Tupe o La’u Misiona
Ou te iloa atonu e ese se faalogoga i lenei mea, ae sa ou teuina se tupe e totogi ai la’u misiona ae ou te lei fanau mai. Ina ua iloa e lo’u tina o le a fanau mai sana pepe, sa ia aumaia se atigi apa susu, faapu, ma faaigoa, “Tupe o le Misiona.” Mai lava i lena aso, o matou teuina ma lo’u aiga se tupe mo la’u misiona.
O le teuina o le tupe mo la’u misiona sa avea o se taumafaiga faaleaiga. Ina ua ou fanau mai, o tagata uma lava o o matou aiga sa asiasi mai sa tuuina ni tupe Filipaina i le apa o le tupe o la’u misiona. A oo mai foi i aso malolo o le Kerisimasi ma le Tausaga Fou, sa aumai foi e tagata o le aiga ia te au ia tupe e faaopoopo i le tupe o la’u misiona.
O nisi taimi e aumai ai e o’u matua matutua ia te au se tupe pe a ou lelei i le a’oga ma tauvaga. E tuu foi na meaalofa i le tupe o la’u misiona. Sa i ai se taimi, ina ua ou mauaina ni pine o taui, sa faitauina e le uso o lo’u tina ia pine uma lava sa ou mauaina ma ia tuu maia ia te au tupe mo pine taitasi. Ina ua uma ona totogi a’u sefuluai, sa tuu uma foi lena tupe i le tupe o la’u misiona.
Ina ua papatisoina a’u, sa tupu atili lo’u naunau e auauna i se misiona. Sa faatuina e lo’u aiga se sini e teu se tupe ia lava e totogi atoa ai la’u misiona. Ona ua i ai nei nai o’u tei, ua faaopoopo foi le tupe sa matou teuina i tupe o a latou foi misiona.
Ua iva nei o’u tausaga ma ua toeitiiti lava o’u aulia le afa o tausaga ou te faamisiona ai. Ua faateleina lo’u naunau e auauna i se misiona aua ua ou iloa ua toatele naua tagata ua fesoasoani mai i la’u tupe mo le misiona.
O le a ou teuina pea lava tupe mo la’u misiona. Ou te iloa o le a faamanuiaina au e le Tama Faalelagi ina ia mafai ai ona ou auauna atu ia te Ia o se faifeautalai i se aso.
Tupe o le Misiona
Ata na tusia e Brian Bean