu ona maea le faalavelave, na ou malosi ai ma iloa ai le mea na tupu. Sa ou iloa na faasaoina a’u e le Alii ma faatagaina a’u matou te faatasi ma lo’u toalua ma le ma fanau i le lalolagi. Sa ou iloa le faamafanafanaina o a’u, e le’i tuulafoaia e le Atua. Sa ou lagona le filemu, nai lo le le mautonu ma le lofituina e ala i le faagasologa o lo’u toe malosi lea o loo taoto mai i o’u luma.
I aso na sosoo ai, sa ausia ai e lo’u alofa mo le Tama Faalelagi ma Iesu Keriso ia ni o’oo’oga fou, ma ua faateleina lo’u naunau ina ia tumau faamaoni i lo’u olaga atoa. Sa ou vaaia le alofa o le Atua e ala i tagata agalelei sa ou fetaiai i ai. Ma sa ou iloa na faafofogaina ma tali mai e le Tama Faalelagi ia tatalo ma anapogi a tagata o le tele o faatuatuaga mo a’u.
A o ou faamatalaina lenei tala i isi, na le uma fesili “pe faapefea pe afai?” “Pe faapefea pe ana fai e te oti?” “Pe faapefea pe afai ua le mafai ona e savali?” “Pe faapefea pe afai o le a e tauivi ai pea ma se tiga tuga i lou olaga atoa?” O le vaega ofoofogia ia te au o le tuuina mai lea e le Togiola o se tali i fesili uma “pe faapefea pe afai?”
Ona o le Togiola, o lea o le a ou toetu ai ma o le a soloiesea soo se faaletonu po o se tiga faaletino. Ua faamauina faatasi i maua ma lo’u toalua, ma le ma fanau e avea o se aiga e faavavau. Ua mafai lena tulaga ona o le Togiola. Afai tatou te agai i luma ma le faatuatua i lo tatou Faaola ma a o tatou pasi atu i luitau o le olaga ma tumau seia oo i le iuga, o le a tuuina mai e le Togiola le ala tatou te manaomia e mulimuli atu ai, faatasi ai ma se folafolaga faamamaluina o le ola e faavavau o loo faatalitali mai i le iuga.
“Ma o le a ia ave i ona luga le oti, ina ia mafai ona ia tatalaina ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga.” (Alema 7:12).
Lo’u Tama e, saunia e Simon Dewey