Fesili & Tali

“Pe mafai faapefea ona ou tausisia se uiga faaalia lelei e uiga i le lumanai?”

Ua tatou oo uma lava i taimi e foliga mai e i ai se lotovaivai tele faifai pea ma tala e le lelei i se tulaga patino ma o nisi foi taimi i le lalolagi atoa. Ae e tatau lava ona tatou manatua ua ia i tatou se mafuaaga mo le faamoemoe ona o lo tatou faatuatua i le Alii o Iesu Keriso.

I le konafesi aoao ia Aperila 2009, na faamanatu mai ai e Peresitene Thomas S. Monson ia i tatou le poloaiga a le Alii “ia fiafia” (MF&F 68:6) ma sa tuuina mai nei upu o le faamalosiauga: “E ui ina foufou mai afa, e ui ina to mai uaga i o tatou luga, ae o lo tatou malamalama o le talalelei ma lo tatou alolofa i lo tatou Tama Faalelagi ma lo tatou Faaola o le a faamafanafanaina ma lagolagoina i tatou ma aumaia le olioli i o tatou loto a o tatou savavali ma le amiosao ma tausi poloaiga. O le a leai se mea o lenei lalolagi e mafai ona manumalo ia i tatou.”

E tusa lava pe ua foliga mai mea ua sili ona faigata, ma ua aunoa ma se suluia mai o ata i le tafailagi, ae o le a avea lava lo tatou malamalama i le talalelei e fesoasoani i le tausisia ai o se uiga faaalia lelei e uiga i le lumanai. E pei ona saunoa mai Peresitene Monson i lea lava lauga: “E i ai le faamoemoe i le lumanai, pei foi o o outou faatuatua” (“Ia Outou Lototetele,” Liahona, Me 2009, 92).

Faitau, Tatalo, Matafiafia

I ni nai tausaga talu ai, sa tuuina mai ai e le au peresitene aoao o Tamaitai Talavou le lu’i o le 100 pasene: faitau le Tusi a Mamona i aso uma, tatalo i aso uma, ma matafiafia. Sa ou manatu o le a ou taumafaia ma tausisia i le umi ou te mafaia. Sa ou ofo, na aumaia e le lu’i se suiga ofoofogia i lo’u olaga. Sa sili atu ona ou fiafia, sa ia te au le Agaga, ma sa ia te au se uiga faaalia lelei. E ui lava ina sa ou feagai pea ma faigata, ae sa fesoasoani le malosi o le Agaga ia te au ou te onosaia ai ma le fiafia.

Ariana G., 16 tausaga, Virginia, ISA

Ia I Ai le Faamoemoe

Ou te manatu o le mea aupito sili e mafai ona tatou faia e tausisia ai se uiga faaalia lelei o le matafiafia lea ma ia i ai le faamoemoe! Sa fesoasoani le faamoemoe ia te au i lo’u olaga atoa i ala e le mafaitaulia. E tatau foi ona tatou mafaufau i le faamanuiaina tele o i tatou ma iloa le tele o le alofa o lo tatou Tama Faalelagi ia i tatou. E mafai ona tatou liliu atu ia te Ia mo le filemu i soo se tulaga lava. Sa puapuagatia Lona Alo mo i tatou, o lea ua Ia silafia ai o tatou tiga. O le mea moni, e ala mai ia te Ia e mafai ai ona tatou maua le faamoemoe, faamaloloina, ma le fiafia.

Corey D., 18 tausaga, Iuta, ISA

Mafaufau i le Togiola

O le mafaufau loloto i le Togiola a le Faaola o le a aumaia ai i taimi uma le faamoemoe ma o le a fesoasoani ai foi ia tatou mautinoa. Ua tatou oo uma lava i tofotofoga o lenei olaga. Ae o le Togiola, o loo i ai tali o tofotofoga uma ma faafitauli, i le faaletino ma le faaleagaga. O le Togiola tatou te mafai ai ona vaai i nei tali. O le Togiola o se faatinoga sili lea o le alofa o le Atua mo Ana fanau. E le i’u, ma e faapena foi Lona alofa mo i tatou. O le a aumaia ai ia i tatou le lototele ma le malosi e feagai ai ma le lumanai e aunoa ma le fefe.

Daryl A., 18 tausaga, Laguna, Filipaina

Tumau i le Faatuatua

O taimi faigata nei o se vaega o le fuafuaga a le Alii ma sa muai ta’ua talu mai taimi o le Feagaiga Tuai. I tusitusiga paia uma lava, o loo folafola mai ai e le Alii o le a faamanuiaina le au amiotonu ma faasaoina. A e tumau i le faamaoni, o le a i ai le Agaga Paia iina e taialaina oe i nei taimi uma o le fememea’i, e faamafanafana ia te oe, ma faamanatu atu ia te oe ua i ai se fuafuaga a le Alii mo oe. Afai ua i ai lou faamanuiaga faapeteriaka, suesue i ai ia iloa ai le mea o loo teuina e le Alii mo oe.

