O Meaalofa na Mafaufauina

Aisea na avatu ai e le Au Makoi ia Iosefa ma Maria ia auro, pulu lipano, ma le pulu muro?

E toatele tagata e talitonu e taulia le mafaufau pe a oo ina foai atu meaalofa. Atonu ona o le mafaufau o i tua atu o le meaalofa, e taulia tele ai nai lo le na o se mea aoga pe matagofie—e avea ai le meaalofa o se faatusa o le alofa o lē foaiina atu le meaalofa po o le manatua o le tagata o loo avatu i ai. O nisi meaalofa e tele atu sona uiga nai lo le mafaufau o i ai i tua atu o le meaalofa; o nei ituaiga o meaalofa e i ai se faatusa lautele ua taliaina e faaopoopo atili ai lona taua. A i ai i se meaalofa mea uma e tolu—aoga mautinoa, taua patino, ma le uiga—e mafai ona avea ma meaalofa e aupito sili ona mafaufau i ai ma talisapaia i lo meaalofa uma.

Manatu i le mafaufau o i tua atu o meaalofa o le auro, pulu lipano, ma le pulu muro na tuuina atu e le Au Makoi i le tamaitiiti o Keriso (tagai Mataio 2:11). E le o ta’u mai e le Tusi Paia le mafuaaga na aumaia ai e le Au Makoi nei meaalofa faapitoa, ae e tofu nei meaalofa uma ma se taua mautinoa ma atonu foi o se uiga faafaatusa mo le Alo o le Atua ma Ona matua faalelalolagi.

Auro

Aoga mautinoa: Mo se ulugalii talavou e le o toe mamao ona totogi lea o le malaga atu i Aikupito e aloese ai mai le ita o Herota, o le a avea le auro o se meaalofa aoga tele.

Uiga faafaatusa: O le auro o se meaalofa masani mo tupu (tagai 1 Tupu 9:14, 28) aua o le faatusa o le tulaga tautupu ma le aigatupu—o se meaalofa ua fetaui lelei mo le “Tupu o tupu” (1 Timoteo 6:15).

Pulu Muro

Aoga mautinoa: E le gata i lona taua tautupe, ae sa faaaogaina foi le pulu muro o se faamanogi e manaia lona manogi ma se fagusausau.

Uiga faafaatusa: O le pulu lipano e maua mai i se laau vine manaia ma sa faaaogaina i sauniga o le perisitua, i taulaga mu (tagai Levitiko 2:1), ma i le suauu mo le faauuina o faitaulaga. O lea, e mafai ona faatusa i le perisitua a le Alii ma Lana matafaioi o le Tamai Mamoe a le Atua o le a ositaulagaina mo i tatou (tagai Ioane 1:29).

Pulu Muro

Aoga mautinoa: O le pulu muro, o se suauu oona mai se laau vine, sa taua foi i le tamaoaiga, ae atonu sa sili ona aoga ia Maria ma Iosefa mo lona faaaogaina o se vailaau.

Uiga faafaatusa: I le Feagaiga Fou, e masani ona fesootai le pulu muro mo le atulalaina ma le faasaoina o tino maliu (tagai Ioane 19:39–40). O le aoga o le pulu muro o se vailaau e mafai ona faatusa i le matafaioi a Keriso o se Fomai o Fomai, ma lona aoga i le faasaoina o tino maliu e mafai ona faatusa i le “ipu oona” o le a Ia inumia pe a puapuagatia o Ia mo a tatou agasala (tagai MF&F 19:18–19).

Ata na tusia e Scott Greer