O Latou E Tatau Ona Sui
Ina ua ou papatiso, sa teena e lo’u aiga le Ekalesia. O lea la sa ou tau mafaufau ai pe faapefea ona ou tali atu pe a feteena’i o latou olaga ma mataupu faavae o le talalelei.
Ina ua ou papatiso, sa na o au le tagata o lo’u aiga na taliaina le talalelei. Sa 19 o’u tausaga, ma sa ou fiafia e uiga i lo’u papatisoga. Sa taliaina au e uso ma tuafafine o le Paranesi a Panuco Muamua i Veracruz, Mekisiko. E le gata i lea, ae sa amata ona ou sauniuni e faamisiona tala’i i le taimi lava e atoa ai le tausaga talu ona avea au ma tagata o le Ekalesia. Sa matagofie le iloa e moni le Ekalesia, ma sa ou manao e faasoa atu le talalelei i isi.
Sa teena e lo’u tama, o le toalua o lo’u tamā (na oti lo’u tina i le 12 o o’u tausaga), ma o’u uso e toatolu le Ekalesia ina ua ou papatiso. O le mea e leaga ai, sa lei lelei ona ou tali atu i ai. Sa ou le faaaloalo ia te i latou. Ou te lei amanaiaina lo’u tama ma ona manatu. Ina ua ou ta’u atu ia te ia e le o toe mamao ona ou alu lea i se misiona, sa le fiafia aua o le a ou le toe faigaluega aemaise lava atonu o le a mamao se mea ou te alu i ai. Sa faalavelave ai lava ia te au i taimi uma e feteenai ai olaga o lo’u aiga ma a’u mataupu faavae, e pei o lo latou matamata TV pe faalogologo i polokalama faamusika sa ou manatu e le talafeagai ma Aso Sa, pe valaaulia foi au e lo’u tama i le toonai i Aso Sa anapogi.
Sa ou ta’uamiotonuina o’u uiga le lelei sa faaalia i lo’u aiga i lo’u faapea ifo ia te a’u lava, e leai lava se mea sese o o’u faia—i lo’u avea ai o se tagata o le Ekalesia, e tatau lava ona ou ola i mataupu faavae o le talalelei tusa lava pe faalavelave mai lo’u aiga. Sa ou faapea ifo ia te au lava o i latou e tatau ona sui. O le mafuaaga lea, sa le lelei ai le ma mafutaga ma lo’u tama. Sa atili ai ona leaga ona o o’u uiga faaalia ma lo’u faamaualuga. Sa ou faaauau ai lava faapena —lo’u le popole i lona manuia faaleagaga.
I se tasi aso a’o ou suesue mo la’u vasega o le inisitituti, sa ou tau atu ai i le 1 Nifae 16, i le mea lea na gau ai le aufana a Nifae, ma sa faigata ai ona maua ni meaai. Sa amata ona muimui tagata uma—o Lamana ma Lemuelu, e pei lava o la la’ua masani, faatasi ai ma lo latou tama, le perofeta o Liae. Sa tali atu Nifae e ala i le faia o se aufana ma se au mai se laau ma fesili atu i lona tama po o fea e alu e maua mai ai se meaai. Sa tatalo lona tama mo se taitaiga, ma sa a’oa’i o ia e le Alii ona o lona muimui. Sa talia lelei e Liae ma sa ia toe tauaveina lana matafaioi o se taitai o lona aiga ma o se perofeta a le Alii. E lei faamasinoina e Nifae lona tama i lona tulaga vaivai, na te lei mafaufau foi faapea ua le tatau ona toe avea ma perofeta, e oo lava i le taimi na talanoa ai Nifae ma le Alii ma ia mauaina faaaliga vaaia.
Ina ua ou faitauina ma malamalama i lenei tala, sa vave ona ou mafaufau i le leaga o la’u amio i lo’u aiga. Sa ou maasiasi i o’u uiga faaalia—i lo’u manatu sa sili atu a’u nai lo i latou—ma sa sili ona ou lagonaina le faanoanoa i lo’u le faaaloalo i lo’u tama. Sa ou faanoanoa i lo’u le faamuamuaina o le faasoa atu o le talalelei ia i latou.
Sa ou lei vaai i lo’u aiga i le tulaga e mafai ona avea ai i latou. Sa na o lo’u taulai atu lava i o latou vaivaiga. Mai lava i lena aso, sa faasolosolo malie ona suia o’u uiga faaalia ma la’u amio. Sa ou taumafai e faaaloalo i taimi uma i manatu o lo’u tama, e ui lava e tele taimi ou te le ioeina ai. Afai na te valaauliaina au i le toonai ae o la ou te anapogi, ou te faamalie lava i ai i le le mafai ona ma aai. Ua le o toe faalavelaveina a’u i polokalama po o musika latou te matamata ai pe faalogologo ai i Aso Sa, ou te manatua o la lava latou te lei osifeagaiga ma lo tatou Tama Faalelagi, e pei ona ou faia.
I se tasi taeao a o ou fesoasoani i lo’u tamā i le faiga o se meaai, sa ou ta’u atu ai ia te ia le tele o lo’u alofa i ai ma ou faatoese foi i ai i la’u amio lē mafaufau. Sa ou ta’u atu ia te ia lo’u mitamita ia te ia o lo’u tama, ma ou te manao ina ia maua se ma sootaga filemu ma ia.
Sa amata ona suia mea uma. Sa faaitiitia ma sa mou atu le feupua’i. E ui lava sa ou mafaufau o le a umi se taimi ona faatoa auai lea o lo’u aiga i le Ekalesia, ae sa faaleleia o latou uiga faaalia i le Ekalesia. Semanu e le tutupu nei suiga pe a na ou le suia muamua.
Ina ua mavae le tausaga e tasi talu ona avea au ma se tagata o le Ekalesia, sa ou faamisiona tala’i i le Misiona a Mekisiko Tijuana. Toe tolu masina ae ou te le’i toe foi, sa ou maua ai se tusi sa faapea mai ua talia e lo’u aiga le talalelei ma o le a papatisoina. Ina ua ou toe foi atu, ua avea i latou ma tagata o le Ekalesia.
I tausaga e 15 o avea a’u ma se tasi o le Ekalesia, o se tasi o a’u lesona aupito sili mai lo’u suesueina o le Tusi a Mamona ma faatasi ai ma fanau a le Atua, ua sili ona latalata mai ia te au: o lo’u aiga.
Ata na tusia e Dan Burr