Rae B., 17 tausaga, Uosigitone, D.C., ISA

Mafaufau e uiga i Ou Faamanuiaga

O se tasi o mea e aumaia ai ia te au le olioli ma le faamoemoe i nei taimi faigata o le faaaoga lea o se taimi e nofo ai ma mafaufau e uiga i o’u faamanuiaga ma lo’u iloa i le talalelei. O nisi taimi e faigofie e pei o le i ai o se uo silisili po o se mea e maoae e pei o le ata o le faaolataga e faatumuina ai au i le olioli ma ou manao ai e faasoa atu le olioli. O le mea lena ou te tausisia ai le lelei o o’u uiga faaalia.

Annette M., 15 tausaga, Michigan, ISA

Manatua le Malumalu

A ou lotovaivai, ona ou mafaufau loloto lea i upu o loo maua i le faaiuga o le autu a Tamaitai Talavou: “Matou te talitonu o le a matou talia ma ola i nei mataupu taua, o le a matou saunia e faamalosi i le aiga ma le auaiga, osia ma tausia feagaiga paia, maua sauniga o le malumalu, ma olioli i faamanuiaga o le faaeaga.” E mafai ona ou maua le mafanafana i nei upu, ma ou te iloa o le a faataunuuina i lo’u olaga ma olaga o tamaitai talavou amio mama uma. E leai so’u masalosalo, e i ai lo’u faamoemoe i sauniga paia o le malumalu. O faamanuiaga o se olaga amiotonu e le muta, ma a ou manatuaina nei mea, e faatumulia lo’u loto i le olioli, faamoemoe, alofa, ma le lototele.

Nathalia M., 18 tausaga, Mérida, Venezuela

Ia i ai i le Au Manumalo

Ina ia tausisia se uiga faaalia lelei, e tatau ona e iloaina le upumoni faigofie lenei: o le ‘au a le Alii o le ‘au manumalo lea i le iuga. O lona faigofie lena. E leai se malosi o Satani e faatoilalo ai le Atua. Aua ua uma ona tatou iloa le au manumalo, o lea e manaomia ai ona tatou taulai atu e tumau ai i le ‘au a le Alii. A tatou ola agavaa e ulu atu i le malumalu, ua tatou ofuina la tatou toniga e iloa ai o loo tatou i ai i Lana ‘au. O le faitauina o a tatou tusitusiga paia, faia o a tatou tatalo, ma le auauna atu i o tatou uso ma tuagane, tatou te maua ai le fiafia moni lea e faafaigofie ai ona i ai o tatou uiga lelei faaalia.

Brayden F., 17 tausaga, Utah, ISA

Atiina Ae se Uiga Faaalia o le Lotofaafetai

Aua nei taulai atu i taimi o faigata. Ou te tausia se “Api Talaaga o le Faafetai.” O aso uma lava ou te tusi ai e le itiiti ifo i le tasi le mea ou te faafetai ai i lena aso. Po o le a lava le faaletonu sa foliga mai ai se aso, e mafai lava ona ou maua se mea e faafetai ai. Faitau ou faamanuiaga. O le atiina ae o se uiga faaalia o le lotofaafetai e mafai ona fesoasoani ia te oe e taulai ai i mea lelei i lou olaga.

Ashlee H., 18 tausaga, Oklahoma, ISA

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Lou Lumanai Matagofie

“E finagalo le Alii ia te outou, a’u uo talavou e, ina ia outou naunau ma o outou loto atoa e tausia ma ola ai i nei upumoni o le talalelei o loo maua i tusitusiga paia. A outou faia lenei mea, o le a mamao atu la outou vaai nai lo le taimi nei, ma o le a outou iloa atu ai o outou lumanai matagofie ma le ofoofogia faatasi ai ma avanoa ma tiutetauave. O le a outou naunau e galulue malosi ma onosai mo se taimi umi, ona outou maua ai lea o se uiga faaalia lelei mo le olaga.”

Peresitene Dieter F. Uchtdorf, Fesoasoani Lua i le Au Peresitene Sili, “Iloa le Iuga mai le Amataga,” Liahona ma le Ensign, Me 2006, 44.

O Le Isi Fesili

“Pe faapefea ona ou tali atu i fesili a a’u uo e uiga i le malumalu pe afai e le tele so’u lava iloa i ai?”

Auina mai lau tali a o lei oo i le aso 15 Ianuari, 2012, i le:

Liahona, Questions & Answers 1/12

50 E. North Temple St., Rm. 2420

Salt Lake City, UT 84150-0024, USA

Po o le i-meli: [e-mail]

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.