I Tala Fou
Faapaia le Nofoaga o Ierusalema mo Ata Tifaga
O le Nofoaga o Ierusalema mo Ata Tifaga, sa fausia e le Ekalesia mo le gaosiga o ata tifaga e faaautu i le talalelei, ua faapaiaina ma ua faaaogaina nei mo le pueina o ata tifaga. O loo faaaogaina muamua e fatufatu ai le Galuega Faatino o le Potutusi o Mau o le Feagaiga Fou—o se faasologa o vitio e faaalia ai vaaiga taua mai le soifuaga o Iesu Keriso ma Aposetolo.
O le tulaga o loo i le LDS Motion Picture Studio South Lotoa i Goshen, Iuta, ISA, e le atoa se 60 maila (97 km) i saute o ofisa autu o le Ekalesia i le Aai o Sate Leki. E le o se ata faatusa o Ierusalema, ae o se toe fatufatuaiga o nofoaga taua o le aai.
Ua filifilia le nuu laitiiti o Goshen ona o le talitutusa o foliga o le eria o loo siomia ai i laufanua o Ierusalema—o atumauga, laufanua valevalenoa, togavao o laau o le arasi, faupuega oneone, ma se auvai. O le Vaituloto o Iuta lea e lata ane i ai o le a avea ma Sami o Kalilaia.
I nisi o vaega, o vaaiga e faaaoga ai le komepiuta, o le a faatumu ai faamatalaga e le o mafai ona maua i le nofoaga.
Suia Aiaiga Faavae mo Faifeau Faamisiona Matutua
Na faamaonia talu ai e le Au Peresitene Sili ma le Korama a le Toasefululua ia suiga i aiaiga faavae e faatatau i le umi o auaunaga a faifeau faamisiona matutua ma fale o faifeautalai ina ia uunaia ai nisi ulugalii se toatele e auauna atu faafaifeautalai faamisiona ma ia faaleleia ai o latou tomai faafaifeautalai.
E amata atu i le aso 1 o Setema, 2011, ua mafai nei e ulugalii ona auauna atu mo le 6, 12, 18, po o le 23 masina. Ma le isi, o se seleni o lona maualuga faatapulaa e $1,400 (Amerika) i le masina ua faatulagaina mo le totogi o fale. O le a faaauau pea ona totogi e ulugalii ia meaai ma isi tupe faaalu mo mea e patino ia i laua lava.
I le taimi ua mavae, o le aiaiga faavae sa i ai, o ulugalii e auauna i fafo atu o o latou atunuu e nonofo ai, sa valaauina e le itiiti ifo ma le 18 masina. O i latou o e mananao e galulue i fafo atu o o latou atunuu e nonofo ai mo le itiiti ifo ma le 18 masina ua mafai nei ona latou faia pe afai latou te totogia a latou lava feoaiga o le o atu ma le toe foi mai i le misiona.
O fesili e faatatau i faifeau faamisiona matutua e mafai ona auina atu i le seniormissionaryservices@ldschurch.org.
Ua Faateleina e le Ekalesia ia Gagana e Maua i le Initoneti
Ua faateleina e le LDS.org ia gagana ua maua. Talu ai nei na faaopoopo ai ni itulau faasino upu mo gagana fou e 48 i le uepisaite aloaia a le Ekalesia. O le kiliki i soo se gagana i lalo o le sootaga “Languages” i le tulimanu pito i luga i le taumatau o soo se itulau o le LDS.org, e mafai ai e tagata asiasi ona vaaia sootaga i tusi ma mea e faaaoga a le Ekalesia o loo maua i le taimi lea i luga o le initoneti i lena lava gagana.
O le a iu ina maua vaega eseese o le LDS.org i gagana e 10 e oo i le 15. A oo i le tulaga lena, o le a aveese loa le itulau o le gagana mo na gagana. (Mo se faataitaiga, e leai se itulau gagana mo le faa-Peretania, Farani, Siamani, Italia, Potukale, po o le Sipaniolo, aua o na gagana ua uma ona i ai le tele o le LDS.org i a latou gagana.)
O loo galulue foi tagata faigaluega i le Ekalesia ia faia mekasini ma isi tusi ua faaliliuina mai le LDS.org ia maua i masini faaeletonika feaveai.
O le nofoaga fou mo ata tifaga a le Ekalesia i Goshen, Iuta, o le a faaaoga e pue ai vaaiga mai le soifuaga o Iesu Keriso e pei ona tusia i le Feagaiga Fou.
© IRI